Keesuwal Laamɗo ley wuro Asdod e wuro Ekoron
5
1 Filistiya'en kooƴi keesuwal Laamɗo, ndilli nokkuure Ebeneser, njaari ngal nokkuure Asdod. 2 Ndeen Filistiya'en njaari keesuwal Laamɗo, nanni ngal suudu tooru wi'eteendu Dagon, njoƴƴini ngal ɗakkol Dagon. 3 Nde yimɓe Asdod umminoo law jaango majjum fu, ɓe tawi inan tooru Dagon nduun boɓɓake, sujidi yeeso keesuwal Joomiraaɗo ngaal. Ndelle, ɓe adi Dagon, ɓe njaari ɗum ɓe njoƴƴini ley nokkuure muuɗum. 4 Ammaa nde ɓe umminoo law jaango majjum katin fu, ɓe tawi inan tooru Dagon nduun boɓɓake, sujidi yeeso keesuwal Joomiraaɗo. Hoore Dagon e newe muuɗum fu taƴi na mbaalii to dammbugal suudu nduun. Ko heddii e Dagon ɗuum wo ɓanndu tan. 5 Ndelle almaami'en Dagon e naatooɓe suudu Dagon fuu, faa hannden ɓe njaaɓataa hakkunde dammbugal suudu Dagon ley wuro Asdod. Sanaa ɓe caaɓoo, sabo tooru Dagon nduun dow dammbugal ɗoon boɓɓinoo.6 Joonin junngo Joomiraaɗo teddani yimɓe Asdod, o tiinnani ɓe, o fiiri ɓe nyawu bannjaale,* yimɓe Asdod e seraaji muuɗum fuu. 7 Nde yimɓe Asdod njiinoo ɗum fuu, ɓe mbi'i:
— Keesuwal Laamɗo Israa'iila waawaa wondude e meeɗen, sabo junngo makko na torra en, enen e Dagon, alla meeɗen.
8 Ndeen ɓe nulani mawɓe Filistiya'en, ɓe kawriti e muɓɓen, ɓe ƴami:
— Noy ngatten keesuwal Laamɗo Israa'iila?
Ndeen ɓe mbi'i:
— Accee keesuwal Laamɗo Israa'iila waddee to wuro Gaat.
Ndelle ɓe adi keesuwal Laamɗo Israa'iila. 9 Nde ɓe adunoo ɗum ndeen, junngo Joomiraaɗo teddaniri ngalluure ndeen e wemmbere mawnde. O fiyi yimɓe ngalluure ndeen faa nyawu bannjaale nanngi ɓe, pamaro e mawɗo fuu. 10 Ndelle, ɓe nuldi keesuwal Laamɗo ngaal to wuro Ekoron.
Wakkati mo ngal yottinoo wuro Ekoron ndeen, yimɓe Ekoron mbulli, mbi'i:
— Ɓe ngaddii keesuwal Laamɗo Israa'iila to meeɗen faa wara en, enen e yimɓe men fuu!
11 Jonle ɓe nulani mawɓe Filistiya'en, ɓe kawriti e muɓɓen, ɓe mbi'i:
— Accee keesuwal Laamɗo Israa'iila, ngal yeccoo nokkuure muuɗum, faa taa ngal wara en, enen e yimɓe meeɗen.