Jamirooje dow ko goɗɗo jeyi
22
1 Si gujjo helii suudu jemma naati ley mayru, de nanngaa fiyaa faa maayii fu, hakke walaa dow maayde muuɗum. 2 Ammaa si gite na nji'a, warude mo wo hakke. Tilay o yomnee. Si o walaa ko o yoɓa, sey o sonnee saabe nguyka kaan. 3 Si daaba nga o wujji ngaan tawdaama e yonki, si wo ngaari naa araawa naa mbaalu, sey o yoɓa nde ɗiɗi.4 Si goɗɗo na dura nder ngesa muuɗum, de acci daabaaji muuɗum naati nyaami ngesa goɗɗo, sey yoɓa joomum ko ɗi nyaami ɗuum ley ko ɓuri wooɗude e ngesa muuɗum.
5 Si goɗɗo waɗii ngulu ley ladde de yiite ngeen nanngi gi'e faa yottii gese, nyaami kaɓɓe gawri, naa gawri ndi tappaaka, naa ngesa fu, tilay joomum yoɓa.
6 Si neɗɗo halfinii goɗɗo ceede, naa goɗɗum feere, de ɗum wujjaa ley wuro kalfinaaɗo oon, si gujjo oon nanngaama fu, sey yoɓa hono majjum kile ɗiɗi. 7 Si gujjo oon nanngaaka, sey kalfinaaɗo oon wara to sakkirde Laamɗo faa yimɓe nji'a wo kanko halfinanoo ɗum. 8 Si haala jawdi bujjaandi waddondirii yimɓe, si wo ngaari naa araawa naa mbaalu naa koltal naa iri huunde fuu ko wujjaa, faa mono e maɓɓe fuu wi'i wo kam jeyi ɗum, sey ɓe ngadda haala kaan to sakkirde Laamɗo, ɓe ɗiɗo fuu. Mo Laamɗo nanngi oon, sey yoɓa ooto kile ɗiɗi.
9 Si neɗɗo halfinii goɗɗo ngaari naa araawa naa mbaalu naa be'a naa iri dammuccere gom de nde waati naa koyngal mayre heli naa nde wujjaa tawee goɗɗo fuu seedaaki, 10 hunayeere Joomiraaɗo heddoto hakkunde maɓɓe. Kalfinaaɗo oon holla meemaay dammuccere ndeen naa jawdi ndiin. Ndeen jeyɗo dammuccere oon jaɓan ko o wi'i, yomnataako mo. 11 Si e junngo makko dammuccere ndeen wujjaa, o yoɓan jeyɗo nde oon. 12 Si daaba ladde nanngi nde, taƴii nde, nyaami fu, sey o wadda ko heddii e mayre faa laatoo seedee. Ndeen o yoɓataa kalfinɗo mo oon saabee dammuccere waraande ndeen. 13 Si neɗɗo wuƴake dammuccere to goɗɗo, si nde nawnaama naa si nde waatii tawi jeyɗo nde walaa ɗoon, tilay o yoɓa. 14 Ammaa si jeyɗo nde na tawaa ɗoon fu, o yoɓataa. Si o nyamlino dammuccere ndeen, ceede nyamlagol tan o hokkata.
Jamirooje dow joonnde ley lenyol
15 Si goɗɗo eytii surbaajo mo haɓɓanaaka, de waaldi e makko, tilay yoɓa ceede kaɓɓal de dewla mo. 16 Si baaba surbaajo oon wi'ii dewlintaa mo oon, tilay bonnuɗo mo oon yoɓa ceede hono kaɓɓal.
17 Taa accee sukunya wuura.
18 Neɗɗo fuu pukkodiiɗo e dammuccere, tilay waree.
19 Kirsanɗo alla feereejo fuu halkee. Joomiraaɗo tan sakkantee.
20 Taa ngaɗee beero ko boni, on torrataa ɗum. Ngam onon du, on laatakeno weerɓe nder leydi Misira. 21 Taa torree atiime e debbo maayraaɗo. 22 Si on torrii ɓe, ɓe mbulloto kam, mi nanan bojji maɓɓe, 23 de mi tikkanan on, mi warda on kaafaahi. Rewɓe mooɗon keddoo ngalaa goriraaɓe, ɓiɓɓe mooɗon du laatoo atiime'en. 24 Si na woodi neɗɗo baasuɗo nder yimɓe am, gonɗo ɗakkol maaɗa, si a nyamlake mo ceede, taa laatoɗaa hono tinoowo buuɗi, taa ngaɗaa o yoɓe ceede ɓurɗe ceede ɗe o jaɓi to maaɗa.
25 Si goɗɗo nyamlake ceede to maaɗa, de njaɓuɗaa suddamaare muuɗum faa laatoo tolma fu, sey kokkitaa mo nde illa naange yanaay. 26 Sabo o walaa ko o suddoo. Si o walaa nde, ɗume o suddotoo, de o ɗaanoo? Si o wullake kam, mi nanan bojji makko, sabo miin wo mi jurmotooɗo.
27 Taa mbonkee Laamɗo, taa kuɗee du ardiiɗo lenyol mon.
28 Taa calee hokkude ko keɓuɗon ley barke gese mooɗon, e barke leɗɗe mooɗon.
Kokkon kam du afooɓe mon worɓe. 29 Noon ngaɗirton e na'i mooɗon e baali mooɗon. Caggal rimeede majji, balɗe jeɗɗi ɗi ngaddata e inniraaɓe majji, de nyalaande jeetataɓerde ndeen, kokkon kam ɗi. 30 Tilay mbuuron wo on yimɓe am seniiɓe. Ndelle on nyaamataa teewu ngu huunde ladde taƴi, on paɗɗanan ngu dawaaɗi.