No wulirde ure waɗirtee
30
1 Wooɗi, ngaɗaa wulirde ure. Ngaɗiraa nde leɗɗe ngawdi. 2 Njuuteefi mayre waɗa fiyande wootere, njaajeefi mayre du waɗa noon. Tooweefi mayre waɗa piyanɗe ɗiɗi. Ndeen, ngaɗaa alhaali luwe to coɓɓuli mayre nay ɗiin, ɗe ceŋoo e mayre. 3 Mooytaa dow mayre, e seraaji mayre, e luwe mayre fuu kaŋŋe dimo, de piiltinaa koɗol kaŋŋe dow mayre. 4 Ngaɗaa jawe kaŋŋe ɗiɗi. Ley majje toon ngaɗaa cabbi ɗi nde ƴeptirtee. Ngaɗaa ɗi ley koɗol ngool, to gereeji ɗiɗi kuccundurɗi ɗiin. 5 Ngaɗiraa cabbi ɗiin leɗɗe ngawdi, de mooytaa ɗi kaŋŋe.6 Ndesaa nde yaasin lefol cuddungol keesuwal alluuje amaana. Nde huccita e ommboode wonnde dow keesuwal to alluuje amaana ndesetee toon, to kawrammi e maaɗa. 7 Nyannde fuu, Haaruuna wula uurdi ndi uurngol mbelngol dow mayre. Si o warii faa o moƴƴina fitillaaji ɗiin fu, sanaa o wula ndi. 8 Hono noon du, si o wari kiiral naange faa o huɓɓa fitillaaji ɗiin fu, sanaa o wula uurdi ndiin. Hono nii uurdi ndiin heddortoo na suurta yeeso Joomiraaɗo wakkati fuu ley jamaanuuji garooji faa abada. 9 Taa mbulaa ure goɗɗe, naa dammuccere, naa gawri dow mayre. Taa njoora cabijam du dow mayre faa ngaɗaa sadaka.
10 Ley hitaande fuu, nde wootere, Haaruuna hooƴa ƴiiƴam dammuccere cakkaande saabe hakke, de mooyta luwe wulirde ndeen. Wo ɗum ƴiiƴam ittoojam hakke. Noon ɗum waɗirtee faa e jamaanuuji garooji.
Wulirde ndeen woni ɓurnde senaade to Joomiraaɗo.
Ceede kokketeeɗe si lenyol limaama
11 Joomiraaɗo wi'i Muusaa katin:
12 — Nde limuɗaa Israa'iila'en fu, sanaa neɗɗo fuu wadda ceede faa rimɗina hoore mum to Joomiraaɗo. Hono nii masiiba fuu saamataa dow maɓɓe wakkati limngal ngaal. 13 Neɗɗo fuu limaaɗo yoɓan feccere mbuuɗu cardi* fodde etirgal suudu seniindu. Fodde maggal, teddeefi mbuuɗu cardi na hawra e geeraaji 20. Wo ɗum dokkal gaɗanteengal Joomiraaɗo. 14 Neɗɗo limaaɗo fuu, gilla mo duuɓi 20 faa e ko ɓuri ɗoon, sanaa wadda ceede ɗeen ɗo Joomiraaɗo. 15 Jom jawdi hokkataa ko ɓuri feccere mbuuɗu cardi, noon du talkaajo hokkataa ko yottaaki feccere mbuuɗu cardi. Neɗɗo fuu hokka ɗe Joomiraaɗo faa rimɗina hoore mum e halkere.
16 Njaɓaa ceede ɗe Israa'iila'en ngaddi faa ndimɗina ko'e muɓɓen ɗeen, ɗe ngolliree to hukum hawrugol Joomiraaɗo toon. Ɗum laatoo ko miccinta kam ɓe, miin Joomiraaɗo faa mi rimɗina ɓe.
