No sakkirde waɗirtee
27
1 Keɓaa leɗɗe ngawdi, ngaɗaa sakkirde. Njuuteefi mayre e njaajeefi mayre fuu ngaɗa piyanɗe joy joy, de tooweefi mayre waɗa piyanɗe tati. 2 Ngaɗanaa nde alhaali luwe nay, soɓɓundu fuu gootal, ɗe ceŋoo e mayre. Mooytiraa nde njamndi mboɗeeri. 3 Ngaɗaa taasaaje to ndoondi ɓellere dammucce wattetee e pelliiji e taasahoy mbiccirkoy ƴiiƴam e juwirɗe teewu e ɓoɓtirɗe ndoondi. Gollirɗe sakkirde ɗeen fuu, sanaa ngaɗiree njamndi mboɗeeri. 4 Canyanaa nde njamndi mboɗeeri nanndundi e nanngirdi liƴƴi, de ngaɗanaa coɓɓuli mayri jawe njamndi mboɗeeri nay. 5 Ndarnaa ndi ley kommbol sakkirde ndeen, ndi yottoo faa hakkunde tooweefi mayre. 6 Ngaɗanaa nde cabbi ngawdi, de mooytiraa ɗi njamndi mboɗeeri. 7 Ngattaa ɗi nder jawe gonɗe to seraaji mayre ɗeen, ɗi keddoo seraaji mayre ɗiɗi ɗiin wakkati nde ƴeptetee fuu.8 Hirsirde ndeen waɗiree leɗɗe keefaaɗe, tawee du wo nde ɓolde hono luuro nii. Nde waɗee no kollirmaami dow waamnde nde noon.
No kokuwol hukum Ceniiɗo waɗirtee
9 Ngaɗaa taliyaare faa fiilaa hukum oon, kuuriraa nde gude canyiraaɗe leppi ɗaatuɗi. Njuuteefi majje waɗa piyanɗe 100 gere horɗoore. 10 Ngaɗanaa ɗe bimmbeeje 20. Ngaɗanaa bimmbeeje ɗeen koyɗe njamndi mboɗeeri 20. Ko gude ɗeen tiigortee e ko ɗe kaɓɓirtee wo cardi. 11 Noon du ngaɗirtaa gere soɓɓirre hukum oon. Njuuteefi gude ɗeen waɗa piyanɗe 100, de bimmbeeje ɗeen laatoo 20, jamɗe majje 20 du ngaɗiree njamndi mboɗeeri. Ko ɗe tiigortee e ko ɗe kaɓɓirtee kaa laatoo cardi. 12 Njuuteefi majje waɗa piyanɗe 50 heedde gorgal hukum oon. Bimmbeeje ɗeen laatoo bimmbeeje sappo, jamɗe majje du, jamɗe sappo. 13 Gere lettugal toon du, njuuteefi gude ɗeen waɗa piyanɗe 50. 14-15 Ngaɗaa gude to seraaji dammbugal kokuwol ɗiɗi ɗiin fuu. Njuuteefi majje waɗa piyanɗe 15. Sera fuu, ɓilaa ɗe e bimmbeeje tati e jamɗe muɓɓen tonteteeɗe nder leydi tati. 16 Ndeen ngaɗanaa dammbugal taliyaare ngaal du wudere uddirde sanyiraande gaaraaji bulabulaaji e bojjitooji e boɗeeji coy e leppi ɗaatuɗi, ɗum fuu ɗum golliree nyeenyal. Njuuteefi mayre waɗa piyanɗe 20, ndeen ngaɗanaa ngal bimmbeeje nay e jamɗe majje tonteteeɗe nder leydi nay. 17 Dobondiriraa bimmbeeje kokuwol ngool fuu cardi, ngaɗanaa ɗe du tiigorkoy cardi. Ndeen ngaɗiraa joƴƴinirɗe bimmbeeje ɗeen njamndi mboɗeeri. 18 Njuuteefi kokuwol ngool waɗa piyanɗe 100, njaajeefi maggol waɗa piyanɗe 50, de tooweefi maggol waɗa piyanɗe 5, ɗum woni tooweefi gude canyiraaɗe leppi ɗaatuɗi ɗeen. Jamɗe tonteteeɗe e leydi ɗeen du ngaɗiree njamndi mboɗeeri. 19 Gollirɗe hukum Ceniiɗo oon fuu, sanaa ngaɗiree njamndi mboɗeeri. Wooɗi tiigorɗe hukum oon e tiigorɗe kokuwol taliyaare ndeen du fuu ngaɗiree njamndi mboɗeeri.
Nebbam fitillaaji
20 Mbi'aa Israa'iila'en ngadda nebbam jaytun unaaɗo, laaɓuɗam, ngatta ɗam ley fitillaaji ɗiin faa ɗi keddoo iɗi kuɓɓa wakkati fuu. 21 Haaruuna e ɓiɓɓe muuɗum ngatta ɗi nder hukum hawrugol Joomiraaɗo, yeeso lefol cuuɗungol keesuwal Amaana ngool. Ɓe kinnoo ɗi, ɓe ndaarana ɗi faa ɗi keddoo, iɗi kuɓɓa yeeso Joomiraaɗo jemma fuu. Ɗi kuɓɓa gilla futuro faa ɗo weeti. Yamiroore nde, sanaa Israa'iila'en e ɓiɓɓe muɓɓen ndeena nde ley jamaanuuji garooji faa abada.