No Daawda laatorii kaananke
11
1 Israa'iilankooɓe fuu kawriti to Daawda ley wuro Heberon mbi'i ɗum:— En fuu wo en enndu wooturu, duwol gootol. 2 Ley ko wittii, fay e laamu Sawulu wo aan ardotonoo Israa'iila nde yahata konu e nde wartata fuu. Laamɗo Joomiraaɗo maaɗa wi'ii ma:
«Wo aan laatoto duroowo Israa'iila, lenyol am ngool.
Wo aan laatoto kaananke Israa'iilankooɓe, yimɓe am ɓeen.»
3 Mawɓe Israa'iila fuu ngari to kaananke ley wuro Heberon. Toon Daawda haɓɓidi e maɓɓe amaana yeeso Joomiraaɗo. Ɓe njoori nebbam dow hoore makko, ɓe ngaɗi o kaananke maɓɓe fodde no Joomiraaɗo yamirnoo e hunnduko Samuwiila noon.
No Daawda teetiri Urusaliima
4 Nyannde gomma Daawda e konunkooɓe Israa'iila fuu ummii naati Urusaliima, ɗum woni galluure Yebus. Toon woni to Yebusinkooɓe leydi ndiin njooɗinoo wakkati oon. 5 Yimɓe ɓeen mbi'i Daawda:
— A naatataa ɗoo!
Ammaa Daawda teeti galluure Siyona semmbinɗinaande ndeen. Wo nokkuure ndeen inndirtee Galluure Daawda. 6 Tawi Daawda wi'iino:
— Artiiɗo haɓdowi e Jebusinkooɓe fuu, wo kam laatotoo mawɗo konunkooɓe.
Yo'ab, ɓii Seruya artii de waɗaa mawɗo konunkooɓe.
7 Daawda jooɗii ley galluure semmbinɗinaande ndeen. Wo saabe ɗuum de galluure ndeen inndiraa Galluure Daawda. 8 O nyiɓi o fiilni galluure ndeen gilla Millo e tatteeji muuɗum fuu. Yo'ab du nyiɓitii ko heddii e mayre. 9 Manngu Daawda na yaarannoo yeeso, sabo Joomiraaɗo Jom baawɗe na wondunoo e muuɗum.
Haala worɓe Daawda semmbiɗinɓe
(2 Samuwiila 23:8-39; 1 Kabaaruuji 27:2-15)
10 Inan mawɓe konunkooɓe Daawda semmbiɗinɓe walluɓe ɗum semmbinɗini laamu muuɗum kam'en e Israa'iilankooɓe fuu, fodde no Joomiraaɗo wiirunoo dow Israa'iila noon. 11 Ndelle inan inɗe konunkooɓe Daawda semmbiɗinɓe ɓeen: Yasobe'am, ɓii Hakmoni woni mawɗo ardiiɓe sordaasiiɓe. Wo oon ɓanti labbo muuɗum de wari yimɓe 300 nyannde wootere.
12 Dewtuɗo o woni Eliyajar, ɓii Dodo, Ahohinke, gooto e mawɓe konunkooɓe tato ɓurɓe manngu ɓeen. 13 Wo oon wondunoo e Daawda ley wuro Pas-Damim wakkati Filistiyankooɓe kawritinnoo faa kaɓda e maɓɓe ndeen. Tawi ngesa sa'iiri na wonnoo toon. Konunkooɓe Israa'iila ndoggi yeeso Filistiyankooɓe. 14 Eliyajar e worɓe muuɗum ndarii hakkunde ngesa ngaan, ɓe teeti nga de ɓe njaaltii Filistiyankooɓe. Joomiraaɗo hokki ɓe jaalorgal manngal.
15 Hakkunde ardiiɓe sordaasiiɓe Daawda 30 ɓeen, tato njippii ley tefaaje, nder lohol Adulam. Tawi sordaasiiɓe Filistiyankooɓe na koɗi ley naɗɗol Refayinkooɓe. 16 Daawda na heddinoo ley luuro hayre toon. Sordaasiiɓe Filistiyankooɓe du, na njooɗii ley Baytilaama. 17 Wari Daawda ɗomɗaa sanne de wi'i:
— Moy waawi heɓande kam ndiyam ɓunndu wonndu dammbugal Baytilaama faa mi yara?
