No Haaruuna e ɓiɓɓe muuɗum kokkirtee gollal almaamaaku
29
1 Wooɗi, ndaar ko ngaɗantaa Haaruuna e ɓiɓɓe muuɗum faa ceninaa ɓe, de ɓe ngolla gollal almaamaaku yeeso am. Kooƴaa ngaari e jawɗi ɗiɗi celluɗi ɗi ngalaa laru. 2 Katin keɓaa conndi alkamaari ceɗaandi faa wooɗi, ngaɗaa buuru mo njillaaka rabilla e maasaaje diiɓiraaɗe nebbam e almuɗe mooytiraaɗe nebbam. 3 Ngattaa ɗum ley hanndeere wootere, de ngaddiɗaa ɗum e ngaari ndiin e jawɗi ɗiin.4 Ngaddaa Haaruuna e ɓiɓɓe muuɗum to dammbugal hukum hawrugol Joomiraaɗo toon, lootaa ɓe. 5 Ndeen kooƴaa kolte almaamaaku ɗeen, ɓornaa Haaruuna. Ngattanaa ɗum forgo ɓorneteeɗo ley oon, e mbulabulooha kaan e saayo deketeengo e basel kaɓɓeteengel dow ngeel. Kaɓɓiraa ɗum kaɓɓorgol canyiraangol e nyeenyal ngool. 6 Ngattanaa mo kufune oon, kaɓɓaa dow kaɓɓorgol ngool maande winndaande «CENANIIƊUM JOOMIRAAƊO». 7 Kooƴaa nebbam ceninirɗam, njooraa dow hoore makko. Joorugol ngool hollata o senndaama saabe gollal ngaal. 8 Ndeen ngaddaa ɓiɓɓe makko ɓeen du, ɓornaa ɗum'en saayooji muɓɓen. 9 Kaɓɓanaa Haaruuna e ɓiɓɓe muuɗum kaɓɓorɗi ɗiin, de ngattanaa ɓe kufuneeje.
Noon Haaruuna e ɓiɓɓe muuɗum kalfinirtee almaamaaku. Ɗum laatanoo ɓe kamɓe e ƴuwdi maɓɓe yamiroore faa abada.
10 Ngaddaa ngaari ndiin yeeso hukum hawrugol Joomiraaɗo oon. Haaruuna e ɓiɓɓe muuɗum njowa juuɗe muɓɓen dow hoore mayri. 11 Kirsaa ndi yeeso Joomiraaɗo to dammbugal hukum toon. 12 Ittaa ƴiiƴam ɗaam seeɗa, cuuwa honndu maaɗa nder majjam, mooytaa luwe sakkirde ndeen. Ndufaa ƴiiƴam keddiiɗam ɗaam ɗakkol mayre. 13 Ndeen, ittaa ɓellere suddunde teketti ndeen fuu, ittaa du kaaɗungel ngeel e ɓooƴe ɗiɗi ɗeen e ɓellere suddunde ɗum'en ndeen, de mbulaa ɗum fuu dow sakkirde ndeen. 14 Ammaa teewu nguun e nguru nguun e ko heddii fuu, sanaa mbulaa ɗum yaasin hoɗorde. Wo ɗum sadaka yaafeede.
15 Kooƴaa ley jawɗi ɗiin, ngootiri, ngaɗaa Haaruuna e ɓiɓɓe muuɗum njowa juuɗe muɓɓen dow hoore mayri. 16 Ndeen kirsaa ndi, ittaa ƴiiƴam mayri mbiccaa dow sakkirde ndeen to seraaji mayre fuu. 17 Ndeen taƴaa teewu nguun geɓe geɓe, lootaa kujje reedu ɗeen e koyɗe mayri fuu, njowaa ɗum dow teewu nguun e hoore ndeen. 18 Mbulaa ɗum fuu dow sakkirde ndeen. Wo ɗum sadaka bulanteeɗo Joomiraaɗo, mo uurngol belngol. Wo ɗum sadaka buliraaɗo yiite saabe makko.
19 Katin du kooƴaa njawdiri ɗiɗaɓiri ndiin, ngaɗaa Haaruuna e ɓiɓɓe muuɗum njowa juuɗe muɓɓen dow hoore mayri. 20 Kirsaa ndi, ittaa ƴiiƴam mayri seeɗa, wujaa dow mbaggudi nowru Haaruuna nyaamru e ɗi ɓiɓɓe muuɗum fuu, e kolli juuɗe nyaame gori e ɗi koyɗe muɓɓen nyaame. Mbiccaa yiiƴam keddiiɗam ɗaam to seraaji sakkirde ndeen. 21 Nyeɗaa ƴiiƴam ngonɗam dow sakkirde ɗaam seeɗa, kawrondiraa e nebbam seningol ɗaam, de mbiccaa dow ɓanndu Haaruuna e dow kolte mum. Noon ngaɗirantaa ɓiɓɓe makko ɓeen du. Noon kanko e ɓiɓɓe makko e kaddule maɓɓe ceninirtee yeeso Joomiraaɗo.
