Jamirooje Joomiraaɗo sappo
20
1 Laamɗo haali haalaaji ɗi, wi'i:2 — Miin woni Laamɗo Joomiraaɗo mooɗon, wo miin wurtini on leydi Misira ley suudu maccangaaku.
3 Taa ngoodon alla goɗɗo si wanaa miin.
4 Taa ngaɗanon ko'e mooɗon tooruuji nanndinaaɗi e ko woni dow kammu naa e leydi naa ley ndiyam.
5 Taa kofoɗon yeeso kujje ɗeen, wooɗi du, taa ɗowtanoɗon ɗe sabo miin Laamɗo Joomiraaɗo mooɗon oon, wo mi Laamɗo keewɗo kiram. Mi kiitotooɗo ɓiɓɓe saabe hakkeeji baabiraaɓe muɓɓen faa hewta taaniraaɓe e jaatiraaɓe wanyuɓe kam ɓeen. 6 Ammaa yiɗuɓe kam de na ɗowtanoo jamirooje am ɓeen kaa, mi hinnoto ɗum'en faa hewta jamaanuuji ujunere.
7 Taa noddon innde am ɓolum, miin Laamɗo Joomiraaɗo mooɗon, sabo mi accataa pijirɗo innde am ɓolum.
8 Taa njeggitee nyalaande fowteteende ndeen, nde laatanoo on seniinde. 9 Ngolliron balɗe jeegom, timminon ko ngollaton fuu. 10 Ammaa nyalaande jeɗɗaɓerde ndeen kaa, wo nyannde fowteteende saabe Laamɗo Joomiraaɗo mooɗon. Taa ngollon faa'e onon e ɓiɓɓe mon worɓe e rewɓe e maccuɓe mon e horɓe mon e daabaaji mon laatiiɗi fuu e jananɓe jooɗiiɓe ley galluuje mooɗon. 11 Sabo ley balɗe jeegom miin Joomiraaɗo ngaɗumi kammu e leydi e maayo e ko woni ley muɓɓen fuu. Saabe ɗuum mi barkinii nyannde jeɗɗaɓerde, mi seninii nde.
12 Teddinon baabiraaɓe mon e inniraaɓe mon faa balɗe mon njuuta ley leydi ndi Laamɗo Joomiraaɗo mooɗon hokkata on ndiin.
13 Taa ngaɗon war-hoore.
14 Taa ngaɗon jeenu.
15 Taa mbujjon.
16 Taa ceedanoɗon goɗɗo fewre.
17 Taa muuyon suudu goɗɗo. Taa muuyon dee goɗɗo naa maccuɗo mum naa korɗo mum naa nagge mum naa araawa mum naa huunde fuu ko jeyi.
No yimɓe Israa'iila kuliri ɓangugol Laamɗo.
18 Yimɓe fuu nani pelnyaali e fuufaango luwal, ɓe nji'i maƴƴe e waamnde na suurta. Nde ɓe nji'unoo ɗum fu, ɓe keddii iɓe ndiwna kulol, iɓe keedi to toowti, iɓe ndarii. 19 Ɓe mbi'i Muusaa:
— Haaldu e amin, aan hoore ma, min kettinto. Ammaa Laamɗo kaa, taa haalda e amin de min maaya.
20 Muusaa wi'i yimɓe ɓeen:
— Taa kulee sabo Laamɗo ina ndaartindoo on faa kulol muuɗum wona ley ɓerɗe mon, faa taa ngaɗon hakke.
21 Yimɓe ɓeen ndarii to woɗɗi ammaa Muusaa ɓadii ruulde niɓɓunde to Laamɗo woni toon.
Jamirooje dow kirsirɗe teddinooje
22 Joomiraaɗo wi'i Muusaa:
— Kaalanaa Israa'iilankooɓe, mbi'aa ɓe: On nji'ii mi haaldii e mooɗon gilla dow kammu. 23 On ngaɗantaa ko'e mon allaaji kaŋŋe naa cardi. 24 Nyiɓanon kam sakkirde, nyiɓiron nde leydi. Dow mayre ngaɗoton kirsamaaji mooɗon buleteeɗi e sadakaaji jeɗeteeɗi ittaaɗi ley kulle mooɗon pamare e mawɗe fuu. To cuɓiimi teddinde innde am fuu, mi waran to mooɗon mi barkina on. 25 Nde nyiɓoton sakkirde teddinirde kam e kaaƴe fu, taa nyiɓiron nde kaaƴe cehaaɗe sabo hayre moƴƴiniraande e gollirgal fu, wo harmunde. 26 On ngaɗataa ƴeeŋirgal e sakkirde am sabo si on ngaɗirii noon oɗon mbaawi suuritaade.