Joonde Daawda ley Urusaliima
14
1 Hiram, kaananke Tirus waɗi nelaaɓe ngardi to Daawda e leɗɗe Seddere e sehooɓe kaaƴe e leɗɗe faa nyiɓana ɗum suudu. 2 Ndeen Daawda faami Joomiraaɗo waɗi ɗum kaananke dow Israa'iila. Wooɗi du, na semmbinɗina laamu muuɗum saabe Israa'iila, lenyol muuɗum ngool.3 Daawda ɓaŋi rewɓe woɓɓe ley Urusaliima. O rimdi e muɓɓen ɓiɓɓe worɓe e rewɓe. 4 Inan inɗe ɓiɓɓe ɓe o heɓi ley Urusaliima: Sammuwa e Sobab e Natan e Suleymaana 5 e Yibihar e Elisuwa e Elipelet 6 e Noga e Nefeg e Yafiya 7 e Elisama e Beeliyada e Elifelet.
No Daawda jaalorii Filistiyankooɓe
8 Nde Filistiyankooɓe nannoo nebbam jooraama dow Daawda faa laatoo kaananke Israa'iila ndeen, fuu ummii filowaade ɗum. Nde Daawda faamannoo ɓe fu, wurtii hawrowi e maɓɓe. 9 Filistiyankooɓe ɓeen njottii naɗɗol Refayinkooɓe, ɓe cankitii toon. 10 Daawda ƴami Laamɗo wi'i:
— Yalla mi haɓda e Filistiyankooɓe ɓee naa? Yalla a wattan ɓe e juuɗe am naa?
Joomiraaɗo jaabii o wi'i:
— Yahu, mi wattan ɓe e juuɗe maaɗa.
11 Filistiyankooɓe ɓeen ƴeenciri Ba'al-Perasim. Daawda jaalii ɓe toon. Ndeen o wi'i:
— Laamɗo sankitirii wayɓe kam e junngo am hono no ndiyam fusirta leydi de waɗa ildude muuɗum noon.
Wo saabe ɗuum de nokkuure ndeen inndiraa Ba'al-Perasim. 12 Filistiyankooɓe ɓeen ndoggi njoppi allaaji muɓɓen de Daawda waɗi ɗi paɗɗaa ley yiite.
13 Caggal ɗuum Filistiyankooɓe ɓeen njeccii cankitowii ley naɗɗol toon katin. 14 Daawda ƴami Laamɗo katin de Laamɗo jaabii ɗum wi'i:
— Taa ƴuuru ɓe yeeso, ammaa fiila ɓe, mbakkoɗaa ɓe, ƴuurdowaa ɓe ley cukkuri leɗɗe miiri de ukkoroɗaa ɓe toon. 15 Wakkati nananɗaa sawtu koyɗe gomma faa dow leɗɗe ɗeen fu, mburtanoɗaa wolde ndeen sabo wo Laamɗo ardotoo yeeso maaɗa faa haɓda e geɓe konunkooɓe Filistiyankooɓe ɓeen.