Haala yaadooɓe e Daawda
12
1 Inan yahuɓe to Daawda ley wuro Siklag, wakkati tilsannoo ɗum heddaade to woɗɗi e Sawulu, ɓii Kis ndeen. Yimɓe ɓeen wo konunkooɓe semmbiɗinɓe wallitooɓe mo. 2 Iɓe tiigonoo kure e piwli wooɗi du wo ɓe waawɓe fiwloraade nano e nyaamo fuu. Noon ɓe mbaawiri fiɗirgol kure ɗeen du. Wo ɓe sakiraaɓe Sawulu jeyaaɓe e lenyol Benyamin. 3 Ahiyejer, mawɗo maɓɓe e Johas ɓiɓɓe Sema Gibeyanke e Yejiyel e Pelet, ɓiɓɓe Asmawet e Beraka e Yehu, Anatotinke 4 e Yismaya, Gibiyoninke, gooto hakkunde ɓurɓe cuusal oon woni ardiiɗo mawɓe konunkooɓe 30 ɓeen, 5 e Yeremiya e Yahajiyel e Yohanan e Yojabad, Gederayinke 6 e Elujay e Yerimot e Beyaliya e Semariya e Sefatiya, Harufiyanke 7 e Elkana e Yisiya e Ajarel e Yohejer e Yasobe'am, Koorankooɓe 8 e Yohela e Jebadiya ɓiɓɓe Yeroham mo Gedor.9 Worɓe lenyol Gad, konunkooɓe semmbiɗinɓe cennditii tannyi Daawda ley ladde yoornde to suuɗii toon. Wo ɓe worɓe waawuɓe konu sanne. Iɓe tiigii bawaaɗe e kure. Iɓe nanndi e dawaaɗi ladde. Iɓe karwi hono lewli dow baamle. 10 Ejer wonnoo mawɗo maɓɓe. Obadiya rewti ɗum. Eliyaba woni tataɓo. 11 Mismana woni nayaɓo. Yeremiya woni njoyaɓo. 12 Atay, njeegaɓo. Eliyel, njeɗɗaɓo. 13 Yohanan, njeetataɓo. Eljabad, njeenayaɓo. 14 Yeremiya, sappoɓo e Makbanay, sappo e go'aɓo. 15 Ɓee ngoni ardiiɓe konunkooɓe lenyol Gad. Semmbe konunke ɓurɗo fuu famɗude na fonndee e worɓe 100, ɓurɗo manngu du semmbe muuɗum na fotana e worɓe 1 000. 16 Wo kamɓe peƴƴi Urdun lewru go'aɓurdu wakkati heewunoo faa na weccoroo tatteejim fuu ndeen. Ɓe ndiiwi jooɗinooɓe ley naɗɗi faro lettugal e gorgal fuu.
17 Woɓɓe ley lenyol Benyamin e ngol Yahuuda ngari to Daawda faa ley suuɗorde muuɗum toon. 18 Daawda wurtii darii yeeso maɓɓe de wi'i ɓe:
— Si wo jam waddi on, on ngaraanaa faa mballon kam fu, mi jaɓɓoto on e ɓernde am fuu. Ammaa si wo jambaade kam, watta e juuɗe wayɓe kam de mi waɗaay fuu ko boni, ngaranɗon du, Laamɗo maamii'en hiitoo hakkunde meeɗen.
19 Ndeen Ruuhu Laamɗo wari e Amasay, mawɗo konunkooɓe 30 ɓeen de wi'i:
Miɗen ngondi e maaɗa, Daawda ɓii Yesa.
Ayyo miɗen ngondi e maaɗa.
Jam wonda e maaɗa.
Jam kiɓɓuɗo wonda e maaɗa,
aan e wallitooɓe ma fuu
sabo Laamɗo maaɗa na walle.
Daawda jaɓɓii ɓe de waɗi ɓe laatii mawɓe konunkooɓe muuɗum.