22 Kooƴaa ɓellere njawdiri ndiin e laccol mayri, e ɓellere suddunde teketti mayri, e kaaɗungel mayri, e ɓooƴe mayri ɗiɗi ɗeen, e ɓellere suddunde ɗum'en ndeen, e busal mayri nyaamal, saabe wo ndi jawdiri naatugol e almaamaaku. 23 Ndeen kooƴaa ley handeere wonnde yeeso Joomiraaɗo ndeen, buuruure e maasaare nde nebbam e maasaare almunde, tawee ɗum fuu, ɗum walaa rabilla. 24 Ngattaa ɗum, ɗum fuu e juuɗe Haaruuna e ɓiɓɓe muuɗum, de ɓe njiila ɗum yeeso Joomiraaɗo. 25 Ndeen, njaɓaa ɗum e juuɗe maɓɓe, mbuldaa ɗum e njawdiri ndiin dow sakkirde ndeen, ɗum laatoo uurngol belngol to Joomiraaɗo. Wo ɗum sadaka buleteeɗo saabe Joomiraaɗo.
26 Kooƴaa doomre njawdiri cakkaandi saabe almaamaaku Haruuna'en ndiin, njiilaa nde yeeso Joomiraaɗo hono no ko sakkanaa Joomiraaɗo jeyi yiilireede noon. Kayre woni ngeɗu maaɗa. 27 Ceninaa nde, kayre e koyngal ittaangal ngaal, ɗum woni ko yiilaa e ko ittaa e njawdiri ndi Haaruuna e ɓiɓɓe muuɗum ceniniraa ndiin. 28 Ɗum laatoo ngeɗu Haaruuna e ɓiɓɓe muuɗum faa abada. Si Israa'iila'en ngaddii dokke sadakaaji jeɗeteeɗi fu, wo ɗum woni ko ittantee almaami'en, ɗum laatoo sadaka saabe Joomiraaɗo.
29 Wooɗi, kolte ceniiɗe ɗe Haaruuna ɓornotoo ɗeen, wo ɓiɓɓe muuɗum ɓornotoo ɗe gaɗa maayde mum. E majje ɓe njoordetee nebbam seningol, ɓe kokkee almaamaaku. 30 Ɓiyiiko donuɗo gollal almaamaaku fuu, wakkati wari faa golla ley nokkuure seniinde, nder hukum hawrugol Joomiraaɗo oon, sanaa ɓornoo ɗe balɗe jeɗɗi.
31 Kooƴaa teewu njawdiri naatugol e almaamaaku ndiin, njongaa ngu ley nokkuure seniinde ndeen. 32 Haaruuna e ɓiɓɓe muuɗum nyaamda ngu e buuru gonɗo ley handeere, to dammbugal hukum hawrugol Joomiraaɗo toon. 33 Saabe sadaka oon, hakkeeji maɓɓe njaafete, ɓe seninaaɓe saabe gollal almaamaaku. Ɓe nyaamnda teewu cakkaangu nguun e buuru oon. Ammaa taa goɗɗo feereejo fuu nyaama ndu, sabo wo ndu nyaamndu seniindu. 34 Si teewu nguun e buuru oon nyaamdaaka faa waali weeti fu, sey ɗum wulee. Taa goɗɗo fuu nyaama ɗum, sabo wo ɗum ceniinɗum.
35 Wooɗi, ngaɗanaa Haaruuna e ɓiɓɓe muuɗum ko mbi'umaami ɗuum fuu, ngaɗiraa ɗum hono no mbiirumaami noon. Ngaɗiraa gollal seninde ɓe ngaal balɗe jeɗɗi. 36 Ley jeɗɗiire ndeen, nyannde fuu, kirsaa ngaari kalahaldi ngootiri, cakkaa ndi dow sakkirde ndeen saabe ittugol hakkeeji. Noon laaɓinirtaa sakkirde ndeen. Njooraa nde nebbam seningol faa nde laatoo seniinde. 37 Balɗe jeɗɗi ngaɗirtaa kirsamaaji saabe ittugol hakkeeji, faa sakkirde ndeen seninee. Ndeen nde laatoto seniinde, senndanaande Joomiraaɗo. Ko meemi nde fuu laatoto ko senii.
Kirsamaaji gaɗeteeɗi nyannde fuu
38 Wooɗi, ndaar ko cakkataa nyannde fuu dow sakkirde ndeen: njawkoy ɗiɗoy koy ndunngu ngootu. 39 Cakkaa ngootel subaka, ngootel du laasara. 40 Kawrinaa cakkidaa jawgel arandeyel ngeel e etirgal kilooji ɗiɗi conndi ceɗaandi ɗiggundi e nebbam jaytun ko fotata e faandu wooturu. Cakkaa du cabijam faandu wooturu, ɗum laatoo sadaka njaram. 41 Ndeen jawgel ɗiɗaɓel ngel cakkataa laasara ngeel du, cakkidaa ɗum e conndi e nebbam e cabijam hono no ngaɗirnoɗaa subakeyel noon, ɗum laatoo uurngol belngol to Joomiraaɗo. 42 Sadaka buleteeɗo oon, on keddoto e waɗude ɗum ley jamaanuuji garooji faa abada. On mbulan ɗum yeeso am, to dammbugal hukum hawrude kam, to kaaldammi e maaɗa. 43 Toon kawrammi e Israa'iila'en du. Teddeengal am seninan nokkuure ndeen. 44 Mi seninan hukum hawrude kam oon e sakkirde ndeen. Katin mi seninan Haaruuna e ɓiɓɓe muuɗum faa ɓe ngollana kam gollal almaamaaku. 45 Mi wondan e Israa'iila'en, mi laatoo Laamɗo maɓɓe. 46 Ndeen ɓe annditan miin woni Laamɗo Joomiraaɗo maɓɓe burtinɗo ɓe ley leydi Misira faa wonda e maɓɓe. Miin woni Laamɗo Joomiraaɗo maɓɓe.