Dokke gaɗanteeɗe Joomiraaɗo
25
1 Ndeen Joomiraaɗo wi'i Muusaa:2 — Wi'u Israa'iila'en ngaddana kam dokke. Njaɓaa dokkal to mo ɓernde muuɗum muuyi hokkude fuu. 3 Dokke ɗe ɓe ngaddata ɗeen ngoni kaŋŋe e cardi e njamndi mboɗeeri, 4 e gaaraaji bulabulaaji, e bojjitooji, e boɗeeji coy, e leppi ɗaatuɗi, e leeɓi be'i, 5 e guri jawɗi bojjinaaɗi, e guri ɗaatuɗi moƴƴinaaɗi, e leɗɗe ngawdi, 6 e nebbam fitillaaji, e ure nebbam seningol, e ure buleteeɗe, 7 e kaaƴe dime bi'eteeɗe onikis takketeeɗe dow saaya ndeketeeka dow, e kaaƴe dime feere feere takketeeɗe dow saaya ndeketeeka dow kaan, e dow basel kaɓɓeteengel dow ɓernde. 8 Ɓe nyiɓana kam suudu seniindu, mi jooɗodoo e maɓɓe. 9 Nyiɓon ndu fodde alhaali mo kollanmi on oon pay, ngaɗon du ko wattetee ley mayru fuu fodde sifa mo kollanmi on oon.
No keesuwal Amaana Joomiraaɗo waɗirtee
10 Ndeen, keɓon leɗɗe ngawdi ngaɗon keesuwal. Njuuteefi maggal waɗan piyanɗe ɗiɗi e feccere, njaajeefi maggal waɗan fiyande wootere e feccere, de tooweefi maggal du waɗan fiyande wootere e feccere. 11 Mooytiraa nder maggal e yaasin maggal fuu kaŋŋe dimo, piiltinaa koɗol kaŋŋe dow seraaji maggal. 12 Taaynaa kaŋŋe, ngaɗaa jawe nay, ceŋaa ɗe to koyɗe maggal toon, ɗiɗi sera o, ɗiɗi sera ooto. 13 Ngaɗaa cabbi leɗɗe ngawdi, mooytiraa ɗi kaŋŋe. 14 Ndeen cornaa ɗi nder jawe gonɗe seraaji keesuwal ngaal, faa laatoo ƴeptirɗi maggal. 15 Cabbi ɗiin ittataake ley jawe ɗeen, ɗi accete toon wakkati fuu. 16 Ndesaa ley maggal alluuje amaana ɗe kokkammaami ɗeen.
17 Kooƴaa kaŋŋe dimo, ngaɗiraa ommboode keesuwal ngaal. Njuuteefi ommboode ndeen waɗan piyanɗe ɗiɗi e feccere, njaajeefi mayre du waɗan fiyande wootere e feccere. 18-19 Ndeen ciiwaa kaŋŋe, tappaa, ngaɗaa maleyka'en wi'eteeɓe keruba'en ɗiɗo, gooto sera o, gooto du sera ooto, ɓe ceŋoo e ommboode ndeen. 20 Keruba'en ɓeen peerta bippeele muɓɓen dow maggal, geese muɓɓen du kuccondira, ndaara ngal. 21 Ndeen ndesaa alluuje amaana ɗe kokkammaami ɗeen nder keesuwal ngaal, de ommbiraa ngal e ommboode maggal. 22 To ommboode ndeen, hakkunde keruba'en ɓeen kawrammi e maaɗa, mi haalane jamirooje am saabe Israa'iila'en.
No taabawal buuru cakkaaɗo waɗirtee
23 Ngaɗaa taabawal leɗɗe ngawdi. Njuuteefi maggal waɗan piyanɗe ɗiɗi, njaajeefi maggal du waɗan fiyande wootere, de tooweefi maggal waɗa fiyande wootere e feccere. 24 Mooytiraa ngal kaŋŋe dimo, piiltinaa koɗol kaŋŋe dow seraaji maggal, de 25 kommbaa ndi. Njaajeefi kommbol ngool fota e njaajeefi junngo. Ndeen piiltinaa ngol koɗol kaŋŋe, kanngol du. 26 Ngaɗanaa taabawal ngaal jawe kaŋŋe nay, ceŋaa ɗe to coɓɓuli maggal fuu, koyngal fuu wooto. 27 Jawe ɗeen ɗakkondura e koɗol piiltiingol seraaji maggal ngool, faa njogoo cabbi ƴeptirɗi maggal ɗiin. 28 Ngaɗiraa cabbi ɗiin leɗɗe ngawdi, de mooytiraa ɗi kaŋŋe. Ɗi laatoo ɗi ngal ƴeptirtee.
29 Ngaɗanaa ngal nyaamruɗe e taasahoy. Katin ngaɗaa jollooji e jarduɗe cabijam sadaka. Ɗum fuu ngaɗiraa ɗum kaŋŋe dimo.
30 Ndeen, aɗa resa buuru cakkaaɗo oon dow taabawal ngaal yeeso am wakkati fuu.
No joƴƴinirde fitillaaji waɗirtee
31 Ciiwaa kaŋŋe dimo, tappaa, ngaɗaa joƴƴinirde fitillaaji. Ngaɗanaa nde darorde, e calɗi e gattirɗi nebbam nannduɗi e pinndi, e bilite tiigiiɗe ndi. Sanaa ɗum fuu ɗum seŋoo e joƴƴinirde fitillaaji ndeen, ɗum laatoo huunde wootere. 32 Ngaɗanaa nde calɗi jeegom e salndu hakkundeeru nduun, tati sera fuu. 33 Ndeen ngaɗanaa calɗi jeegom ɗiin gattirɗi nebbam e pinndi aman e bilite mayri, salndu fuu gattirɗi tati. 34 De salndu hakkundeeru nduun, ngaɗanaa ɗum gattirɗi nebbam nay e pinndi aman e bilite mayri. 35 Hono noon du to calɗi ɗiɗi arandeeji ɗiin kawri e salndu hakkundeeru nduun, ngaɗaa wilitere pinndi ley toon, de ngaɗaa katin wilitere pinndi ley calɗi ɗiɗi ɗiɗaɓi ɗiin. Ndeen ngaɗaa wilitere pinndi ley calɗi ɗiɗi cakitiiɗi ɗiin du. 36 Bilite ɗeen e calɗi ɗiin e joƴƴinirde fitillaaji ndeen fuu laatoo huunde wootere, tafiraa ɗum tamre kaŋŋe dimo wootere. 37 Ngaɗaa fitillaaji jeɗɗi, de njoƴƴinaa ɗi ley joƴƴinirde ndeen faa ɗi njaynana njaayri ngonundi yeeso majji ndiin.
38 Katin ngaɗaa nyifirkoy ɓoggi fitillaaji ɗiin e keeɗoy ɓottirkoy ndoondi majji, ɗum fuu ngaɗiraa ɗum kaŋŋe dimo.