20 Woɓɓe ley lenyol Manasa du, ngari wallitinde Daawda nde wardunoo e Filistiyankooɓe faa haɓda e Sawulu ndeen. Ammaa ɓe keɓaay wallude Filistiyankooɓe ɓeen sabo na miilannoo Daawda na haajaa jambaade ɗum'en watta e juuɗe joomum Sawulu. 21 Nde Daawda yeccinoo Siklag ndeen, yimɓe lenyol Manasa ngari jinngande ɗum. Ɓeen ngoni: Adna e Yojabad e Yedihayel e Mikayel e Yojabad e Elihu e Silletay. Ɓe fuu wo ɓe ardiiɓe konunkooɓe ujunere ley lenyol Manasa. 22 Wo kamɓe mballi Daawda sabo ɓe fuu iɓe laatinoo mawɓe konunkooɓe semmbiɗinɓe. Ɓe laatii ardiiɓe konunkooɓe.
23 Nyannde fuu yimɓe na ngarannoo to Daawda faa mballa ɗum. Konunkooɓe makko ngari laatii ɗuuɗɓe semmbiɗinɓe hono konunkooɓe Laamɗo noon.
Limoore konunkooɓe Daawda yahuɓe Heberon
24 Inan limoore konunkooɓe tiigiiɓe kaɓitirɗe waruɓe to Daawda wuro Heberon faa kokka ɗum laamu Sawulu fodde no Joomiraaɗo yamirnoo.
25 Ley lenyol Yahuuda, worɓe tiigiiɓe bawaaɗe mawɗe e labbe, wo konunkooɓe 6 800.
26 Ley lenyol Simeyon, wo konunkooɓe semmbiɗinɓe 7 100.
27 Ley lenyol Lewi, wo worɓe 4 600,
28 Yehoyada, mawɗo suudu Haaruuna e worɓe 3 700.
29 Tawti Sadok, sordaasiijo jokolle cemmbiɗinɗo e yimɓe suudu muuɗum ardiiɓe 22.
30 Ley lenyol Benyamin, sakiraaɓe Sawulu, wo worɓe 3 000 sabo wakkati oon heewɓe maɓɓe na keddinoo na ngolla ley suudu Sawulu.
31 Ley lenyol Efrayim wo konunkooɓe semmbiɗinɓe 20 800, worɓe innde anndeeɓe fodde cuuɗi muɓɓen.
32 Ley feccere lenyol Manasa wo worɓe 18 000 inɗe muɓɓen mbinndaa faa ngara kokka Daawda laamu.
33 Ley lenyol Isakar, anndunooɓe wakkatiiji faa paama no Israa'iila haani dabira, wo ardiiɓe 200 e sakiraaɓe muɓɓen ɓe ndawranta.
34 Ley lenyol Jabulon wo worɓe 50 000 harwuɓe ekitaaɓe konu, tiigiiɓe siyiiji kaɓitirɗe fuu, hawtuɓe ɓernde wootere mbinndaa.
35 Ley lenyol Naftali wo ardiiɓe konunkooɓe 1 000 e konunkooɓe 37 000 tiigiiɓe bawaaɗe mawɗe e labbe.
36 Ley lenyol Dan wo worɓe 28 600 segilaniiɓe konu.
37 Ley lenyol Aser wo worɓe 40 000 tiigiiɓe kaɓitirɗe segilaniiɓe konu.
38 Ley lenyi jooɗiiɗi faro lettugal Urdun ɗum woni yimɓe Ruben e ɓe Gad e feccere lenyol Manasa tiigiiɓe siyiiji kaɓitirɗe muɓɓen fuu wo worɓe 120 000.
39 Konunkooɓe ɓeen fuu ngari Heberon na cegilanii konu faa kokka Daawda laamu dow Israa'iila fuu e ley ɓernde wootere. Israa'iilankooɓe heddiiɓe fuu njardii Daawda laatoo kaananke muɓɓen. 40 Ɓe keddii toon faa waɗi balɗe tati, iɓe nyaama, iɓe njara sabo sakiraaɓe maɓɓe moƴƴinaniino ɓe nyaamdu.
41 Yimɓe jooɗiiɓe ɗakkol maɓɓe faa hewti hoddiiɓe lenyol Isakar e ngol Jabulon e Naftali fuu ngaddiri nyaamdu e araaji e geeloobi e araaji baaneeji e na'i. Ɓe ngaddi conndi e tame ƴibbe joorɗe e inabooje joorɗe e inaboojam e nebbam e na'i e baali e be'i faa heewi, sabo Israa'iila na wondunoo e seyo.