No Daawda wartiriri keesuwal amaana ley Urusaliima
13
1 Daawda yi'idi e ardiiɓe konunkooɓe ujunere e ardiiɓe konunkooɓe hemre e mawɓe Israa'iila fuu. 2 O wi'i jamaare ndeen fuu:— Si on njardake, wooɗi du, si wo ɗum muuyɗe Joomiraaɗo, Laamɗo meeɗen fu, en nelana sakiraaɓe meeɗen heddiiɓe ley leyɗe Israa'iila fuu, tawti almaami'en e Lewinkooɓe ley galluuje e durduɗe ɗe njooɗii fuu faa ngara kawrita e meeɗen. 3 Ndeen ngartiren keesuwal Laamɗo meeɗen sabo en ngaɗaayno anniya majjum wakkati laamu Sawulu.
4 Jamaare ndeen fuu jaɓi ko o wi'i ɗuum sabo na ɗum fotani yimɓe fuu. 5 Ndeen Daawda e yimɓe Israa'iila fuu kawriti gilla pogowol Si'or keerol leydi Misira faa hewti Lebo-Hamat faa ngadda keesuwal Laamɗo ngaal ley wuro Kiriyat-Yarim. 6 Daawda e yimɓe Israa'iila fuu njaadi Baala ley Kiriyat-Yarim nder leydi Yahuuda faa ngartira keesuwal Laamɗo, Joomiraaɗo jooɗiiɗo dow keruba'en ɗo innde muuɗum noddetee ɗoon. 7 Ɓe kooƴi ngal ley suudu Abinadab, ɓe ndeki ngal dow torkooru heyru. Ujja e Ahiyo ngoni dorbotooɓe torkooru nduun. 8 Daawda e yimɓe Israa'iila fuu na peekoo na njima, na mbamira e semmbe muɓɓen fuu. Iɓe piya bawɗi, iɓe ngokkondira beɗi njamndi, iɓe puufa luwe, iɓe koɗa kolli. 9 Nde ɓe njottinoo ƴarorde Kidon ndeen, na'i ɗiin nesi liɓude keesuwal ngaal de Ujja foorti junngo muuɗum teegii ngal taa ngal saama. 10 Joomiraaɗo tikkani Ujja sanne de fiiri ɗum maayde saabe junngo muuɗum meemii keesuwal ngaal. O maayi ɗoon yeeso Joomiraaɗo. 11 Ɓernde Daawda metti sanne saabe no tikkere Joomiraaɗo saamiri dow Ujja noon. Nokkuure ndeen inndiraa Peres Ujja*. Noon nde inndirtee faa warde hannden. 12 Nyannde ndeen Daawda huli sanne Joomiraaɗo de wi'i:
— Noy mbaawirmi nannude keesuwal Laamɗo ngaal ley wuro am?