23
1 Taa ceedee fewre, taa kawtee e bonɗo hunnduko.2 Taa njokkee gaɗa jamaa faa ngaɗon ko boni. Si on njehii laamorde faa ceedowoɗon, taa keedanon yimɓe suuɗooɓe goonga. 3 Ley sariya, taa keedanon talkaajo si walaa goonga.
4 Si a tawii ngaari ganyo maaɗa, naa araawa muuɗum majjunga, sey kooranaa ɗum nga faa wuro. 5 Si a yi'ii donngal ina liɓi araawa ganyo maaɗa, taa witta njoppaa nga. Tilay mballaa nga.
6 Si talkaajo warii sariya fu, taa caloɗaa hiitanaade ɗum fodde goonga. 7 Taa hawtu e waddooɓe haalaaji ɗi ngaldaa e goonga. Taa waru laaɓuɗo naa ponnditiiɗo, ngam mi ndaardataa bonɗo wo ponnditiiɗo. 8 Taa jaɓu njeenaari careteeɗo, sabo njeenaari na wumna saahiiɓe na ɗala dartiiɓe goonga. 9 Taa torree beero, oɗon anndi saɗɗaaji mbeerka. Onon du on laatakeno weerɓe nder leydi Misira.
Powtiri nyalaande jeɗɗaɓerde e ndunngu jeɗɗaɓu
10 Ndemon gese mooɗon duuɓi jeegom, 11 ndunngu jeɗɗaɓu nguun on ndemataa ɗe, on accanan ɗe talkaaɓe lenyol mooɗon. Ko heddii du, daabaaji ladde nyaama. Noon ngaɗirton e gese mooɗon cabiije e jaytun fuu.
12 Balɗe jeegom ngollirton gollal mooɗon. Ammaa nyalaande jeɗɗaɓerde, sanaa powton heɓa ga'i mooɗon e araaji mooɗon du powta. Noon du heɓa maccuɓe mon e weerɓe mon powta. 13 Ko mbi'umi on fuu sanaa kakkilanon ɗum. Taa ngaɗon du'aare to allaaji feere, taa inɗe majji nanee e kunnduɗe mooɗon.
Iidiiji tati gaɗanteeɗi Joomiraaɗo
14 On ngaɗanan kam iidi nder hitaande fuu kile tati. 15 On ngaɗan iidi Buuru mo wattaaka rabilla. Balɗe jeɗɗi nyaamirton buuru mo wattaaka rabilla hono no njamirmi on. On ngaɗan iidi ndiin ley lewru Abiibu, sabo ley mayru mburtinoɗon leydi Misira. On ngarataa yeeso am juuɗe ɓole. 16 On ngaɗan du iidi tayri e ko arti ɓenndude ley gese mooɗon. On ngaɗan du iidi wartirde ko taƴaa. Ngaɗon ɗum nde timminɗon tayri ndeen. 17 Worɓe mooɗon ngara yeeso Laamɗo Joomiraaɗo nder hitaande fuu nde tati.
18 Nde kirsanton kam kirsamaaji fu, taa kawrinee ɗi e ko woodi rabilla. Taa accon ɓellere kirsamaari ndi ngaɗanɗon kam ndiin heddoo faa waalta.
19 Ngaddon to suudu Laamɗo Joomiraaɗo mooɗon ko ɓuri wooɗude ley ko arti ɓenndude e gese mooɗon. Taa njongee teewu ɓinngel mbeewa nder ɓiraaɗam inniigel.
No Israa'iila'en njooɗortoo ley leydi Kanaana
20 Ndaar, mi nulan maleyka yeeso mooɗon deenoowo on dow laawol faa yaara on nokkuure nde moƴƴinanmi on ndeen. 21 Kakkilon e makko, kettindoɗon haala makko. Taa muurtanon mo, sabo o yaafataako hakkeeji mooɗon, sabo innde am na tawdaa e makko. 22 Si on kettindanake mo e hakkillo de ngaɗuɗon ko mbi'umi fu, ndeen mi honan honooɓe on, mi laatoto ganyo wayɓe mooɗon. 23 Maleyka am ardoto on faa yaara on ley leydi Amorinkooɓe, e Hitiyankooɓe, e Perisinkooɓe, e Kanaaninkooɓe, e Hiwinkooɓe, e Yebusinkooɓe. Mi halkan ɓe. 24 Taa ndikkinoɗon yeeso allaaji maɓɓe, taa ɗowtanee ɗi, on ngaɗantaa ɗi huunde fuu ko ɓiɓɓe leydi ndiin ngaɗanta ɗi. Cankiton ɗi, puson kaaƴe ɗe ɓe ɗowtantoo ɗeen. 25 On ɗowtanto Laamɗo, Joomiraaɗo mooɗon, ndeen o barkinan ko nyaamoton e ko njaroton, o riiwan nyawu ley ɓalli mooɗon. 26 Fay gooto mooɗon rimataa du ɓinngel ngel walaa yonki hakkunde mooɗon. Walaa du fu mo rimataa nder leydi mooɗon. Mi hokkan on du balɗe keewɗe. 27 Mi jiiɓan wayɓe mooɗon, mi hulɓinan lenyi leydi to njahoton toon fuu, de mi doggina ɗi. Mi waɗan wayɓe mooɗon ndogga. 28 Mi nulan jabbatti keewɗi ardoo on, de ɗi ndiiwa Hiwinkooɓe, e Kanaaninkooɓe, e Hitiyankooɓe yeeso mooɗon. 29 Mi riiwataa ɓe ley hitaande wootere yeeso mooɗon sakko leydi ndiin laatoo winnde, de daabaaji ladde ɗuuɗa, ɓura on semmbe. 30 Ammaa seeɗa seeɗa ndiiwiranmi ɓe yeeso mooɗon faa ɓeydoɗon, de ndonon leydi ndiin. 31 Mi darnanan on haddi ndongu mon gilla maayo Maaliya faa maayo Filistiyankooɓe*, gilla ladde yoornde faa maayo Efrat, sabo mi wattan jooɗiiɓe e leydi ndiin fu e juuɗe mooɗon. On ndiiwan ɓe yeeso mooɗon. 32 Taa kaɓɓidee e maɓɓe amaana jooɗodaade e potal. On ngaddataa amaana e allaaji maɓɓe du. 33 Taa ɓe njooɗoo nder leydi mooɗon de ɓe mbosina on, de ngaɗon hakke to am. Sabo si on ɗowtanake allaaji maɓɓe fu, ɗum laatanto on fergere.