No neɗɗo jogortoo maccuɓe muuɗum
21
1 Joomiraaɗo ɓeydi, wi'i:— Inan jamirooje ɗe anndintaa ɓe:
2 Si a soodii maccuɗo Ibraninkeejo, o gollante duuɓi jeegom. Ley hitaande jeɗɗaɓerde, a yoofan mo o dilla, o yoɓataa fey. 3 Si kanko tan warunoo to maa, o yaltan kanko tan. Si o warduno e deekiiko fu, o yaltidan e muuɗum. 4 Si joomiiko hokkii mo debbo, de debbo oon rimanii mo ɓiɓɓe worɓe naa rewɓe fu, debbo oon e ɓiɓɓe muuɗum laatoto jeyal joomiiko oon. Ndeen, maccuɗo oon wurtoto kam tan. 5 Ammaa si maccuɗo oon haalii faa laaɓii, wi'ii: Miɗo yiɗi joomam e deekam e ɓiɓɓe am, mi yiɗaa dillude ɗo maaɗa, 6 sey joomiiko oon yaara mo yeeso Laamɗo, yaara mo ley dammbugal naa to sera dammbugal, tufira nowru makko kural. Ndeen o gollanan ɗum haddi nguurndam makko fuu.
7 Si goɗɗo sonnii ɓiyum debbo, o laatake korɗo fu, o yoofataake no horɓe njoofirtee. 8 Si o fotanaay joomiiko anniyinooɗo dewlude mo oon fu, sey oon yardoo yimɓe wuro makko cooditoo mo. Taa oon sonnira mo jananɓe, sabo waɗanaay mo ko fonnditii. 9 Si oon resanii mo ɓiyum du, sey ndaarda mo hono no ɓiɓɓe rewɓe ndaardetee noon. 10 Si joomiiko oon dewlii goɗɗo du, taa ɓuytaa ngeɗu neema makko maa kolte makko. Wooɗi wonndu e makko du hono no gorko wonndirta e deekum noon. 11 Si hokkaay mo kujje tati ɗe fu, debbo oon ina waawi wurtaade tawee yoɓaay ceede yoofeede.
Boofi potooji e jukkungo wareede
12 Piyuɗo goɗɗo faa maayi fu, tilay waree kam du. 13 Ammaa si o hensaaki de o wari joomum, si wo miin Laamɗo acci ɗum waɗiri noon, mi hollan mo to o doggirta, o suuɗowoo. 14 Kaɓɓuɗo anniya de wari goɗɗo du, fay si wo to sakkirde am moolii, nanngon ɗum, mbaron.
15 Piyuɗo inna muuɗum naa baaba muuɗum, tilay waree.
16 Bujjuɗo neɗɗo de sonni ɗum, naa si bujjaaɗo oon tawaama e junngo makko fu, tilay gujjo oon waree.
17 Kuɗuɗo baaba muuɗum naa inna muuɗum, tilay waree.
Jamirooje dow nawnude e barminde
18 Si yimɓe kaɓii faa gooto nawnii banndum, si wo hayre o fiiri joomum naa wo junngo, tawee piyaaɗo oon boɓɓake naa tawee piiɗe ɗeen pukkinii ɗum de maayaay, 19 si ummake fuɗɗii tiigaade sawru ina yiiloo fu, nawnuɗo ɗum oon warataake, ammaa yoɓan piyaaɗo oon balɗe ɗe fukkorii ɗeen. Wooɗi du o yoɓan sawrugol joomum.
20 Piiruɗo maccuɗo muuɗum naa korɗo muuɗum sawru faa wari mo fu, tilay jukkee. 21 Ammaa si oon fukkorake nyalaande wootere naa balɗe ɗiɗi de ummii fu, joomiiko hiitataake, ngam wo o jawdi muuɗum.
22 Si worɓe ina kaɓa de nawni debereedu, de oon rimi gilla ndimu muuɗum yottaaki, tawee cukalel ngeel nawnaaki fu, tilay ɓe njoɓa ceede kaddi ɗe goroo debbo oon taƴanta ɓe yeeso hiitotooɓe. 23 Ammaa si debbo oon nawnake, sariya waɗete: yonki yoɓante yonki, 24 yitere yoɓante yitere, nyiinde yoɓante nyiinde, junngo yoɓante junngo, koyngal yoɓante koyngal, 25 wulugol yoɓante wulugol, nawnaaki yoɓante nawnaaki, barmere yoɓante barmere.
26 Piyuɗo maccuɗo muuɗum naa korɗo muuɗum faa itti yitere muuɗum fu, sey yoofa mo saabe yitere ndeen. 27 Ittuɗo nyiinde makko du, sey yoofa mo saabe nyiinde ndeen.
Jamirooje dow ga'i
28 Si ngaari yuwii goɗɗo, warii ɗum fu, si wo gorko naa debbo fu, tilay ndi faɗɗee kaaƴe faa ndi waata. Teewu mayri du nyaamataake. Ammaa jeyɗo ndi oon hisan. 29 De si tawii ngaari ndiin wo kawoori, tawee joomiiri faaminanooma ɗum, de hawjaaki ndi, faa ndi hawi gorko naa debbo, ndi wari ɗum fu, sey ndi faɗɗee kaaƴe faa ndi waata. Jeyɗo ndi oon du waree. 30 De si yimɓe mo ndi wari oon njaɓii o yoɓa, ndeen kaa o yoɓa ko ɓe njamiri mo fuu, ɗum laatoo coggu ndimɗinoowu yonki makko. 31 Si ɓiɗɗo gorko naa debbo ndi hawi, sariya oon waɗete. 32 Si ngaari ndiin hawii maccuɗo naa korɗo, sey joomiiri yoɓa joomiiko buuɗi cardi 30, de ndi faɗɗee kaaƴe faa ndi waata.
33 Si neɗɗo udditii ngayka naa wasii ngayka, de uddaay ka, si ngaari goɗɗo naa araawa goɗɗo saamii ley toon de waati fu, 34 sey basuɗo ngayka oon yoɓa jom dammuccere oon, ammaa dammuccere waatunde ndeen laatoto nde makko.
35 Si ngaari goɗɗo warii ndi goɗɗo, sey ngaari mbarndi ndiin sonnee, de ɓe cennda ceede mayri. Mbaatundi ndiin du, ɓe cennda ɗum. 36 Ammaa si na anndanoo wo ndi kawoori, de jeyɗo ndi oon ndaaranaay ndi fu, tilay o yoɓa ngaari. Mbaatundi ndiin laatoto ndi makko. 37 Si goɗɗo wujjii ngaari naa mbaalu, hirsii naa sonnii, sey o yoɓa ga'i joy ngam ngootiri ndiin. Joomum yoɓan du baali nay ngam mbaalu ngootu nguun.