Daawda e Batseeba
11
1 Wakkati gataaje fu, kaanankooɓe mburtoto faa kaɓowee. Wo wakkati oon Daawda nulii Yo'ab e maccuɓe mum e sordaasiiɓe Israa'iila fuu, faa ɓe kaɓa e Amoninkooɓe. Ɓe njehi, ɓe kalki ɗum'en. Ndeen ɓe piilii wuro Rabba.Daawda kaa yahaay. Imo heddii Urusaliima. 2 Nyannde gomma, wakkati laasara peewɗo, Daawda ummii e leesom na waancoo dow suudu mum laamordu. Illa e dow suudu toon o yi'i debbo gomma na lootoo. Debbo oon na ŋarɗi sanne. 3 Daawda nuli faa humpitoo kabaaru debbo oon. O wi'aa:
— Oon wo Batseeba, ɓii Eliyam, dee Uriya Hitiyankeejo.
4 Daawda nuli nelaaɓe ngadda mo. O wari to muuɗum de fukkodii e makko. (Tawi ɓooyaay ko debbo oon laamnunoo hoore mum e tuunndi mum.) De o hooti.
5 Debbo oon hooƴi reedu. O nuli e Daawda, o wi'i o hooƴii reedu.
6 Ndelle Daawda nuli e Yo'ab, wi'i nuldee Uriya Hitiyankeejo oon. De Yo'ab nuldi mo Daawda. 7 Nde Uriya warnoo to Daawda ndeen, Daawda ƴami mo kabaaru Yo'ab, e kabaaru yimɓe e wolde ndeen. 8 Caggal ɗuum Daawda wi'i Uriya:
— Hootu suudu maaɗa, lootaa koyɗe maa, powtaa.
Uriya wurtii suudu kaananke de kaananke nuldi mo dokkal caggal makko. 9 Ammaa Uriya hootaay suudu muuɗum. O waali to dammbugal suudu laamordu, to maccuɓe kaananke fuu mbaalata toon.
10 Caggal ɗuum, Daawda humpitaa Uriya hootaay wuro mum. Ndelle Daawda ƴami Uriya:
— Wanaa to woɗɗi ƴuuruɗaa naa? Ko waɗi a hootaay?
11 Uriya wi'i Daawda:
— Keesuwal Amaana Laamɗo e yimɓe Israa'iila e Yahuuda na njooɗii ley hukumuuji de joomam Yo'ab e worɓe mum na ndaaki ley njaayri. Noy mbaawrumi hootude faa mi nyaama mi yara mi fukkodoo e deekam? Mi hunorake nguurndam maaɗa mi waɗataa noon koy!
12 Ndeen Daawda wi'i mo:
— Jooɗa ɗo hannden, de jaango mi yoppete njeccoɗaa wolde.
Ndelle Uriya jooɗii ley Urusaliima nyannde ndeen e jaango majjum. 13 Daawda noddi mo, o nyaamdi e muuɗum o yardi e muuɗum. Daawda waɗi faa o sulii. Ammaa e noon fuu, Uriya hootaay wuro muuɗum. Nde naange hiirnoo ndeen, o wurtii de o fukkii hakkunde maccuɓe joomiiko.
14 Jaango majjum Daawda winndani Yo'ab ɓataaki, hokki Uriya yaara. 15 Ley ɓataaki kiin o winndi, o wi'i:
— Ngatton Uriya e orol yeesowol to haɓo ɓuri fuu wulude. Ndeen toowton gaɗa makko faa o fiyee faa o maaya.
16 Ndelle ko Yo'ab fiildi ngalluure ndeen sordaasiiɓe muuɗum ɗuum, o heedini Uriya to o anndi habdiiɓe maɓɓe ɓurɓe semmbe ngoni. 17 Worɓe ngalluure ndeen mburtii de kaɓi e Yo'ab. Woɓɓe hakkunde sordaasiiɓe Daawda caami, Uriya Hitiyankeejo oon du maayi.
— Si a tilake e hokkude kaananke kabaaruuji wolde nde, 20 hasii kaananke ɓernan de ƴame, «Ko waɗi takkiɗon e ngalluure ndeen faa kaɓeɗon? Wanaa on paamii ɓe piɗan kure e dow kokuwol ngalluure ndeen naa? 21 On miccitaaki wo hono noon Abimelek ɓii Yerubeset wardanoo? Wanaa debbo gonɗo dow kokuwol limnii hayre niisirde dow makko faa o maayi to wuro Tebes naa? Ko waɗi ndelle takkiɗon e kokuwol ngool?»
Si kaananke wi'ii noon fu, mbi'aa mo, «Maccuɗo maaɗa Uriya Hitiyankeejo du maayii.»
22 Nulaaɗo oon yehi, nde yottinoo ndeen humpiti Daawda fuu ko Yo'ab nuli mo o wi'a ɗuum. 23 Nulaaɗo oon wi'i Daawda:
— Worɓe ɓeen keɓii semmbe, ɓe ngarii to amin to njaayri. Ammaa min ndiiwii ɓe faa e dammbugal ngalluure. 24 Ndeen fiɗooɓe kure piɗi maccuɓe maaɗa to dow kokuwol ngool. Woɓɓe hakkunde maccuɓe maaɗa maayii. Maccuɗo maaɗa Uriya Hitiyankeejo du maayii.
25 Daawda wi'i nulaaɗo oon:
— Mbi'aa Yo'ab taa ɗum fuu ɗum metta ɗum ɓernde. Sabo si kaafaahi taƴaay o fu, taƴan o. Ɓeyɗon haɓo mooɗon e dow ngalluure ndeen, de kalkon nde. Cemmbiniraa ɓernde Yo'ab hono nii.
26 Dee Uriya oon nani gorum maayii, de woyi ɗum. 27 Caggal o sudditake ndeen, Daawda nuli o waddee to suudu muuɗum de o laatii deekum, o rimani ɗum suka gorko.
Ammaa huunde nde Daawda waɗi ndeen welaay Joomiraaɗo.