No Israa'iila laatorii lenyol Joomiraaɗo ceniingol
7
1 Laamɗo Joomiraaɗo mooɗon nannan on leydi ndi kuccuɗon faa laatoo ndongu mooɗon ndiin. Nde ɓattowiɗon ndi fu, o riiwan lenyi keewɗi yeeso mooɗon, ɗum woni Hitiyankooɓe e Girgasinkooɓe e Amorinkooɓe e Kanaaninkooɓe e Perisinkooɓe e Hewinkooɓe e Yebusinkooɓe, lenyi jeɗɗi ɓurɗi on ɗuuɗude e semmbe ɗiin. 2 O wattan ɗi e juuɗe mooɗon de kalkon ɗi faa ɗi timma. Taa kaɓɓidon e maɓɓe amaana, wooɗi du taa njurmoɗon ɓe. 3 Taa ɓanngal hawta on e maɓɓe. Taa kokkon ɓiɓɓe mon rewɓe ɓiɓɓe maɓɓe worɓe, wooɗi du, taa ɓaŋanon ɓiɓɓe mon worɓe ɓiɓɓe maɓɓe rewɓe. 4 Sabo ɓe mboɗɗinan ɓiɓɓe mon worɓe ɓeen Joomiraaɗo, ɓe ngaɗan ndewa allaaji goɗɗi de tikkere muuɗum ummanoo on. Ndeen o halka on ley maƴƴaango yitere. 5 Inan no haani ngaɗon ɓe: kalkon cakkirɗe maɓɓe, kelon kaaƴe maɓɓe tooruuji, keltoɗon leɗɗe maɓɓe darnaaɗe ɗe tooru Asera ɗeen. Mbulon tooruuji maɓɓe ɗiin fuu. 6 Saabe wo on lenyol ceniingol yeeso Laamɗo Joomiraaɗo mooɗon, de kam du suɓii on faa laatoɗon jeyal muuɗum korsungal hakkunde lenyi adunaaru fuu.No Joomiraaɗo reenirta amaana muuɗum
7 Wanaa saabe oɗon ɓuri lenyi keddiiɗi fuu ɗuuɗude de Joomiraaɗo suɓii on, haɓɓondiri e mooɗon, sabo oɗon anndi onon ɓuri lenyi keddiiɗi ɗiin fuu famɗude. 8 Ammaa wo saabe Joomiraaɗo na yiɗi on, wooɗi du, na haajaa tabintinde hunayeere nde hunaninoo maamiraaɓe mooɗon. O rimɗini on, o wurtiniri on semmbe mawɗo leydi Misira, ley suudu maccangaaku e junngo kaananke Fira'awna.
9 Ndelle annditon wo Laamɗo Joomiraaɗo mooɗon oon kam tan woni Laamɗo. Oon woni Laamɗo koolniiɗo, tabintinoowo amaana muuɗum e hinney muuɗum to yiɗuɓe ɗum de ɗowtanii jamirooje muuɗum faa hewta jamaanuuji ujunere. 10 Ammaa wanyuɓe mo ɓeen kaa, o yoɓtorto ɗum'en halkere. Ɓooyataa o yoɓtaaki wayɓe mo ɓeen. 11 Ndelle kakkilanon jamirooje e kiite e sariyaaji ɗi ekintinammi on hannden ɗiin faa ngaɗon ko ɗi mbi'i.
12 Si on kettindake jamirooje ɗeen, on tinnake e waɗude ko mbi'i fu, Laamɗo Joomiraaɗo mooɗon tabintinan amaana e hinney muuɗum mo hunaninoo maamiraaɓe mooɗon oon. 13 O yiɗan on, o barkina on de o ɗuunna on. O barkinan ɓeyngu mooɗon, wooɗi du, o barkinan alkama mon e inaboojam mon e nebbam mon, e ɓiɓɓe gese mon fuu. Daabaaji mon pamari e mawɗi fuu ngaɗan barke ley leydi ndi o hunanii maamiraaɓe mon o hokkan on ndiin. 14 On ɓuran lenyi adunaaru keddiiɗi fuu barkineede. Dimaro fuu tawataake hakkunde mooɗon naa hakkunde daabaaji mooɗon. 15 Joomiraaɗo woɗɗinan on e nyawuuji. O jukkortaako on fay ngootu e nyawuuji daaɓooji ɗi anndunoɗon leydi Misira ɗiin. To wayɓe on ɓeen tan o neldata ɗi. 16 Kalkon lenyi ɗi Laamɗo Joomiraaɗo mooɗon watti e juuɗe mon ɗiin fuu. Taa njurmoɗon ɓe, taa ɗowtanoɗon allaaji maɓɓe sabo ɗuum laatanto on tuugol.
No Joomiraaɗo reenirta yimɓe muuɗum
17 Si on mbi'ii e ɓerɗe mooɗon:
— Lenyi ɗii na ɓuri en ɗuuɗude. Noy mbaawirten teetude leydi maɓɓe?
18 Taa kulon ɓe. Miccitee ko Laamɗo Joomiraaɗo mooɗon waɗi Fira'awna e leydi Misira fuu. 19 On njiiri gite mon torraaji mawɗi e maandeeji e kaayeefiiji e semmbe mawɗo nde Laamɗo Joomiraaɗo mooɗon wurtinannoo on ndeen. Wo noon o waɗata lenyi ɗi kuloton ɗiin fuu. 20 Laamɗo Joomiraaɗo mooɗon oon neldan jabbatti kalka ɓe faa tukka heddinooɓe na cuuɗii on ɓeen fuu. 21 Taa ɓerɗe mon ndiwna saabe maɓɓe sabo Laamɗo Joomiraaɗo mooɗon gonɗo hakkunde mon oon, wo Laamɗo mawɗo, kulɓiniiɗo. 22 O riiwiran lenyi ɗiin fuu seeɗa seeɗa yeeso mooɗon. On mbaawataa halkude ɓe wakkati gooto sabo kujje ladde nyannguɗe ɗuuɗan ɓura on semmbe. 23 Laamɗo Joomiraaɗo mooɗon wattan ɓe e juuɗe mooɗon. O waɗan wemmbere mawnde saama dow maɓɓe faa ɓe fuu ɓe kalka. 24 O wattan kaanankooɓe maɓɓe e juuɗe mooɗon de kalkon ɗum'en faa inɗe muɓɓen lalla lay. Fay gooto waawataa daraade yeeso mooɗon faa ɓe fuu ɓe timma.
25 Mbulon tooruuji maɓɓe ɗiin. Taa eelon kaŋŋe naa cardi ko woni dow tooruuji ɗiin. Taa kooƴanon ɗum ko'e mooɗon sabo iɗum waawi laatanaade on tuugol. Wo ɗe kujje karmuɗe yeeso Laamɗo Joomiraaɗo mooɗon. 26 Taa ngaddon ko harmi ley cuuɗi mooɗon sabo on laatoto harmuɓe hono majjum de kalkeɗon. Ndaardon ɗum ko harmi, ko newnii sabo wo ko halketee.