Laamu Daawda
Haala maayde Sawulu
10
1 Filistiyankooɓe kaɓdi e Israa'iila. Sordaasiiɓe Israa'iila ndoggi faa kisina ko'e muɓɓen ammaa keewal hakkunde muɓɓen mbaraa dow waamnde Gilbo'a. 2 Filistiyankooɓe ɓeen ndiiwi Sawulu e ɓiɓɓe muuɗum. Ɓe mbari Jonatan e Abinadab e Malki-Suwa ɓiɓɓe muuɗum ɓeen. 3 Ndeen semmbe wolde ndeen fuu warti dow Sawulu. Fiɗooɓe kure njiiti o de kulol manngol nanngi o. 4 Ndeen Sawulu ŋaarii gorko tiiginooɗo kaɓitirɗe muuɗum wi'i:— Soortu kaafaahi maaɗa njuwaa kam mbaraa, taa ɓe taadaaka ɓee ngara njalnoroo kam.
Ammaa gorko oon jaɓaay yuwude o sabo na wondunoo e kulol manngol. Ndeen Sawulu tikitii labbo e reedu muuɗum de saami dow maggo. 5 Nde tiiginooɗo kaɓitirɗe makko oon yi'unoo o maayi fu, kam du tikitii kaafaahi, waritii. 6 Noon Sawulu e ɓiɓɓe muuɗum worɓe tato e suudu muuɗum fuu maayiri nde wootere. 7 Nde Israa'iilankooɓe jooɗinooɓe ley naɗɗol nji'unoo sordaasiiɓe muɓɓen njaalaama, wooɗi du Sawulu e ɓiɓɓe muuɗum fuu maayii ndeen, ndoggi njoppi galluuje muɓɓen. Ndeen Filistiyankooɓe ngari njooɗii nokkuuje maɓɓe.
8 Jaangoore majjum, Filistiyankooɓe ngari faa njana kujje waraaɓe ɓeen. Ndeen ɓe tawi ɓanndu Sawulu e ɓiɓɓe muuɗum na mbaalii dow waamnde Gilbo'a. 9 Ɓe taƴi hoore makko, ɓe kooƴi kaɓitirɗe makko. Ɓe ngooynii kabaaru majjum ley leydi Filistiyankooɓe fuu. Ɓe kaalani ɗum tooruuji maɓɓe e yimɓe leydi ndiin fuu. 10 Ɓe ngatti kaɓitirɗe Sawulu ley suudu allaaji maɓɓe de ɓe tonti le'al hoore muuɗum ley suudu Dagon.
11 Nde yimɓe Yaabes-Gileyat fuu nanunoo ko Filistiyankooɓe ngaɗi Sawulu ndeen, 12 konunkooɓe semmbiɗinɓe fuu ummii kooƴowi ɓanndu Sawulu e ɓiɓɓe muuɗum njaari Yaabes-Gileyat. Ɓe uwi ƴi'e muɓɓen ley lekki mawki tawaaki toon kiin de ɓe cuumorii balɗe jeɗɗi.
13-14 Sawulu maayi saabe ɗowtanaaki Joomiraaɗo, reenaay konngol muuɗum, wooɗi du yoppii Joomiraaɗo de waɗowi ndaarngal to gollidoowo e ginnaaji. Joomiraaɗo du wari o faa hokka Daawda ɓii Yesa laamu.