No Joomiraaɗo yaaforii Israa'iilankooɓe
10
1 Wakkati oon Joomiraaɗo wi'i kam:— Cehaa alluuje kaaƴe ɗiɗi hono arane ɗeen de ƴeenyaa ngaraa to am dow waamnde ndeen. Ngaɗiraa keesuwal e leɗɗe. 2 Mi winndan dow alluuje ɗeen haalaaji gonnooɗi dow arane ɗe keluɗaa ɗeen de ndesaa ɗe ley keesuwal ngaal.
3 Ndeen ngaɗirmi keesuwal e leɗɗe ngawdi. Cehumi alluuje kaaƴe ɗiɗi hono arane ɗeen de ƴeenyumi dow waamnde ndeen miɗo tiigii alluuje ɗeen e juuɗe am. 4 Joomiraaɗo winndi dow alluuje ɗeen binndi gonnooɗi dow alluuje arane ɗiin. Ɗum woni jamirooje sappo ɗe o hokkunoo dow waamnde huɓɓoore yiite nyannde kawrital jamaare Israa'iila ndeen, de o hokkii kam ɗe. 5 Njippiimi waamnde ndeen, ngattumi alluuje ɗeen ley keesuwal ngal ngaɗunoomi ngaal. Ɗe keddii ley keesuwal toon fodde no Joomiraaɗo yamirnoo kam.
6 E ley balɗe ɗeen Israa'iilankooɓe ndilli Ɓulli Ɓiɓɓe-Yaakan njehi Moserot. Wo toon Haaruuna maayi de uwaa. Ɓiyum Eliyajar loomti ɗum ley golle almaamaaku ɗeen. 7 Ɓe ndilli toon, ɓe njehi Gudugoda. Ɓe ndilli Gudugoda, ɓe njehi Yotbata, leydi keewundi gooruuji.
8 Wakkati oon, Joomiraaɗo senndi lenyol Lewi faa laatoo ronndotooɓe keesuwal Amaana Joomiraaɗo ngaal. Ɓe keddoo yeeso muuɗum, ɓe ngollana ɗum, ɓe mbarkina jamaare Israa'iila e innde muuɗum faa warde hannden. 9 Wo saabe ɗuum de Lewinkooɓe ngalaa ndongu hakkunde sakiraaɓe muɓɓen Israa'iilankooɓe. Wo Joomiraaɗo kam e hoorem woni ndongu maɓɓe fodde no wiirunoo o noon.
10 Keddiimi dow waamnde ndeen nyaloomaaji 40 e jemmaaji 40 hono no arannde noon. Wakkati oon du, Joomiraaɗo hettindanake kam, o jaabake du'aare am, saabe ɗuum de o muuyaay halkude on. 11 Ndeen Joomiraaɗo wi'i kam:
— Umma ardoɗaa yimɓe ɓee. Ɓe naata leydi ndi kuniimi mi hokkan maamiraaɓe maɓɓe ndiin, ɓe njeyta ndi.
Yamiroore dow njinngu e ɗowtaare
12 Joonin le, onon Israa'iilankooɓe, ɗume Laamɗo Joomiraaɗo mooɗon haajaa to mooɗon? Si wanaa kulon ɗum de ndewon laabi muuɗum, njiɗon ɗum de ɗowtanoɗon ɗum e ɓerɗe mon e yonkiiji mon fuu. 13 Njogitoɗon jamirooje muuɗum e sariyaaji muuɗum fodde no ekintinirammi on hannden faa mbuuron e jam.
14 Wo Laamɗo Joomiraaɗo mooɗon jeyi kammu e manngu muuɗum, e leydi e ko woni e muuɗum fuu. 15 Wo e maamiraaɓe mooɗon tan Joomiraaɗo takkondiri de yiɗi ɗum'en, gaɗa muɓɓen du, wo onon taaniraaɓe muɓɓen ɓeen o suɓii hakkunde lenyi keddiiɗi fuu hono no worri hannden noon. 16 Saabe majjum dee, keyɗintinee ɓerɗe mooɗon. Taa keddee e yoornude ko'e mon, 17 sabo Laamɗo Joomiraaɗo mooɗon oon, kam woni Laamɗo allaaji fuu. Kanko woni Joomiraaɗo joomiraaɓe, Laamɗo mawɗo, jom semmbe, kulɓiniiɗo mo jaɓataa senndiiru hakkunde yimɓe wooɗi du, mo jaɓataa njeenaari faa haɗa goɗɗo goonga. 18 Kanko woni daraniiɗo atiime'en e rewɓe ɓe goriraaɓe muɓɓen maayi. O jiɗɗo jananɓe, imo hokka ɗum'en nyaamdu e kolte. 19 Ndelle njiɗon jananɓe sabo onon du, on laatakeno jananɓe leydi Misira.
20 Wo Laamɗo Joomiraaɗo mooɗon haani kulon. Wo oon haani ɗowtanoɗon de kaɓɓondiron e muuɗum. Wo e innde makko kunortoɗon. 21 Wo kanko woni mo njettoton. Wo kanko woni Laamɗo mooɗon. Wo kanko waɗi to mooɗon golle mawɗe kulɓiniiɗe ɗe gite mon nji'i ɗeen. 22 Nde maamiraaɓe mooɗon naatannoo leydi Misira ndeen wo 70. Ammaa hannden Laamɗo Joomiraaɗo mooɗon waɗii on ɗuuɗii hono koode kammu ni.