No haaniri Israa'iilankooɓe njiɗira Joomiraaɗo
6
1 Inan jamirooje e sariyaaji e kiite ɗe Laamɗo Joomiraaɗo mooɗon yamiri njanngineɗon faa ɗowtanoɗon ko wi'i ley leydi ndi ponndiɗon faa laatoo jeyal mooɗon ndiin. 2 Noon waɗata faa kulon Laamɗo Joomiraaɗo mooɗon de ndeenon sariyaaji e jamirooje ɗe ekintinammi on ɗeen haddi nguurndam mon fuu, onon e ɓiɓɓe mon e taaniraaɓe mon faa balɗe mooɗon njuuta. 3 Ndelle onon Israa'iilankooɓe, kettindoɗon faa wooɗa de tinnoɗon ngaɗon ko yamiraa faa keɓon jam, ɓeydoɗon keewon fodde no Laamɗo Joomiraaɗo maamiraaɓe mooɗon wi'iri on laatoyto ley leydi ndi kosam e njuumndi ilata e muuɗum ndiin.4 Hettinda Israa'iila, Laamɗo Joomiraaɗo meeɗen oon tan woni Joomiraaɗo*. 5 Njiɗiraa, Laamɗo Joomiraaɗo maaɗa e ɓernde maa fuu e yonki maa fuu e semmbe maa fuu. 6 Jamirooje ɗe kokkammi ma hannden ɗeen, keddoo ley ɓernde maaɗa. 7 Njannginaa ɗe ɓiɓɓe maaɗa, kaalaa haala majje nde njooɗiɗaa ley ɓaade maaɗa, nde njahataa e laawol, nde pukkotoɗaa e nde ummotoɗaa fuu. 8 Kaɓɓaa ɗe e juuɗe maaɗa hono maande, ɗe ngona dow tiinde maaɗa. 9 Mbinndaa ɗe dow bimmbeeje dammbugal suudu maaɗa e dow dammbuɗe galluuje maaɗa.
10 Nde Laamɗo Joomiraaɗo mooɗon nannowi on leydi ndi hunaninoo maamiraaɓe mooɗon Ibrahiima e Isiyaaka e Yaakuuba hokkan on ndiin fu, on tawan galluuje lobbe mawɗe ɗe on nyiɓaay. 11 On tawan cuuɗi keewɗi ko wooɗi ɗi on kebbinaay e ɓulli ndiyam ɗi on mbasaay e gese inabooje* e leɗɗe jaytun ɗe on tiiraaki. Nde nyaamoyɗon kaaruɗon fu, 12 tinnoɗon taa njeggiton Joomiraaɗo burtinɗo on leydi Misira, ley suudu maccangaaku oon.
13 Kulon Laamɗo Joomiraaɗo mooɗon. Wo oon ɗowtantoɗon wooɗi du, e innde makko kunortoɗon. 14 Taa ndewon allaaji goɗɗi hakkunde allaaji lenyi piiliiɗi on ɗiin, 15 sabo Laamɗo Joomiraaɗo mooɗon gonduɗo e mooɗon oon wo Laamɗo keewɗo kiram. Ndelle taa umminee tikkere makko dow mooɗon sabo o halkan on, o fiɗɗan on e duuniyaaru. 16 Taa ndaartinoɗon Laamɗo Joomiraaɗo mooɗon hono no ngaɗirɗon nde njooɗinoɗen wuro Massa noon. 17 Tinnoɗon e ɗowtanaade jamirooje makko, kakkilanon kiite makko e sariyaaji makko fodde no o yamiri on noon. 18 Ngaɗon ko dartii, ko wooɗi yeeso Joomiraaɗo faa keɓon jam de naaton leydi lobbiri ndi hunaninoo maamiraaɓe mooɗon ndiin. 19 O riiwan wayɓe on fuu yeeso mooɗon fodde no o wi'iri noon.
20 Si ley ko warata ɓiɓɓe mooɗon ƴamowii on mbi'i:
— Ɗume kiite e jamirooje e sariyaaji, ɗi Laamɗo Joomiraaɗo meeɗen hokki on ɗiin njiɗi wi'ude?
21 Ndeen njaaboɗon ɓe mbi'on:
— Enen, en laatakeno maccuɓe Fira'awna, kaananke leydi Misira, ammaa Joomiraaɗo wurtinirii en leydi ndiin e semmbe mawɗo. 22 E gite amin o fiiri Fira'awna e leydi muuɗum e suudu muuɗum fuu maandeeji e kaayeefiiji mawɗi kulɓiniiɗi sanne. 23 O wurtini en toon faa o wadda en leydi ndi o hunaninoo maamiraaɓe men o hokkan en ndiin. 24 Joomiraaɗo yamirii ɗowtanoɗen jamirooje ɗee fuu de kulen ɗum kam Laamɗo Joomiraaɗo meeɗen oon faa keɓen jam nyannde fuu de mbuuren hono no njooɗoriɗen hannden noon. 25 Ndelle en laatoto dartiiɓe si en tinnake e ɗowtanaade jamirooje ɗe Laamɗo Joomiraaɗo meeɗen hokki en ɗeen fuu.