No Keeɗe cardi ngaɗirtee
17 Joomiraaɗo wi'i Muusaa katin: 18 waɗu heeɗo njamndi mboɗeeri lootorgo. Ngaɗiraa joƴƴinirde maggo njamndi mboɗeeri. Ndesaa ngo hakkunde sakkirde e hukum hawrugol Joomiraaɗo. Ngattaa ndiyam ley maggo. 19 Ndiyam ɗaam Haaruuna e ɓiɓɓe muuɗum lootirta juuɗe muɓɓen e koyɗe muɓɓen. 20 Nde ɓe naatata ley hukum oon fu, sanaa ɓe loota juuɗe maɓɓe e koyɗe maɓɓe tafon, heɓa taa ɓe maaya. Nde ɓe ngarata to sakkirde ndeen faa ɓe cakkana Joomiraaɗo sadaka buleteeɗo fu, 21 ɓe loota juuɗe maɓɓe e koyɗe maɓɓe tafon, heɓa taa ɓe maaya. Ɗum laatanto Haaruuna e ƴuwdi muuɗum yamiroore faa abada.
No nebbam seningol waɗirtee
22 Joomiraaɗo wi'i Muusaa:
23 — Kawrondira ure ɓurɗe uurde ɗuum woni ɗakke lekki miiri kilooji jeegom, e ceɓe lekki sinamon kilooji tati, e kuɗooli uurooji kilooji tati, 24 e ceɓe kasiihi kilooji jeegom. Ɗum fuu ɗum fonndiree e etirgal suudu seniindu. Kooƴaa liitereeji nebbam jaytun nay, 25 kawrondiraa ɗum fuu. Gaɗoowo uurdi oon diiba ɗum waɗa nebbam. Wo ɗam nebbam seningol. 26 Njooraa ɗam de ceninaa hukum hawrugol Joomiraaɗo oon, e keesuwal Amaana ngaal, 27 e taabawal ngaal, e ko gollirtee ley maggal fuu, e joƴƴinirde fitillaaji ndeen, e ko gollirtee ley mayre fuu, e wulirde ure ndeen, 28 e sakkirde sadakaaji buleteeɗi ndeen, e ko gollirtee ley mayre fuu, e heeɗo ngoon e joƴƴinirde maggo. 29 Njooraa ɗam faa ceninanaa kujje ɗeen fuu Joomiraaɗo, ɗe laatoo ko ɓuri senaade. Ko meemi ɗe fuu laatoto ko senii.
30 Njooraa Haaruuna e ɓiɓɓe muuɗum du nebbam ɗaam faa ceninaa ɓe, de ɓe ngollana kam gollal almaamaaku.
31 Kaalanaa Israa'iila'en, mbi'aa ɓe kanjam woni nebbam seningol faa e jamaanuuji garooji. 32 On mbujataako ɗam, on ngaɗataa iri majjam du, sabo wo ɗam ceniiɗam. Noon ndaardoton ɗam. 33 Neɗɗo fuu gaɗuɗo iri majjam naa du jooranɗo ɗam goɗɗo mo haanaa laataade almaami fuu ittete e lenyol.
No uurdi suudu seniindu waɗirtee
34 Joomiraaɗo wi'i Muusaa:
— Hawrondir ure uurooje ɗuum woni ɗakke uurooje e oniika e ɗakke galbanum. Ndeen kooƴaa uurde labona ɓurnde uurde, ɗum fuu tawee etirgal majjum wo fotu cak. 35 Gaɗoowo ure oon hawrondira ɗum waɗa uurde. O watta nde lamɗam, wooɗi du nde laatoo laaɓunde e seniinde saabe am. 36 Niisaa seeɗa mayre ndesaa yeeso keesuwal Amaana, ley hukum hawrude kam, ɗo kawrammi e maaɗa. Nde laatanto on ko ɓuri senaade. 37 Taa ngaɗonon ko'e mooɗon iri mayre. Nde laatanto on seniinde saabe Joomiraaɗo. 38 Neɗɗo gaɗuɗo iri mayre faa nana uurngol mayre fuu, ittete e lenyol.