No haani wuurdee ley leydi Kanaana
12
1 Inan kiite e sariyaaji ɗi tinnotoɗon e ɗowtanaade nyannde fuu ley leydi ndi Laamɗo Joomiraaɗo maamiraaɓe mooɗon hokkata on faa laatoo jeyal mooɗon faa abada ndiin.Haala nokkuure wootere nde Joomiraaɗo suɓoytoo ndeen
2 Kalkon nokkuuje ɗe lenyi ɗi ndiiwoton ɗiin teddinannoo allaaji muɓɓen dow baamle e dow tile e ley leɗɗe bilitinɗe fuu. 3 Kelon cakkirɗe maɓɓe, puson kaaƴe maɓɓe darnaaɗe, mbulon leɗɗe tooru Asera, kalkon allaaji maɓɓe de lallinon inɗe muɓɓen ley nokkuuje ɗeen. 4 Taa ngaɗanon Laamɗo Joomiraaɗo mooɗon oon hono no ɓe ngaɗiranta allaaji maɓɓe noon. 5 Ammaa wo ley nokkuure nde Laamɗo Joomiraaɗo mooɗon suɓoytoo hakkunde lenyi mooɗon faa waɗa joonde muuɗum de tabintina innde muuɗum ndeen tan njahoton pilowoɗon ɗum. 6 Wo toon njaaroton kirsamaaji mooɗon buleteeɗi e jakkaaji e dokke aadi e ɗe yardamuye e ko laatii awru daabaaji mon pamari e mawɗi fuu e sadakaaji mooɗon feere feere. 7 Wo toon nyaamoton yeeso Laamɗo Joomiraaɗo mooɗon de onon e yimɓe mon mbeltoroɗon barke mo waɗani on ley golleeji mon fuu.
8 Taa ngaɗon no waɗirtee ɗo hannden noon. Taa mono fuu waɗa ko weli ɓernde muuɗum tan, 9 sabo on kewtaay nokkuure powtiri ndeen tafon, ɗum woni ndongu ngu Laamɗo Joomiraaɗo mooɗon hokkata on nguun. 10 Ammaa nde peƴƴoyɗon Urdun de njooɗiɗon leydi ndi Laamɗo Joomiraaɗo mooɗon hokki on faa laatoo ndongu mooɗon, tawi oɗon njooɗii e jam sabo o hisinii on e juuɗe wayɓe fiiliiɓe on ɓeen fu, 11 wo ley nokkuure nde o suɓoytoo faa o tabintina innde makko ndeen ngaddoton ko njamirmi on ɗuum fuu. Ɗum woni kirsamaaji buleteeɗi e sadakaaji e jakkaaji e dokke ko artii ɓenndude e gese mon e sadakaaji mooɗon cuɓaaɗi saabe aadi fuu. 12 Ceyoɗon yeeso Laamɗo Joomiraaɗo mooɗon, onon e ɓiɓɓe mon rewɓe e worɓe, e maccuɓe mon e horɓe mon e Lewinkooɓe tawaaɓe ley galluuje mon, sabo Lewinkooɓe ngalaa ngeɗu hakkunde mooɗon.
13 Tinnoɗon taa cakkon kirsamaaji mon buleteeɗi ley nokkuuje ɗe nji'oyton fuu. 14 Wo ley nokkuure nde Joomiraaɗo suɓoytoo hakkunde lenyi mooɗon ndeen tan njeyɗon sakkude kirsamaaji mon buleteeɗi ɗiin. Wo toon ngaɗoton ko njamirammi on ɗuum fuu. 15 Ammaa oɗon mbaawi hirsude kujje mon, nyaamon teewu muɓɓen no kaajoraɗon fuu fodde no Laamɗo Joomiraaɗo mooɗon barkiniri on ley galluuje mooɗon. Laaɓuɗo e mo laaɓaa fuu na mbaawi nyaamude ɗum hono no nyaamroton kooba naa lewla. 16 Ammaa taa nyaamon ƴiiƴam. Ndufon ɗam dow leydi hono ndiyam ni.
17 Taa nyaamon jakka alkama naa inaboojam kesam naa nebbam, naa awru daaba mon mawɗo e pamaro naa dokke aadi e ɗe yardamuye naa sadakaaji mooɗon feere feere ley galluuje mooɗon. 18 Ammaa nyaamon ɗum yeeso Laamɗo Joomiraaɗo mooɗon, ley nokkuure nde suɓoytoo ndeen onon e ɓiɓɓe mon worɓe e rewɓe e maccuɓe mon e horɓe mon e Lewinkooɓe jooɗiiɓe ley galluuje mon. Ceyoɗon yeeso Laamɗo Joomiraaɗo mooɗon saabe barke golleeji mooɗon fuu. 19 Tinnoɗon taa njeeboɗon Lewinkooɓe ɓeen haddi nguurndam mooɗon ley leydi mon ndiin fuu.
20 Nde Laamɗo Joomiraaɗo mooɗon yaajinowi leydi mon hono no wiirunoo on noon de cuunaɗon teewu faa oɗon mbi'a: «Miɗen kaajanoo teewu min nyaama» fu, oɗon mbaawi nyaamude teewu no kaajoraɗon fuu. 21 Si nokkuure nde Laamɗo Joomiraaɗo mooɗon suɓoytoo faa tabintina innde muuɗum ndeen na woɗɗondiri e galluure mooɗon fu, oɗon mbaawi hirsude daabaaji mon mawɗi e pamari ɗi Joomiraaɗo hokki on fuu fodde no njamirmi on noon. Oɗon mbaawi nyaamude ɗum ley galluuje mon no kaajoraɗon fuu. 22 Nyaamon ɗum hono no nyaamroton kooba naa lewla. Laaɓuɗo e mo laaɓaa fuu na mbaawi nyaamude ɗum. 23 Ammaa kakkilon sanne taa nyaamon ƴiiƴam, sabo ƴiiƴam wo yonki. Ndelle taa nyaamidon teewu e yonki. 24 Taa nyaamon ɗam, ammaa ndufon ɗam dow leydi hono ndiyam ni. 25 Taa nyaamon ɗam faa keɓon jam onon e ɓiɓɓe mon fuu. Ngaɗon ko fotanta Joomiraaɗo.
26 Ammaa ko ceninanɗon Joomiraaɗo e sadaka saabe aadi tan tilsani on waddude nokkuure nde Joomiraaɗo suɓoytoo ndeen. 27 Si tawii wo kirsamaaji buleteeɗi fu, cakkon teewu majji e ƴiiƴam majji dow sakkirde Laamɗo Joomiraaɗo mooɗon. Ƴiiƴam kirsamaaji feere du rufee dow sakkirde ndeen de nyaamon teewu muɓɓen.
28 Kettindoɗon jamirooje ɗeen de ngaɗon ko mbiimi faa onon e ɓiɓɓe mon fuu keɓon jam faa abada saabe on ngaɗii ko dartii e ko wooɗi yeeso Laamɗo Joomiraaɗo mooɗon.
No ɗowtanagol allaaji goɗɗi haɗiraa
29 Nde Laamɗo Joomiraaɗo mooɗon halkowi lenyi ɗi ndiiwoton de njeyton leydi muɓɓen ɗiin fu, 30 tinnoɗon taa nyemmbiton ɗi gaɗa ko ɗi kalkaa ɗuum de caamon e tuugol. Kakkilon taa piloɗon faamude ko allaaji maɓɓe ɗiin laatinoo mbi'on: «Noy lenyi ɗiin ɗowtorantonoo allaaji muɓɓen? Minen du, min ngaɗan hono noon!» 31 Taa ngaɗanon Laamɗo Joomiraaɗo mooɗon noon, sabo lenyi ɗiin na ngaɗannoo kujje bonɗe nyiddiniiɗe ɗe Joomiraaɗo wanyi faa iɓe mbulanannoo allaaji maɓɓe ɗiin ɓiɓɓe maɓɓe worɓe e rewɓe.