No kolte almaami ngaɗirtee
28
1 Mawna Haaruuna noddee, wara to maaɗa, kam e ɓiɓɓe muuɗum, Nadap e Abihu e Eliyasar e Itamar. Kamɓe ngoni ɓe cuɓiimi hakkunde lenyol Israa'iila faa ɓe ngaɗa gollal almaamaaku yeeso am. 2 Ngaɗanon Haaruuna kolte ceniiɗe faa ɗum maandina teddeengal e darja gollal muuɗum. 3 Keɓaa waawɓe gollal, ɓe kokkumi hakkillo majjum, mbi'aa ɓe ɓe ngaɗana mo kolte ɗeen saabe senndugol makko de o golla gollal almaamaaku yeeso am.4 Inan iri kaddule ɗe ɓe ngaɗata: basel ngel almaami haɓɓata dow ɓernde mum, e saaya ndeketeeka dow, e saaya mbulabulooha, e saaya tuppinaaka ngatteteeka ley, e kufune e kaɓɓorgol. Ɓe ngaɗana Haaruuna e ɓiɓɓe muuɗum kaddule ceniiɗe saabe gollal almaamaaku yeeso am. 5 Ɓe ngaɗira ɗe morri kaŋŋe e leppi ɗaatuɗi e bulabulaaji e bojjitooji e boɗeeji coy.
6 Wooɗi, inan no ɓe ngaɗirta saaya ndeketeeka dow kaan. Waawɓe sanyirde nyeenyal canyira ka morri kaŋŋe e gaaraaji bulabulaaji e bojjitooji e boɗeeji coy e leppi ɗaatuɗi. 7 Ɓe ngaɗana ka lefoy to gereeji ɗiɗi ɗiin fuu faa koy ngarda dow balaaje, koy kaɓɓoo e makka. 8 Ka waɗanee du kaɓɓorgol canyiraangol nyeenyal. Kangol du ngol sanyiree gaaraaji ɗi saaya kaan sanyiraa ɗiin.
9 Wooɗi, kooƴaa kaaƴe bi'eteeɗe onikis ɗiɗi, de nyenyaa dow majje inɗe ɓiɓɓe Israa'iila bi'etenooɗo Yaakuuba oon. 10 Artiraa innde afo oon faa yaha e innde koddaajo oon, dow hayre fuu inɗe jeegom. 11 Hono no nyenyooɓe jamɗe nyenyirta, noon inɗe ɗeen nyenyirtee dow kaaƴe ɗiɗi ɗeen. Mooraa kaŋŋe, ngaɗanaa kaaƴe ɗeen tiigorkoy. 12 Ngattaa kaaƴe ɗiɗi ɗeen dow balaaje saaya ndeketeeka dow kaan, ɗe laatoo miccinooje Israa'iila'en. Haaruuna ɓornoo ka, de wadda inɗe maɓɓe ɗeen yeeso Joomiraaɗo, ɗe laatoo ko miccinta yimɓe Israa'iila. 13 Wooɗi du, mooraa kaŋŋe, ngaɗaa tiigorkoy, 14 takkaa koy dow balaaje saaya ndeketeeka dow kaan. Ngaɗaa ɓilduɗi kaŋŋe dimo ɗiɗi, kaɓɓaa dow makkoy.
15 Wooɗi, ngaɗaa basel inndirteengel basel kiite. Almaami haɓɓa ngel dow ɓernde mum. Ngel sanyiree nyeenyal hono no saaya ndeketeeka dow, canyiraaka moori kaŋŋe e gaaraaji bulabulaaji e bojjitooji e boɗeeji coy e leppi ɗaatuɗi kaan sanyiraa noon. 16 Ngel sowee nde wootere, njuuteefi maggel e njaajeefi maggel fuu laatoo fiyande newre.
17 Ndeen takkaa ngel kaaƴe dime, ɗe laatoo guurti nay dow maggel. Takkaa dow guurtol aranol ngool hayre woɗeere coy wi'eteende sardiyus e oolde wi'eteende topas e huɗo heccoore wi'eteende emeral. 18 Takkaa dow guurtol ɗiɗaɓol ngool hayre huɗo heccoore wi'eteende malakit e siiwre wi'eteende safiir e ɗelkoore wi'eteende diyama. 19 Takkaa dow guurtol tataɓol ngool hayre woɗeere hono ndiyam gooro wi'eteende jasinti e nde ciifi leydi-leydiire wi'eteende agat e woɗeere wi'eteende ametis. 20 Ndeen takkaa dow guurtol nayaɓol ngool, hayre huɗo heccoore seeɗa wi'eteende beril e raneere nde ciifi wi'eteende onikis e woɗeere seeɗa wi'eteende jaspa. Ammaa fadde majje takkeede dow basel ngeel, sanaa tummbaa ɗe, ɗe fuu ley moori kaŋŋe faa ɗi njogoo ɗe. 21 Nyenyaa dow majje du inɗe ɓiɓɓe Israa'iila 12 ɓeen, ɗe laatoo maande. Dow hayre fuu nyenyaa innde gooto maɓɓe, faa ɗum holla lenyi Israa'iila 12 ɗiin.
