Muusaa e esum Yetiro
18
1 Yetiro almaami Madiyan esoo Muusaa nani ko Laamɗo waɗani Muusaa e Israa'iila'en, yimɓe muuɗum. O nani no Joomiraaɗo wurtiniri ɓe leydi Misira. 2 Tawi arande Muusaa waɗiino deekum Sifoora hooti to bammum Yetiro. Yetiro hooƴi yaari mo kanko 3 e ɓiɓɓe makko worɓe ɗiɗo. Gooto ina wi'ee Gersom (Janano) sabo nde Muusaa rimananoo mo ndeen, haalii wi'i: «Wo mi janano nder leydi njananndi.» 4 Gooto oon du ina wi'ee Eliyeser, (Laamɗo woni ballo am) sabo Muusaa wi'i: «Laamɗo baabam wallii kam, danni kam e kaafaahi Fira'awna.»5 Yetiro esoo Muusaa oon kam e ɓiɓɓe Muusaa ɗiɗo ɓeen e inna muɓɓen ngari to Muusaa ley ladde to hoɗi toon, ɗakkol waamnde Laamɗo. 6 Yetiro nuli Muusaa wi'ee:
— Miin Yetiro esa, miɗo warda e deeka e ɓiɓɓe maaɗa ɗiɗo to maaɗa.
7 Muusaa yehi hawri e esum oon, leeƴinanii ɗum, muccii ɗum. Ɓe njowtonduri de ɓe naati ley hukum. 8 Muusaa haalani esum fuu ko Joomiraaɗo waɗi Fira'awna e Misirankooɓe saabe yimɓe Israa'iila e torraaji kewtuɗi ɓe ley jahaangal maɓɓe e no Joomiraaɗo danniri ɓe. 9 Nde Yetiro nannoo kabaaru lobbo dow ko Joomiraaɗo waɗani yimɓe Israa'iila nde wurtinnoo ɓe ley baawɗe Misirankooɓe fu, ɗum seyni ɓernde muuɗum. 10 O wi'i:
— Yettoore woodani Joomiraaɗo dannuɗo on e juuɗe Misirankooɓe e junngo Fira'awna, dannuɗo yimɓe ɓeen e maccungaaku Misira. 11 Joonin mi anndii Joomiraaɗo ina ɓuri allaaji feere fuu manngu sabo ndaar ko o waɗi Misirankooɓe mawninɓe ko'e muɓɓen dow yimɓe Israa'iila!
12 Yetiro esoo Muusaa oon waddani Laamɗo dokkal buleteengal e kirsamaaji. Ndeen Haaruuna adi mawɓe yimɓe Israa'iila fuu. Ɓe ngari, ɓe nyaamdi e esoo Muusaa yeeso Laamɗo.
No sarotooɓe jamaa yimɓe cuɓiraa
13 Jaangoore majjum Muusaa jooɗii faa saroo yimɓe. Ɓe ngari ɗo muuɗum gilla beetee faa janal naange. 14 Nde esum yi'unoo ko o waɗanta yimɓe ɗuum fu, wi'i mo:
— Ɗume woni ko ngaɗantaa yimɓe ɓe ɗuum? Ko waɗi aɗa saroo aan tan de yimɓe ɓe ina ndarii ɗakkol maa gilla beetee faa janal naange?
15 Muusaa jaabii mo, wi'i:
— Yimɓe ɓeen ina ngara to am faa paama muuyɗe Laamɗo. 16 Si woɓɓe ndewraay fu, ngaran to am mi saroo hakkunde muɓɓen, mi anndinaa ɓe jamirooje e sariyaaji Laamɗo.
17 Esoo Muusaa oon jaabii, wi'i:
— No ngattaa nii wooɗaa. 18 Aan e yimɓe warooɓe to maa fuu, on tampan tan. Gollal ngaal ina heewani ma. A waawaa ɗum aan tan. 19 Joonin kettindanoɗaa kam. Mi haalante no ngaɗataa, de Laamɗo du wonda e maaɗa. Golle maaɗa wo, daranaade yimɓe ɓe yeeso Laamɗo e waddude kabaaruuji careteeɗi yeeso muuɗum. 20 Njannginaa ɓe jamirooje e sariyaaji makko. Anndinaa ɓe laawol ngol ɓe ndewata e ko ɓe ngaɗata. 21 Wooɗi joonin le, ndaaraa hakkunde yimɓe ɓe fuu, de cuɓoɗaa worɓe saahiiɓe, hulooɓe Laamɗo, hoolniiɓe, wanyuɓe jawdi batala. Ngaɗaa woɓɓe maɓɓe laatoo hooreeɓe dow yimɓe 1 000, woɓɓe du dow yimɓe 100, woɓɓe du dow yimɓe 50, woɓɓe du dow yimɓe sappo. 22 Kamɓe njooɗotoo wakkati fuu faa caroo yimɓe ɓeen. Ko tiiɗi ɓe fuu, ɓe ngadda ɗum to maaɗa. Si tiiɗaay du ɓe caroo ɗum kamɓe e ko'e maɓɓe. Noon golleeji maaɗa ɓuytortoo sabo ɓe ndonndodoto e maaɗa donngal gollal ngaal. 23 Si a waɗii noon, si tawii du wo noon Laamɗo yamiri ma fu, a tampataa, yimɓe ɓeen du kootan ina ndewri.
24 Muusaa jaɓi tindinooje esum, waɗi ko o wi'i ɗuum fuu. 25 O suɓii worɓe saahiiɓe hakkunde yimɓe Israa'iila fuu, o waɗi ɓe hooreeɓe yimɓe ujune ujune e hemre hemre e capanɗe joy joy e sappo sappo. 26 Kamɓe carotoo yimɓe ɓeen wakkati fuu. Ko tiiɗani ɓe fuu, ɓe njaaran ɗum to Muusaa. Ko tiiɗaa du ɓe caroto ɗum kamɓe e ko'e maɓɓe.
27 Caggal ɗuum, Muusaa waynii esum, de oon soƴƴii leydi muuɗum.