<<    <     Wurtagol     17     >    >> 
No Joomiraaɗo wurtiniri ndiyam ley tefaare
17
1 Jamaa Israa'iila fuu dilli ladde Cin hono no Joomiraaɗo yamiri ɓe noon. Ɓe ndewi nokkuuje feere feere faa ɓe njottii Refidim. Ammaa ɓe tawaay ɗoon ndiyam njareteeɗam. 2 Ndeen ɓe kaɓi e Muusaa, ɓe mbi'i ɗum:
— Hokku min ndiyam min njara.
Muusaa jaabii ɓe, wi'i:
— Ko waɗi oɗon piloo haɓude e am? Ko waɗi oɗon ndaartindoo Joomiraaɗo?
3 De saabe ɗomka ina jogii ɓe sanne, ɓe puɗɗi iɓe ŋurŋurtana Muusaa. Ɓe mbi'i:
— Ko waɗi mburtinɗaa min Misira? Yalla faa minen e ɓiɓɓe amin e kulle amin fuu min maaya ɗomka ɗo naa?
4 Muusaa wullii to Joomiraaɗo, wi'i:
— Noy ngaɗanammi yimɓe ɓe? Inani iɓe ndarii faa ɓe limna kam kaaƴe.
5 Joomiraaɗo jaabii Muusaa, wi'i:
— Ƴuuru yeeso jamaa oon, kooƴaa woɓɓe hakkunde mawɓe yimɓe Israa'iila. Kooƴaa du sawru ndu piiruɗaa maayo Nil nduun, njahaa. 6 Miin mi daroto yeeso maaɗa dow hayre wonnde Horep. Piyaa hayre ndeen faa ndiyam wurtoto e mayre de yimɓe ɓeen njara.
Wooɗi Muusaa waɗiri noon yeeso mawɓe Israa'iila'en. 7 O inndiri nokkuure ndeen Massa e Meriba, ɗum na fiirta «Ndaartindaade» e «Luural» sabo wo ɗoon yimɓe Israa'iila luuri e Muusaa. Ɗoon du ɓe ndaartindii Joomiraaɗo, ɓe mbi'i:
— Yalla Joomiraaɗo ina wondi e meeɗen naa waldaa?
Wolde Amaleki'en e Israa'iilankooɓe
8 Amaleki'en ngari faa kabda e Israa'iilankooɓe ley Refidim. 9 Muusaa wi'i Yoosuwa:
— Suɓana en worɓe de njalton, kaɓdon e Amaleki'en. Jaango mi daroto dow hoore waamnde, mi tiigoo sawru Laamɗo e junngo am.
10 Yoosuwa ƴeeŋi haɓdowii e Amaleki'en hono no Muusaa yamiri ɗum noon. Muusaa e Haaruuna e Huuru kaa njehi faa dow hoore waamnde. 11 Nde Muusaa ƴepti juuɗe muuɗum dow fu, wo Israa'iila'en kam'en njaalotoo, ammaa nde o jippini ɗe fu, wo Amalekinkooɓe njaalotoo. 12 Ammaa juuɗe Muusaa comi sanne. Ndelle Haaruuna e Huuru kooƴi hayre ngaddani ɗum faa jooɗoo. Nde o jooɗinoo fu, Haaruuna e Huuru tiigii juuɗe makko, gooto ina woni gere nyaamo, gooto du gere nano. Juuɗe Muusaa keddii ina ƴeptorii noon faa kiiral naange. 13 Yoosuwa du heɓi jaalogal manngal dow Amaleki'en, o jaalorii ɓe kaafaahi.
14 Joomiraaɗo wi'i Muusaa:
— Winndu ɗum fuu nder dewtere faa taa ɗum yeggitee. Hollu Yoosuwa, mi halkan Amaleki'en fuu faa abada, faa taa fay gooto miccitoo ɓe e adunaaru.
15 Muusaa nyiɓi sakkirde, inndiri nde «Joomiraaɗo wo mo kawreten to mum de njaaloɗen». 16 O wi'i: Saabe Amaleki'en cuusii, ƴeptii juuɗe muɓɓen faa kaɓda e jooɗorgal Joomiraaɗo, joonin Joomiraaɗo du haɓdan e maɓɓe faa abada.