22 Ndeen ngaɗaa dow basel ngeel, ɓoggi ɓilduɗi ɗi kaŋŋe dimo karraaɗo. 23 Ngaɗaa jawe kaŋŋe ɗiɗi, de kaɓɓaa ɗe to seraaji maggel dowuuji ɗiɗi ɗiin. 24 Ndeen ɓilaa ɓilduɗi ɗiɗi ɗiin e jawe ɗeen. 25 Hono noon du kaɓɓirtaa seraaji majje ɗiɗi keddiiɗi ɗiin faro tiigorkoy mooraakoy ngonukoy dow balaaje saaya ndeketeeka dow kaan. 26 Katin ngaɗaa jawe kaŋŋe ɗiɗi, kaɓɓaa ɗe e coɓɓuli basel ɗiɗi keddiiɗi ɗiin, heedde ley, hakkunde maggel e saaya kaan. 27 Ngaɗaa katin jawe kaŋŋe ɗiɗi, kaɓɓaa ɗe sorde lefoy saaya njokkukoy dow balaaje kooy, faro yeeso makka. Wooɗi du, ɗe ɗakkondira dow to lefoy kooy kawrata e kaɓɓorgol makka toon. 28 Kaɓɓaa ɓoggol bulabulawol e jawe basel gonungel dow ɓernde ngeel, de kaɓɓaa ngol e jawe saaya kaan du heɓa ngol heddoo dow kaɓɓorgol ngool, taa ngol sotta.
29 Ndelle hono nii, wakkati Haaruuna naatata ley nokkuure seniinde ndeen fu, o jogoto inɗe ɓiɓɓe Israa'iila tawaaɗe dow basel kiite ngeel dow ɓernde makko. Hono nii inɗe ɗeen laatorto ko miccinta yimɓe ɓeen yeeso Joomiraaɗo wakkati fuu.
30 Ngattaa ley basel kiite ngeel «Urim» e «Tumim»*, ɗum wona dow ɓernde Haaruuna. Kujje ɗiɗi ɗeen tawete dow ɓernde Haaruuna nde yahata yeeso Joomiraaɗo fu. Hono nii Haaruuna ɓornortoo ko faaminta muuyɗe Joomiraaɗo e Israa'iila'en nde yahata yeeso Joomiraaɗo fuu.
31 Ngaɗaa saaya mbulabulooha. Ngaɗiraa ka gaaraaji bulabulaaji tan. Saaya ɓorneteeka dow kaan dekee dow mbulabulooha kaan. 32 Mbulabulooha kaan waɗanee daande, de daande ndeen sanyanee kommbol heɓa taa seekoo. 33 Ngaɗaa faro seraaji makka to kommbol toon alhaali ɓikkoy lekki rummaneehi. Ngaɗiraa ɗum gaaraaji bulabulaaji e bojjitooji e boɗeeji coy. Wooɗi du ngattaa lenngi kaŋŋe hakkunde ɓikkoy lekki rummaneehi kooy. 34 Hakkunde alhaali ɓikkoy rummaneehi ɗiɗi fuu ngaɗaa lennguru kaŋŋe, piiltinaa kommbol leyihol saaya kaan. 35 Nde Haaruuna waɗata gollal yeeso Joomiraaɗo fu, ɓornoo ka. Nde o naati nokkuure seniinde yeeso Joomiraaɗo e nde o wurtotoo fu, sonnyo lenngi ɗiin nanete heɓa taa o maaya.
36 Ngaɗaa maande seniinde nanndunde e pinndi. Ngaɗiraa nde e kaŋŋe dimo, de nyenyaa haala dow mayre hono no maande nyenyirtee noon. Haala kaan woni: CENANIIƊUM JOOMIRAAƊO. 37 Kaɓɓiraa pinndi ndiin ɓoggol bulabulawol dow kufune oon, heedde yeeso makko. 38 Ndi wona dow tiinde Haaruuna nde warata yeeso am fuu. Noon o ronndortoo hakkeeji Israa'iila'en ɗi ngaɗi e hokkugol kam dokke muɓɓen ceniiɗe, miin Joomiraaɗo. Wakkati fuu o watta maande seniinde ndeen dow tiinde makko faa ɓe njaɓee to Joomiraaɗo.
39 Ngaɗiron saaya tuppinaaka ngatteteeka ley kaan leppi ɗaatuɗi sanne. Hono noon du ngaɗirton kufune oon. Ngaɗaa du kaɓɓorgol tuppiniraangol e gaaraaji feere feere.
40 Ngaɗanaa ɓiɓɓe Haaruuna ɓeen du saayooji e kaɓɓorɗi e kufune faa ɗum maandina teddeengal e darja gollal muɓɓen.
41 Wooɗi, ɓornaa mawna, Haaruuna e ɓiɓɓe muuɗum kolte ɗeen, de njooraa nebbam dow ko'e maɓɓe, ɓe kalfinee gollal ngaal. Ɓe ceninee faa ɓe ngollana kam gollal almaamaaku.
42 Katin ngaɗanaa ɓe sarraaji leppi ɗaatuɗi, guddi, ɗi kaaɗa dow buse maɓɓe heɓa ɗi cudda ɓalli maɓɓe. 43 Wakkati nde Haaruuna e ɓiɓɓe muuɗum naatata hukum hawrugol Joomiraaɗo naa du wakkati ɓe ngarata to sakkirde faa ɓe ngaɗa gollal maɓɓe to nokkuure seniinde fu, ɓe ɓornoo ɗi. Si ɓe ɓornaaki ɗi fu, hakke majjum na waawi saabanaade ɓe maayde. Ɗuum laatanoo Haaruuna e ƴuwdi muuɗum yamiroore faa abada.