Moƴƴere nde Israa'iila haandaano
9
1 Kettinee, onon Israa'iilankooɓe! Hannden on peƴƴitan Urdun faa teeton leyɗe ɓurɗe on manngu e semmbe, galluuje mawɗe piilniraaɗe kokuuji toowɗi faa na tukkowi kammu ɗeen. 2 On njeytan leydi tagaako mawko, ko darɗe toowɗe, Anakinkooɓe ɓe annduɗon, ɓe nanuɗon haala muɓɓen na wi'ee: «Moy waawi daraade yeeso Anakinkooɓe?»3 Ndelle paamon hannden, Laamɗo Joomiraaɗo mooɗon na ardii on hono yiite nyaamoowe. Wo kam halkata ɓe, leeƴina ɓe yeeso mooɗon. On teetan leydi maɓɓe de kalkon ɓe law fodde no Joomiraaɗo wi'iri on noon.
4 Nde Laamɗo Joomiraaɗo mooɗon riiwoy ɓe yeeso mooɗon fu, taa mbi'on ley ɓerɗe mon:
— Wo saabe min dartiiɓe waɗi de Joomiraaɗo hokki min leydi ndii faa laatoo ndongu amin!
Sabo wo saabe bonde lenyi ɗiin de Joomiraaɗo na teeta leydi muɓɓen yeeso mon. 5 Wanaa saabe dartaare mooɗon e laaɓal ɓerɗe mon waɗi de oɗon njeyta leydi maɓɓe, ammaa wo saabe bonde lenyi ɗiin de Laamɗo Joomiraaɗo mooɗon teeti ɗi yeeso mon faa tabintina hunayeere nde hunaninoo maamiraaɓe mon Ibrahiima e Isiyaaka e Yaakuuba. 6 Ndelle paamon wanaa saabe dartaare mooɗon waɗi de Laamɗo Joomiraaɗo mooɗon na hokka on leydi lobbiri ndiin faa laatoo ndongu mooɗon sabo wo on lenyol cattungol.
No Israa'iilankooɓe luttiri saabe waɗude ngaari kaŋŋe
7 Taa njeggiton, miccitoɗon on umminii ɓernde Laamɗo Joomiraaɗo mooɗon ley ladde yoornde gilla nyannde mburtinoɗon leydi Misira faa nyannde njottinoɗon nokkuure ndee, on celaay muurtande o. 8 Nde ngonnoɗon Sinayi* ndeen, on umminii ɓernde Joomiraaɗo de kam du tikkani on faa nesi timminde on. 9 Nde ƴeenyunoomi waamnde faa mi jaɓa alluuje kaaƴe, ɗum woni ɗe amaana mo Joomiraaɗo waddi e mooɗon ɗeen, keddiimi dow toon faa waɗi nyaloomaaji 40 e jemmaaji 40, mi nyaamaay, mi yaraay. 10 Joomiraaɗo hokkii kam alluuje kaaƴe ɗiɗi ɗe winndiri e honndu muuɗum fodde haalaaji ɗi haaldunoo on dow waamnde nder yiite nyannde kawrital ndeen. 11 Wo gaɗa nyaloomaaji 40 e jemmaaji 40 Joomiraaɗo hokki kam alluuje kaaƴe ɗiɗi, ɗum woni alluuje amaana ɗeen. 12 Ndeen Joomiraaɗo wi'i kam:
—Njippoɗaa law sabo yimɓe ma ɓe mburtinɗaa leydi Misira ɓeen ngaɗii ko boni. Ɓe njaawii tottitaade laawol ngol njamirmi ɓe tokka ngool, ɓe ngaɗani ko'e maɓɓe tooru njamndi ciiwaandi.
13 Joomiraaɗo ɓeydi wi'i kam:
— Mi yi'i lenyol ngool. Si goonga, wo ngol joorngol hoore. 14 Accaa mi halka ɓe, mi mooyta innde maɓɓe ley duuniyaaru de mi waɗe aan lenyol ɓurngol ɓe semmbe e ɗuuɗal.
15 Ndeen njippiimi dow waamnde ndeen, miɗo tiigii alluuje amaana ɗiɗi ɗeen e juuɗe am, waamnde ndeen fuu na huɓɓa yiite. 16 Nde ndaarunoomi fu, nji'umi on ngaɗii hakke yeeso Laamɗo Joomiraaɗo mooɗon. On ngaɗanii ko'e mon ngaari njamndi ciiwaandi. On njaawii tottitaade laawol ngol Joomiraaɗo yamiri tokkon ngool. 17 Ndeen ɓantumi alluuje ɗe tiiginoomi e juuɗe am ɗeen de paɗɗumi ɗe, ɗe pusi yeeso mooɗon.
No Muusaa waɗiri du'aare
18 Wakkati oon kippiimi e leydi yeeso Joomiraaɗo hono no puɗɗam noon. Nyaloomaaji 40 e jemmaaji 40 mi nyaamaay mi yaraay saabe hakkeeji ɗi ngaɗuɗon sabo on umminirii ɓernde Joomiraaɗo e hakkeeji ɗi ngaɗoton ɗiin. 19 Mi huliino tikkere Joomiraaɗo e nyanngere muuɗum wakkati ummaninoo on faa muuyi halkude on ndeen. Ammaa Joomiraaɗo hettindanake kam wakkati oon du. 20 Joomiraaɗo ɓernaniino Haaruuna sanne faa nesi warude ɗum, ammaa mi du'anake ɗum wakkati oon. 21 Ndeen kooƴumi huunde harmunde nde ngaɗuɗon ndeen, ɗum woni ngaari ndiin, de paɗɗumi ɗum ley yiite, pusumi ɗum, niisumi ɗum faa laatii conndi, ndeen paɗɗumi ɗum ley gooruwol jipportoongol waamnde ndeen.
22 On umminii ɓernde Joomiraaɗo ley wuro Tabera e Massa e Kibirot-Hataawa. 23 Nde ngonnoɗon Kades-Barneya ndeen, Joomiraaɗo nelii on, wi'i:
— Njehee njeytowee leydi ndi kokkumi on ndiin.
Ndeen muurtanɗon jamirooje Laamɗo Joomiraaɗo mooɗon, on koolaaki ɗum, on kettindanaaki ɗum. 24 Oɗon laatii muurtanooɓe Joomiraaɗo gilla nyannde anndunoomi on.
25 Ndeen caamumi yeeso Joomiraaɗo, keddiimi miɗo hippii e leydi nyaloomaaji 40 e jemmaaji 40 sabo Joomiraaɗo haaliino halkan on. 26 Ngaɗumi du'aare to Joomiraaɗo mbiimi:
— Yaa Laamɗo Joomiraaɗo, taa halku ndongu maaɗa, yimɓe maaɗa ɓe kisinirɗaa manngu maaɗa, ɓe mburtinirɗaa leydi Misira e semmbe mawɗo. 27 Miccita maccuɓe maaɗa Ibrahiima e Isiyaaka e Yaakuuba. Taa ndaaru njooram hooraaku e bonde e hakke lenyol ngol. 28 Taa yimɓe leydi ndi mburtinɗaa min ndiin mbi'a: «Joomiraaɗo walaano baawɗe nannude ɓe leydi ndi aadaninoo ɓe ndiin, naa saabe na wanyi ɓe de wurtini ɓe leydi Misira faa halka ɓe ley ladde yoornde.» 29 Ammaa wo ɓe ndongu maaɗa, yimɓe maa ɓe mburtinirɗaa baawɗe maaɗa e semmbe mawɗo.