Miccintingol ko Joomiraaɗo waɗani Israa'iila
11
1 Njiɗon Laamɗo Joomiraaɗo mooɗon de njogitoɗon jamirooje e kiite e sariyaaji muuɗum fuu faa abada. 2 Miccitoɗon hannden ko Joomiraaɗo waɗi, de sukaaɓe mooɗon ɓeen kaa nji'aay ɗuum: Ɓe anndaano ekintinooje ɗe Laamɗo Joomiraaɗo mooɗon hokki on ɗeen. Ɓe nji'aay manngu muuɗum e baawɗe muuɗum e semmbe muuɗum mawɗo oon. 3 Ɓe nji'aay maandeeji muuɗum e ko waɗi Fira'awna kaananke Misira e leydi ndiin fuu ɗuum. 4 Ɓe nji'aay ko o waɗi konunkooɓe Misira e pucci muɓɓen e torkooji muɓɓen. No o yooliri ɗum'en ley ndiyam Maayo Maaliya wakkati ndiiwannoo on ndeen e no o lalliniri ɓe fuu faa warde hannden noon. 5 Ɓe nji'aay ko o waɗani on ley ladde yoornde faa njottiɗon nokkuure ndee. 6 Ɓe nji'aay ko o waɗi Datan e Abiram ɓiɓɓe Eliyaba mo lenyol Ruben ɓeen. No leydi omtorii moɗi ɗum'en kam'en e koreeji muɓɓen e hukumuuji muɓɓen e kujje muɓɓen e rewunooɓe ɗum'en fuu. 7 Onon le, gite mon nji'ii kujje mawɗe ɗe Joomiraaɗo waɗi ɗeen fuu.8 Ndelle ndeenon jamirooje ɗe ekintinammi on hannden ɗeen faa keɓon semmbe mo teetirowon leydi ndi ponndiɗon faa laatoo jeyal mooɗon ndiin. 9 Noon waɗata de balɗe mon njuuta ley leydi ndi Joomiraaɗo hunanii maamiraaɓe mon hokkan ɗum'en kam'en e taaniraaɓe muɓɓen, ndi kosam e njuumndi ilata e muuɗum ndiin.
No Joomiraaɗo haybiranta leydi podaandi ndiin
10 Leydi ndi naatoton faa teeton ndiin, worraa hono Misira to mburtiɗon, to aawatonno de na on mbiccana gese mon ndiyam hono no sardiŋe ni. 11 Leydi ndi njeytoyton ndiin wo ndi baamle e naɗɗi, ndi ƴuwoonde yarnata. 12 Leydi ndiin wo ndi Laamɗo Joomiraaɗo mooɗon haybanta, ndi gite muuɗum ndaarata wakkati fuu gilla puɗɗam hitaande faa timmoode muuɗum.
13 Si on kakkilanii jamirooje ɗe kokkammi on hannden, on njiɗii Laamɗo Joomiraaɗo mooɗon, on ɗowtanake mo e ɓerɗe mon e yonkiiji mon fuu, 14 o hokkan on ƴuwoole lobbe wakkati muɓɓen. O hokkan on ndiyam dabbunde e gataaje faa keɓon alkama e inaboojam kesam e nebbam. 15 Mi fuɗinanan daabaaji mon huɗo ley ladde. On nyaaman kaaron.
16 Kakkilon taa ɓerɗe mon oonyoroo gere de ndikkinoɗon yeeso allaaji goɗɗi faa ɗowtanoɗon ɗum'en. 17 Si on ngaɗii noon fu, tikkere Joomiraaɗo saaman dow mooɗon. O ommban kammu, o haɗa ƴuwoonde toɓude. Leydi accitan rimude de piɗɗeɗon law ley leydi lobbiri ndi Joomiraaɗo hokkata on ndiin. 18 Ndelle njogitoɗon jamirooje ɗe kokkammi on ɗeen ley ɓerɗe mon e ley yonkiiji mooɗon. Kaɓɓon ɗe e juuɗe mooɗon hono maande, takkon ɗe dow tiiɗe mon. 19 Ekiton ɗe ɓiɓɓe mon, kaalon haala majje nde njooɗiɗon ley galleeji mon, nde njaaton e laawi, nde pukkotoɗon e nde ummiɗon fuu. 20 Mbinndon ɗe dow bimmbeeje dammbuɗe cuuɗi mon e dow dammbuɗe galluuje mooɗon. 21 Ndeen balɗe mooɗon e ɗe ɓiɓɓe mooɗon fuu njuutiran ley leydi ndi Joomiraaɗo huninoo hokkan maamiraaɓe mon ndiin hono no kammu ɓooyri dow leydi ni. 22 Sabo si on njogitake jamirooje ɗe ekintinammi on, on ngaɗii ko ɗe mbi'i, on njiɗii Laamɗo Joomiraaɗo mooɗon, on ndewii laabi muuɗum, on kaɓɓondirii e muuɗum fu, 23 riiwan lenyi ɗiin fuu yeeso mooɗon de teeton leyɗe lenyi ɓurɗi on manngu e semmbe.
24 Nokku fuu ɗo koyɗe mooɗon njaaɓi, laatoto jeyal mooɗon. Leydi mooɗon fuɗɗan gilla ladde yoornde faro horɗoore e Liban faro soɓɓirre, yaade maayo Efrat faro lettugal faa yottoo maayo manngo faro gorgal. 25 Fay gooto waawataa daraade yeeso mooɗon. To njottiɗon e leydi ndiin fuu, Laamɗo Joomiraaɗo mooɗon waɗan kuleɗon kulol manngol faa ɓerɗe yimɓe ɓeen ndiwna fodde no wi'iri on noon.
Haala barke e kuddi
26 Ndaaron, hannden miɗo wadda barke e kuddi yeeso mooɗon. 27 On keɓan barke si on kettindake jamirooje Laamɗo Joomiraaɗo mooɗon ɗe ekintinammi on hannden ɗeen. 28 On kuɗete si on kettindaaki jamirooje Laamɗo Joomiraaɗo mooɗon, si on celii laawol ngol kollammi on hannden faa ndewon allaaji goɗɗi ɗi on anndaa.
29 Nde Laamɗo Joomiraaɗo mooɗon nannowi on leydi ndi njeytoton ndiin fu, mbarkinon dow waamnde Garijim de kuɗon dow nde Ebal. 30 Baamle ɗeen na keedi gorgal Urdun, leydi Kanaaninkooɓe jooɗiiɓe ley njaayri Araba yeeso Gilgal ɗakkol leɗɗe mawɗe ɗe Moore, 31 sabo on peƴƴan Urdun faa njeytowon leydi ndi Laamɗo Joomiraaɗo mooɗon hokkata on ndiin de njooɗoɗon e mayri. 32 Tinnoɗon e ɗowtanaade kiite e sariyaaji ɗi kokkumi on hannden ɗiin fuu.