18 Ndeen mawɓe konunkooɓe tato ɓeen kawtii carkowii hoɗorde Filistiyankooɓe ndeen. Ɓe ƴoogi ndiyam ɓunndu nduun, ɓe njeccodii ɓe kokki Daawda. Ammaa Daawda yaraay ɗam. O wecci ɗam e leydi, o sakkani ɗam Joomiraaɗo. 19 O wi'i:
— Laamɗo hiinam waɗude ko boni iri ɗum. Yalla mi yaran ƴiiƴam yimɓe sakkuɓe yonkiiji muɓɓen faa ngaddana kam ndiyam ɗam naa?
Sabo ɓe cakkii yonkiiji maɓɓe e yaade ittowa ɗam. O salii yarude ɗam.
Wo ɗum woni ko mawɓe sordaasiiɓe tato ɓeen ngaɗi.
20 Abisay, sakiike Yo'ab, laatinoo ardiiɗo worɓe 30 ɓeen. Wo oon ɓanti labbo muuɗum de yuwi yimɓe 300, wari ɗum'en nyannde wootere. Wo noon o laatorii innde anndeejo hakkunde ardiiɓe tato ɓeen. 21 Wo kanko ɓuri teddineede hakkunde mawɓe tato ɓeen de o laatii ardiiɗo muɓɓen ammaa o hewtaay tato arandeeɓe ɓeen. 22 Benaya, ɓii Yehoyada, gorko jom semmbe e cuusal mo wuro Kabseyel waɗiino innde wakkati konuuji. Wo kanko wari kaanankooɓe Mo'ab ɗiɗo tedduɓe, wooɗi du, wo kanko naati ley ɓunndu wari laddeeru nyannde jaangol manngol. 23 Wo kanko wari Misiranke mo darnde muuɗum hewtannoo meetereeji ɗiɗi e feccere oon. Misiranke oon na tiiginoo labbo ngo tekkeefi e njuuteefi muuɗum foti e leggal canyirgal. Ammaa kanko kaa, sawru tan o tiiginoo de o waawi o teeti labbo muuɗum o wariri ɗum. 24 Wo ɗuum woni ko Benaya ɓii Yehoyada waɗi de innde muuɗum mawni hakkunde mawɓe tato ɓeen. 25 Wo kanko ɓuri teddeengal hakkunde ardiiɓe sordaasiiɓe 30 ɓeen fuu. Ammaa o hewtaay ardiiɓe konunkooɓe Daawda tato innde anndeeɓe ɓeen. Daawda waɗi o laatii doomoowo ɗum mo ɓuri hoolaade.
26 Inan inɗe konunkooɓe mawɓe semmbiɗinɓe woɓɓe: Asahel, sakiike Yo'ab e Elhanan ɓii Dodo mo Baytilaama, 27 e Sammot, Harorinke e Heles, Peloninke 28 e Ira ɓii Ikkes, Tekowinke e Abiyejer, Anatotinke 29 e Sibbekay, Husatinke e Ilay, Ahohinke 30 e Maharay, Netofatinke e Heled ɓii Baana, Netofatinke 31 e Itay ɓii Ribay mo Gibeya ndi Benyaminkooɓe e Benaya, Piratoninke 32 e Huray mo bubbirɗi Ga'as e Abiyel mo ladde yoornde 33 e Asmawet, Baharuminke e Eliyaba, Saalboninke 34 e Hasem, Gisoninke e Jonatan ɓii Sage, Hararinke 35 e Ahiyam, ɓii Sakar, Hararinke e Elifal ɓii Uur 36 e Hefer, Mekeratinke e Ahiya, Peloninke 37 e Hesro, Karmelinke e Naaray ɓii Esbay 38 e Jowiila sakiike Natan e Mibihar ɓii Hagiri 39 e Selek, Amoninke e Naharay, Berotinke. Naharay oon ronndotonoo kaɓitirɗe Yo'ab, ɓii Seruya, 40 e Ira, Yitirinke e Gareb, Yitirinke 41 e Uriya, Hitiyanke e Jabad ɓii Alay 42 e Adina ɓii Sija, mo lenyol Ruben, ardiiɗo lenyol Ruben e worɓe 30 wonduɓe e muuɗum, 43 e Hanan ɓii Maaka e Yoosafat, Mitinitinke 44 e Ujjiya, Asteratinke e Sama e Yehiyel, ɓiɓɓe Hotam, Aroherinke 45 e Yedihayel, ɓii Simri e Yoha, Tisitinke sakiike muuɗum 46 e Eliyel, Mahawinke e Yeribay e Yosabiya ɓii Elnam e Yitima, Mo'abinke 47 e Eliyel e Obed e Yaasiyel mo Soba.