No Israa'iila'en njaɓiri amaana Joomiraaɗo
24
1 Ndeen Joomiraaɗo wi'i Muusaa:— Ƴeeŋee ngaree to am dow waamnde nde, aan e Haaruuna e Nadap e Abihu, e mawɓe Israa'iila 70. On fuu sey cujidanon kam faa to toowti. 2 Muusaa, wo aan tan ɓattitotoo kam, wanaa heddiiɓe ɓeen, wanaa du yimɓe Israa'iila fuu.
3 Ndeen Muusaa yehi haalani yimɓe ɓeen jamirooje ɗeen e ko Joomiraaɗo haali fuu. Ɓe nootii daande wootere, ɓe mbi'i: Min ngaɗan ko Joomiraaɗo wi'i fuu!
4 Wakkati oon Muusaa winndi ko Joomiraaɗo wi'i ɗum fuu.
O ummii gilla fajiri, o dawi o darni kaaƴe ley waamnde ndeen, o waɗi sakkirde. O darni bimmbeeje 12 faa laatoo maande miccinoore lenyi Israa'iila 12 ɗiin. 5 Ndeen o waɗi jokolɓe nanngi kalahaldi, kirsi ɗi. Goɗɗi majji laatii sadakaaji buleteeɗi, goɗɗi du sadakaaji jeɗeteeɗi. 6 Muusaa nyeɗi feccere ƴiiƴam majji ley taasaaje mawɗe, o wicci keddiiɗam ɗaam du dow sakkirde ndeen. 7 O adi dewtere amaana, o janngi heɓa lenyol ngool nana. Ndeen ɓe mbi'i:
— Ko Joomiraaɗo wi'i fuu, min ngaɗan ɗum, min njokkan ko o wi'i.
8 Muusaa adi ƴiiƴam keddiiɗam ɗam wicci ɓe, wi'i: Ƴiiƴam ɗaam hollii Joomiraaɗo haɓɓidii e meeɗen amaana dow ko winndaa ɗo ɗuum.
9 Ndeen Muusaa e Haaruuna e Nadap e Abihu e yimɓe 70 ɓeen ƴeeŋi dow waamnde ndeen, 10 ɓe nji'i Laamɗo Israa'iila. To koyɗe makko njaaɓi toon na nanndi e kaaƴe ɗelkooje, laaɓuɗe hono njaayri kammu. 11 O halkaay mawɓe Israa'iila'en ɓeen. Ɓe njiiri Laamɗo gite maɓɓe, iɓe mbuuri. Wooɗi iɓe nyaama, iɓe njara.
12 Joomiraaɗo wi'i Muusaa: Ƴeeŋu ngaraa to am dow waamnde nde, keɗoɗaa ɗo faa mi hokke alluuje kaaƴe cehaaɗe. Mi winndii jamirooje e sariyaaji dow majje faa ekintinaa yimɓe ɓeen.
13 Ndeen Muusaa e Yoosuwa ballo muuɗum oon ummii. Muusaa ƴeeŋi waamnde ndeen faa hawra e Laamɗo. 14 Fadde makko e dillude, o wi'i mawɓe ɓeen:
— Keɗee min ɗo faa min ngarta. Si yimɓe keɓdii baasi fu, inan Haaruuna e Hur. Ɓe njaha to muɓɓen faa kiitanoo ɓe.
15 Nde Muusaa ƴeeŋunoo waamnde Sinayi ndeen, ruulde suddi nde, 16 teddeengal Joomiraaɗo du jippii dow mayre. Balɗe jeegom ruulde ndeen suddiri waamnde ndeen. Ley nyalaande jeɗɗaɓerde Joomiraaɗo noddi Muusaa ley ruulde toon. 17 No Israa'iila'en njiiri teddeengal Joomiraaɗo dow waamnde noon, ina wa'i hono yiite nyaamoowe. 18 Ndeen Muusaa ɓeydi ƴeeŋude waamnde ndeen, naati faa ley ruulde ndeen. O waɗi balɗe 40 dow waamnde toon jemma e nyalooma.