Besaliilu e Oholiyab gollooɓe
31
1 Wooɗi, Joomiraaɗo wi'i Muusaa:2 — Ndaar, mi suɓake Besaliilu ɓii Uri, taan Hur, mo lenyol Yahuuda. 3 Mi hebbinii mo Ruuhu am faa o heɓa hakkillo e paamal e anndal e caral waɗude golleeji feere feere. 4 O heɓa hakkillo waɗirde kujje lobbe e kaŋŋe e cardi e njamndi mboɗeeri, 5 e no o sehirta kaaƴe dime e no o waɗirta ko tiigotoo ɗe, e no o sehirta leɗɗe, e iri gollal fuu. 6 Katin mi hokkii mo balloowo, oon woni Oholiyab ɓii Ahisamak mo lenyol Dan. Mi hokkii waawuɓe waɗude iri gollal ngaal fuu anndal faa ngaɗa ko njamirmaami ɗuum fuu, 7 ɗuum woni hukum hawrude kam e keesuwal alluuje amaana e ommboode muuɗum e ko gollirtee ley hukum oon fuu, 8 e taabawal e gollirɗe muuɗum, e joƴƴinirde fitillaaji waɗiraande kaŋŋe dimo e gollirɗe muuɗum, e wulirde ure ndeen. 9 Wooɗi du, e sakkirde sadakaaji buleteeɗi e gollirɗe mayre, e heeɗo e joƴƴinirde maggo, 10 e kolte nyootiraaɗe nyeenyal ceniiɗe ɗe Haaruuna almaami e ɓiɓɓe muuɗum ɓornotoo saabe gollal almaamaaku, 11 e nebbam seningol e ure buleteeɗi ley nokkuure seniinde. Ɓe ngaɗa huunde fuu hono no njamirmaami noon.
Nyalaande fowteteende
12 Joomiraaɗo wi'i Muusaa katin:
13 — Kaalanaa Israa'iila'en mbi'aa ɓe: «Mi waɗii nyalaande fowteteende. Tilay ndeenon nde. Kanjum woni maanaa hakkunde am e mooɗon. Ley jamaanuuji garooji maanaa oon wo kolloowo miin Joomiraaɗo, mi seninii on saabe am. 14 Sanaa ndeenon nde, sabo wo nde seniinde to mooɗon. Mo hakkilanaay nde, jogaaki nde wo nde seniinde fuu, wo bareteeɗo. Golluɗo nyalaande ndeen fuu, ittete e lenyol. 15 Nyalaaɗe jeegom ngaɗirton golleeji mooɗon, ammaa nyalaande jeɗɗaɓerde ndeen wo nyalaande fowteteende. On ngollataa fey. Nde seniinde saabe am. Neɗɗo fuu golluɗo nyaande ndeen wo bareteeɗo. 16 Sanaa Israa'iila'en fuu ndeena nde, nde laatoo nyalaande fowteteende faa e jamaanuuji garooji. Wo ɗum amaana keddotooɗo faa abada. 17 Wo nde maande hakkunde am e mooɗon faa abada. Sabo ley nyalaaɗe jeegom tagumi kammu e leydi, de nyalaande jeɗɗaɓerde powtumi e gollal ngaal.»
18 Nde Joomiraaɗo tilinoo haaldude e Muusaa dow waamnde Sinayi fu, hokki ɗum alluuje ɗiɗi miccinooje amaana, wo ɗe alluuje kaaƴe ɗe Laamɗo e hoorem winndiri honndu muuɗum.