No Joomiraaɗo ne'iri Israa'iilankooɓe ley ladde yoornde
8
1 Tinnoɗon e ɗowtanaade jamirooje ɗe ekintinammi on hannden ɗeen fuu faa mbuuron, keewon wooɗi du naaton leydi ndi Joomiraaɗo hunaninoo maamiraaɓe mon hokkan ɗum'en ndiin. 2 Miccitoɗon laawol ngol Laamɗo Joomiraaɗo mooɗon rewni on gilla duuɓi 40 nder ladde yoornde, to yarni on torraaji feere feere faa anndita ko woni e ɓerɗe mooɗon de faama yalla on ɗowtanto jamirooje muuɗum naa on ɗowtantaako ɗe. 3 Ndelle o yarnii on torra, o rafii on de o nyaamni on manna, nyaamdu ndu onon e maamiraaɓe mooɗon fuu anndaano faa o holla on ko wanaa buuru tan neɗɗo wuurdata ammaa na wuurda ko wurtii e hunnduko Joomiraaɗo fuu. 4 Ley duuɓi 40 ɗiin fuu, kolte mon kiinɗaay, koyɗe mon du, ɓuutaay. 5 Ndelle paamon Laamɗo Joomiraaɗo mooɗon na eeltira on hono no baabiiwo eeltirta ɓiyum noon. 6 Njogitoɗon jamirooje makko, ndewon laabi makko, kulon innde makko.7 Sabo Laamɗo Joomiraaɗo mooɗon nannan on leydi lobbiri, ndi gooruuji mawɗi e ilduɗe ndiyam mbubboojam ley naɗɗi e dow baamle. 8 Leydi keewndi alkama e sa'iiri e inabooje e ƴibbe e rummaneeje e nebbam jaytun e njuumndi. 9 Ley leydi ndiin, on nyaaman kaaron wooɗi faa'e nyakataa on. Kaaƴe leydi ndiin na keewi njamndi ɓaleeri. On ittan njamndi mboɗeeri ley baamle mayri. 10 Nde nyaamoyɗon kaaruɗon fu, njetton Laamɗo Joomiraaɗo mooɗon saabe leydi lobbiri ndi hokki on ndiin.
11 Kakkilon, taa njeggiton Laamɗo Joomiraaɗo mooɗon de kunngoɗon ɗowtanaade jamirooje e kiite e sariyaaji muuɗum fodde no ekintinirammi on hannden noon. 12 Nde nyaamoyɗon kaaruɗon de nyiɓanɗon ko'e mooɗon cuuɗi lobbi, 13 nde na'i mon e baali mon e be'i mon ɗuuɗowi de kebbinɗon kaŋŋe e cardi, nde jawdi mon laatiindi fuu heewowi fu, 14 kakkilon taa mawninkinoɗon de njeggiton Laamɗo Joomiraaɗo mooɗon, burtinɗo on leydi Misira, ley suudu maccangaaku oon. 15 O rewinii on ley ladde yoornde mawnde hulɓiniinde, nder leydi keewndi bolle e jahe ɗe tooke, ley leydi njoorndi to ɗomka de tawi on ngalaa ndiyam. O yaltinanii on ndiyam nder tuntere faa njaron. 16 Ley ladde yoornde ndeen o nyaamnii on manna, nyaamdu ndu maamiraaɓe mooɗon anndaano faa o ndaartindoroo on torra de sakitoo o hokka on jam ley ko warata. 17 Kakkilon taa mbi'on:
— Wo semmbe e baawɗe amin min keɓiri jawdi ndii fuu.
18 Miccitoɗon Laamɗo Joomiraaɗo mooɗon sabo wo kam hokkata on semmbe mo keɓirton jawdi ndiin fuu. Noon o tabintinirta amaana mo o waɗidinnoo e maamiraaɓe mooɗon, hono no worri hannden ni.