Haala konngi sappo ɗiin
5
1 Muusaa noddi yimɓe Israa'iila fuu de wi'i ɗum'en: Onon Israa'iilankooɓe, kettinee jamirooje e sariyaaji ɗi kollammi on hannden. Ekitoɗon ɗi de ngaɗon ko ɗi mbi'i.2 Laamɗo Joomiraaɗo meeɗen waɗidii e meeɗen amaana nde ngonnoɗen waamnde Sinayi. 3 Wanaa e maamiraaɓe meeɗen tan Joomiraaɗo waɗidinnoo amaana oon, wo e meeɗen, enen wuurɓe wonɓe ɗo joonin ɓeen. 4 Joomiraaɗo haaldii e meeɗen hunnduko e hunnduko dow waamnde Sinayi hakkunde yiite. 5 Wakkati oon miɗo darinoo hakkunde Joomiraaɗo e mooɗon faa mi yottina on konngol muuɗum ngool sabo oɗon kulannoo yiite ngeen de saabe ɗuum on ƴeenyaay waamnde ndeen. Inan ko o wi'i:
7 Taa ngoodon alla goɗɗo si wanaa miin.
8 Taa ngaɗanon ko'e mooɗon tooruuji nanndinaaɗi e ko woni dow kammu naa e leydi naa ley ndiyam.
9 Taa kofoɗon yeeso kujje ɗeen, wooɗi du, taa ɗowtanoɗon ɗe sabo miin Laamɗo Joomiraaɗo mooɗon oon wo mi Laamɗo keewɗo kiram. Mi kiitotooɗo ɓiɓɓe saabe hakkeeji baabiraaɓe muɓɓen faa hewta taaniraaɓe e jaatiraaɓe wanyuɓe kam ɓeen. 10 Ammaa yiɗuɓe kam de na ɗowtanoo jamirooje am ɓeen kaa, mi hinnoto ɗum'en faa hewta jamaanuuji ujunere.
11 Taa noddon innde am ɓolum, miin Laamɗo Joomiraaɗo mooɗon, sabo mi accataa pijirɗo innde am ɓolum.
12 Kakkilanon nyalaande fowteteende ndeen. Nde laatanoo on seniinde fodde no Laamɗo Joomiraaɗo mooɗon yamiri. 13 Ngolliron balɗe jeegom, timminon ko ngollaton fuu. 14 Ammaa nyalaande jeɗɗaɓerde ndeen kaa, wo nyannde fowteteende saabe Laamɗo Joomiraaɗo mooɗon. Taa ngollon faa'e onon e ɓiɓɓe mon worɓe e rewɓe e maccuɓe mon e horɓe mon e na'i mon e araaji mon e daabaaji mon laatiiɗi fuu e jananɓe jooɗiiɓe ley galluuje mooɗon faa maccuɓe mon e horɓe mon ɓeen keɓa powtiri hono no mooɗon noon. 15 Miccitoɗon on laatakeno maccuɓe leydi Misira de Laamɗo Joomiraaɗo mooɗon wurtiniri on semmbe mawɗo. Saabe ɗuum de Laamɗo Joomiraaɗo mooɗon yamiri on kakkilanon nyalaande fowteteende ndeen.
16 Teddinon baabiraaɓe mon e inniraaɓe mon hono no Laamɗo Joomiraaɗo mooɗon yamiri on noon faa balɗe mooɗon njuuta de keɓon barke ley leydi ndi o hokkata on ndiin.
17 Taa ngaɗon war-hoore.
18 Taa ngaɗon jeenu.
19 Taa mbujjon.
20 Taa ceedanoɗon goɗɗo fewre.
21 Taa muuyon dee goɗɗo. Taa eelon suudu goɗɗo naa ngesa mum naa maccuɗo mum naa korɗo mum naa nagge mum naa araawa mum naa huunde fuu ko jeyi.
22 Wo haalaaji ɗii, Joomiraaɗo hokki jamaare Israa'iila dow waamnde hakkunde yiite e ruulde e nimre tekkunde. O haaliri ɗi daande toownde, o ɓeydaay faa'e. O winndii ɗi dow alluuje kaaƴe ɗiɗi de o hokki kam.
No Muusaa yottiniri Israa'iilankooɓe konngol Joomiraaɗo
23 Wakkati nanunoɗon daande nder nimre tekkunde, tawi waamnde ndeen fuu na huɓɓa yiite, onon ardiiɓe lenyi e mawɓe tawaaɓe hakkunde mooɗon fuu ɓattitiɗon kam. 24 Ndeen mbiiɗon:
— Laamɗo Joomiraaɗo meeɗen hollii min teddeengal e manngu muuɗum. Min nani daande makko nder yiite. Hannden, min nji'i ko Laamɗo na waawi haaldude e tagaaɗo de joomum heddoo na wuuri. 25 Joonin le, saabe ɗume de miɗen maaya? Sabo yiite mannge ngee nyaaman min! Si miɗen keddii miɗen nana daande Laamɗo Joomiraaɗo meeɗen ndeen fu sikke walaa, min maayan. 26 Moy heɓi nanude daande Laamɗo Buurɗo na haala nder yiite hono no amin ni de heddodii e yonki? 27 Ndelle ɓatta, aan Muusaa, kettindoɗaa ko Laamɗo Joomiraaɗo meeɗen wi'ata fuu. Wo aan hollata min ko Laamɗo Joomiraaɗo meeɗen oon wi'i fuu. Min kettinto, wooɗi min ngaɗan ko o wi'i fuu.
28 Joomiraaɗo nanii ko mbiiɗon kam ɗuum de wi'i kam:
— Mi nanii ko jamaare ndeen wi'i ma. Ko ɓe mbi'i ɗuum na wooɗi. 29 Si kulol am ngool waawuno heddaade ley ɓerɗe maɓɓe faa ɓe ɗowtanoo jamirooje am nyannde fuu, ndeen ɓe keɓanno wuurude e jam kamɓe e ɓiɓɓe maɓɓe fuu faa abada. 30 Yahu, mbi'aa ɓe ɓe njeccoo ley hukumuuji maɓɓe. 31 Ammaa aan kaa, keddodoɗaa e am ɗo faa mi hokke jamirooje e sariyaaji e kiite ko ekintintaa ɓe faa ɓe ngaɗa ko mbiimi ley leydi ndi kokkammi ɓe, laatoo ndongu maɓɓe ndiin.
32 Muusaa wi'i ɓe: