13
1 Tinnoɗon e waɗude ko njamirmi on fuu. Taa ɓeydon faa'e, taa ɓuyton faa'e.2 Si annabaajo naa piirtoowo koyɗi gomma funti hakkunde mooɗon de holli on maande haayniinde waɗan, 3 de ko wi'i ɗuum waɗiri hono no wiirunoo noon, si o wi'i: «En ndewa allaaji goɗɗi de ɗowtanoɗen ɗum'en!» allaaji ɗi on anndaano fu, 4 taa kettindanee annabaajo naa piirtoowo koyɗi oon sabo wo Laamɗo Joomiraaɗo mooɗon oon ndaartintoo on faa faama yalla oɗon njiɗiri ɗum e ɓerɗe mon e yonkiiji mon fuu.
5 Ndewon Laamɗo Joomiraaɗo mooɗon de kulon ɗum. Kettindoɗon jamirooje muuɗum de ɗowtanoɗon konngol muuɗum. Wo oon ndewoton de kaɓɓondiron e muuɗum. 6 Annabaajo naa piirtoowo koyɗi oon kaa, sey waree saabe ekintinii on muurtande Laamɗo Joomiraaɗo mooɗon, burtinɗo on leydi Misira ley suudu maccangaaku de rimɗini on. O muuyii celon laawol ngol Laamɗo Joomiraaɗo mooɗon yamiri ndewon ngool. Ndelle sey itton ko boni ɗuum hakkunde mooɗon.
7 Na hasii nyannde gomma sakiike mon inna-gootoojo gorko naa ɓii on gorko naa debbo naa deekii on naa yigiiwo mo takkondirɗon sanne waran ley cuccukka ennda hiilude on wi'a: «En njaha ɗowtanowɗen allaaji goɗɗi!» Ɗum woni allaaji ɗi onon e maamiraaɓe mon fuu on anndaano, 8 allaaji lenyi piiliiɗi on ɓadiiɗi e boɗɗuɗi e gonɗi faa keerol leydi fuu. 9 Taa njaɓon ko joomum wi'i, taa kettindanoɗon ɗum, taa njurmoɗon ɗum, taa cuuron ɗum. 10 Mbaron joomum! Mo o haaldi oon artoo fiya o barduɗe de yimɓe fuu ndewta. 11 Paɗɗon o kaaƴe faa o maaya sabo o muuyii wosinde on laawol Laamɗo Joomiraaɗo mooɗon, burtinɗo on leydi Misira, ley suudu maccangaaku. 12 Israa'iila fuu nanan kabaaru makko de kulol nannga ɗum de cela waɗude ko boni iri ɗuum hakkunde mooɗon.
13 Si on nanii na wi'ee dow wootere e galluuje ɗe Laamɗo Joomiraaɗo mooɗon hokkata on faa njooɗoɗon ɗeen, 14 ko worɓe jaasuɓe mburtake hakkunde mooɗon de ngatti yimɓe galluure muɓɓen e waɗude ko boni na mbi'a ɗum'en: «En njaha ɗowtonowɗen allaaji goɗɗi!» allaaji ɗi on anndaano. 15 Si hono ɗuum waɗowi fu, sey kiinyon sanne, ndaaron faa wooɗa faa paamon yalla ko wi'aa ɗuum wo goonga, si ko boni iri ɗuum waɗii hakkunde mooɗon. 16 Ndeen mbardon yimɓe galluure ndeen fuu kaafaaje. Kalkon galluure ndeen e ko woni e muuɗum fuu de mbardon daabaaji maɓɓe kaafaaje. 17 Kawrondinon jawdi maɓɓe fuu hakkunde galluure ndeen de mbulanon nde Laamɗo Joomiraaɗo mooɗon, kayre e ko woni e mayre fuu. Nde laatoo winnde, wooɗi du nde nyiɓtataake faa abada. 18 Taa kooƴon faa'e e ko halketee ɗuum faa tikkere Laamɗo Joomiraaɗo mooɗon nyanngunde ndeen tottitoo on de o yurmoo on, o ɗuuɗina on faa keewon fodde no o hunoraninoo maamiraaɓe mon noon.
19 Si on ngaɗii noon fu, on kettindanake konngol Laamɗo Joomiraaɗo mooɗon, on ɗowtanake jamirooje ɗe ekintinammi on hannden ɗeen wooɗi du, on ngaɗii ko wooɗi yeeso Laamɗo Joomiraaɗo mooɗon.