No hukum Ceniiɗo waɗirtee
26
1 Ngaɗiraa hukum oon gude mawɗe sappo. Gude ɗeen wo gaɗiraaɗe leppi ɗaatuɗi, e gaaraaji bulabulaaji e bojjitooji e boɗeeji coy. Alhaali keruba'en sanyee dow gude ɗeen. De ɗum fuu ɗum golliree nyeenyal. 2 Njuuteefi majje waɗa piyanɗe 28, de njaajeefi majje waɗa piyanɗe nay. Ɗe fuu ɗe pota. 3 Kawrinaa joy majje, nyootaa faa ɗe laatoo wootere. Noon du ngaɗataa joy keddiiɗe ɗeen, kawrinaa ɗe, nyootaa. 4 Keɓaa lefoy bulabulawoy 50, ngaɗaa kaɓɓirkoy, de nyootaa koy sera wudere arandeere ndeen. Ngaɗiraa noon e wudere sakitiinde ndeen du. 5 Lefoy 50 nyootaakoy ley wudere arandeere ndeen, kuccundura e lefoy 50 ngonkoy e wudere heddiinde ndeen. 6 Ngaɗaa tiigorkoy kaŋŋe 50, de kaɓɓondura gude ɗeen ɗo lefoy kooy kuccunduri ɗoon, faa hukum oon laatoo suudu wooturu.7 Keɓaa leeɓi be'i, ngaɗaa gude 11 faa hukum oon huuree. 8 Njuuteefi wudere fuu waɗa piyanɗe 30, njaajeefi mun du waɗa piyanɗe nay. Ɗe fuu ɗe pota. 9 Kawrinaa joy sera arano, de nyootaa. Hono noon du kawrinaa jeegom ley sera ooto, nyootaa ɗe kanje du. Ndeen cowaa sakitiinde ndeen ley jeegom ɗeen, yeeso suudu nduun. 10 Ngaɗaa kaɓɓirkoy 50 sera gude joy arandeeje kawrinaaɗe ɗeen, de ngaɗaa katin kaɓɓirkoy 50 sera gude keddiiɗe ɗeen. 11 Ngaɗiraa tiigorkoy 50 e njamndi mboɗeeri, de kaɓɓaa gude leeɓi ɗeen e makkoy faa tiigundira e hukum oon de ɗum fuu ɗum laatoo suudu wooturu. 12 Feccere wudere leeɓi be'i heddiinde ndeen ɓilee gaɗa hukum oon. 13 Wudere mawnde waɗiraande leeɓi be'i, heedoore dow hukum ndeen, sanaa njuuteefi muuɗum ɓurda njuuteefi leppi ɗaatuɗi ɗiin ko foti fiyande wootere faro seraaji fuu. Hono nii nde jippoto faro seraaji hukum oon fuu, nde huura ɗum.
14 Keɓaa guri jawɗi bojjinaaɗi, ngaɗaa wudere suddirde hukum oon. Keɓaa katin guri ɗaatuɗi moƴƴinaaɗi, ngaɗaa wudere wonde dow wudere arandeere ndeen.
15 Keɓaa leɗɗe ngawdi, ɗe laatoo darnirɗe hukum oon. 16 Tooweefi leggal fuu waɗa piyanɗe sappo, de njaajeefi mum waɗa fiyande wootere e feccere. 17 Ngaɗiraa darorgal fuu leɗɗe ɗiɗi, ɗe ɗakkondira. Ngaɗiraa noon e darorɗe ɗeen fuu. 18 Ngaɗaa darorɗe 20 sera horɗoore hukum oon. 19 Ngaɗaa darorɗe cardi 40 tonteteeɗe e leydi, heɓa koyɗe leɗɗe ɗeen tiggee e majje, to leggal fuu ɗiɗi ɗiɗi faa koyɗe ɗiɗi ɗeen fuu keɓa to ndaroo. 20 Noon du ngaɗirtaa gere soɓɓirre hukum oon. Keɓaa darorɗe 20, 21 e cardiiji 40, faa koyɗe leɗɗe ɗeen fuu tontee dow cardiiji ɗiɗi ɗiɗi. 22 Ndarnaa darorɗe jeegom gaɗa hukum oon, ɗum woni gorgal makko. 23 Keɓaa katin darorɗe ɗiɗi, ndarnaa to coɓɓuli gorgaaji hukum oon. 24 Kawrondiraa ɗe gilla ley coɓɓuli ɗiɗi ɗiin faa yottoo dow majji. Noon ngaɗirtaa to coɓɓuli ɗiin fuu. 25 Ndelle caggal hukum oon ina woodi darorɗe jeetati e cardiiji majje 16 tonteteeɗi e leydi. Tontaa leɗɗe ɗeen e cardiiji ɗiin, darorgal fuu cardiiji ɗiɗi.
26 Keɓaa leɗɗe ngawdi juutuɗe faa palee dow leɗɗe tontaaɗe ɗeen: joy gere soɓɓirre, 27 joy gere horɗoore, joy du gaɗa, ɗuum woni gorgal hukum oon. 28 Leggal hakkundeyal ngaal faloo hakkunde leɗɗe dariiɗe ɗeen, gilla soɓɓundu ndu ɗo faa yaade ndu to. 29 Mooytiraa leɗɗe tontaaɗe ɗeen e pale ɗeen kaŋŋe, ndeen ngaɗanaa tontaaɗe ɗeen jawe kaŋŋe to pale ɗeen ngoni toon. 30 Sanaa ndarnaa hukum oon fodde alhaali mo kollumaami dow waamnde oon.
31 Ngaɗaa lefol canyiraangol gaaraaji bulabulaaji e bojjitooji e boɗeeji coy e leppi ɗaatuɗi. Ndeen baawɗo gollal nyeenyal waɗa alhaali keruba'en dow lefol ngool. 32 Keɓanaa ngol leɗɗe ngawdi nay darnirɗe, ngaɗaa bimmbeeje. Mooytaa ɗe kaŋŋe, ngaɗanaa ɗe tiigorkoy kaŋŋe. Ciiwaa cardi, ngaɗaa jamɗe nay tonteteeɗe e leydi, heɓa bimmbeeje ɗeen ndarnee nder majje. 33 Ɓilaa ngol e tiigorkoy kawritinkoy e gude kuuruɗe hukum oon kooy pay pay. Ngol sennda nokkuure seniinde e nokkuure ɓurnde senaade ndeen. Kooƴaa keesuwal Amaana ngaal, ndesaa gaɗa lefol ngool, 34 to nokkuure ɓurnde senaade toon, de ommbaa keesuwal ngaal. 35 Ndesaa taabawal ngaal yaasin nokkuure ɓurnde senaade ndeen, to gere soɓɓirre, de ngattaa joƴƴinirde fitillaaji ndeen du gere horɗoore toon, nde huccita e taabawal ngaal.
36 Ngaɗanaa dammbugal hukum oon wudere uddirde sanyiraande gaaraaji jillaaɗi, bulabulaaji e bojjitooji e boɗeeji coy e leppi ɗaatuɗi. Baawɗo nyeenyal golla ɗum. 37 Ngaɗanaa nde bimmbeeje leɗɗe ngawdi joy, mooytiraa ɗe kaŋŋe, ngaɗanaa ɗe tiigorkoy kaŋŋe faa koy kaɓɓoo e wudere ndeen. Taaynaa njamndi mboɗeeri, ngaɗanaa bimmbeeje ɗeen jamɗe tonteteeɗe e leydi joy.