No Joomiraaɗo ɓangirani Israa'iilankooɓe to waamnde Sinayi
19
1 Ley lewru tataɓuru caggal wurtagol yimɓe Israa'iila e Misira ndeen, ɓe njottii ladde Sinayi. 2 Ndelle nde ɓe ndillunoo Refidim, ɓe njottii ladde Sinayi fu, ɓe koɗi ley ladde toon yeeso waamnde Sinayi ndeen.3 Muusaa ƴeeŋi dow waamnde faa hawra e Laamɗo. Joomiraaɗo noddi mo dow waamnde toon, wi'i mo:
— Inan ko kaalantaa yimɓe Israa'iila, ƴuwdi Yaakuuba:
4 Onon e ko'e mon, on nji'ii ko ngaɗumi Misirankooɓe. Mi yowii on hono dow bippeele ciilal, ngaddumi on to am. 5 Wooɗi joonin du si on kettindake haala am, si on njokkii amaana am, on laatoto jeyal am korsungal hakkunde lenyi yimɓe fuu, sabo miin jeyi adunaaru fuu. 6 On laatoto laamu almaami'en e lenyol ceniingol. Ɗi ngoni haalaaji ɗi kaalantaa Israa'iilankooɓe.
7 Muusaa yeccii to hoɗorde toon, noddi mawɓe yimɓe ɓeen. O haalani ɗum'en haalaaji ɗi Joomiraaɗo yamiri mo ɗiin fuu. 8 Caggal ɗuum yimɓe fuu nootii daande wootere, mbi'i:
— Ko Joomiraaɗo yamiri fuu min ngaɗan ɗum.
— Mi waran to maa ley ruulde tekkunde faa yimɓe nana miɗo haalda e maaɗa heɓa ɓe koole faa abada.
— Yahu to yimɓe ɓeen, mbi'aa ɓe ɓe cenina ko'e maɓɓe hannden e jaango fuu. Ɓe lonna kaddule maɓɓe. 11 Ndeen ɓe cegiloo wooɗa sabo nyannde tataɓerde miin Joomiraaɗo mi jippoto dow waamnde Sinayi yeeso yimɓe Israa'iila fuu. 12 Kollaa yimɓe ɓeen kaddi to ɓe ndarotoo ɓe piiloo waamnde ndeen, ɓe kakkila taa ɓe ƴeeŋa dow mayre, taa ɓe ɓattoo nde fey. Ko meemi waamnde ndeen fuu warete. 13 Ko meemi waamnde ndeen fuu taa junngo meema ɗum. Ɗum limnee kaaƴe maa ɗum fiɗee kure si wo daaba naa si wo neɗɗo. Nde ɓe nanii luwal njawdiri ina fuufee fu, iɓe mbaawi ƴeeŋude.
14 Muusaa jippii waamnde ndeen, yehi to yimɓe ɓeen, senni ɗum'en. Ɓe lonni kaddule maɓɓe. 15 O wi'i ɓe:
— Cegilanee faɓɓi-jaango. Taa fay gooto meema debbo.
16 Nyannde tataɓerde ndeen, gilla fajiri, pelnyaali e maƴƴe e ruulde tekkunde ngaɗi dow waamnde ndeen. Wooɗi fuufaango luwal semmbiɗingo du nanaa. Yimɓe wonɓe ley hoɗorde ndeen fuu keddii ina ndiwna kulol. 17 Muusaa wurtini yimɓe ɓeen ley hoɗorde muɓɓen faa ɓe kawra e Laamɗo. Ɓe ndarii ley waamnde ndeen.
18 Cuurki suddi waamnde Sinayi fuu sabo Joomiraaɗo jippake ley yiite. Cuurki kiin ina ƴeeŋa dow hono cuurki duppirde mawnde ni. Waamnde ndeen fuu dimmbii e semmbe. 19 Fuufaango luwal ngoon ina ɓeydoo e semmbe. Wakkati oon fu, Muusaa haali, de Laamɗo jaabii ɗum e daande nanndude e riggaango. 20 Joomiraaɗo jippii dow hoore waamnde Sinayi, noddi Muusaa wara to muuɗum. De Muusaa ƴeeŋi faa dow mayre. 21 Laamɗo wi'i Muusaa:
— Jippa kaalanaa yimɓe ɓeen taa paltoo kaddi faa ɓattoo ndaara kam de heewɓe kalka. 22 Almaami'en waawɓe ɓattaade kam miin Joomiraaɗo ɓeen du cenina ko'e muɓɓen taa mi halka ɗum'en.
23 Muusaa wi'i Joomiraaɗo:
— Yimɓe ɓeen mbaawaa ƴeeŋude dow waamnde Sinayi sabo aan e hoore maa a wi'ii min min ngaɗa kaddi to min ndarotoo min piiloo waamnde ndeen, min ndaarda nde wo nde seniinde.
24 Joomiraaɗo wi'i mo:
— Jippa ley hoɗorde toon de ƴeeŋidaa e Haaruuna, ammaa taa almaami'en e yimɓe ɓeen paltoo kaddi ndiin faa ƴeeŋa to am de mi halka ɗum'en.
25 Muusaa jippii to yimɓe ɓeen, haalani ɗum'en.