No lenyi Israa'iila goɗɗi cuɓorii leydi lettugal Urdun
32
1 Taaniraaɓe Ruben e Gad na ngoodunoo cogge mawɗe ɗuuɗɗe. Ɓe ndaari leydi Yajer e leydi Galaad, ɓe tawi iɗe ɓooɗani durngol. 2 Ɓe ngari to Muusaa e almaami Eliyajar e mawɓe Israa'iila fuu ɓe mbi'i:— 3 Kuɓeeje Atarot e Dibon e Yajer e Nimra e Hesbon e Elale e Sebam e Nebo e Beyon, 4 leydi ndi Joomiraaɗo jaalii yeeso jamaare Israa'iila ndiin na wooɗani durngol, wooɗi du, minen yimɓe maaɗa miɗen njogii cogge tekkuɗe.
5 Ɓe mbi'i katin:
— Si nii a yardake, leydi ndiin laatoo jeyal amin, minen maccuɓe maaɗa fu, walaa ko min peƴƴita Urdun.
6 Muusaa jaabii ɓe wi'i:
— Ɗume? Ndelle, on accan sakiraaɓe mooɗon njaha wolde de onon kaa keddoɗon ɗo naa? 7 Ko saabii de oɗon kulɓina Israa'iilankooɓe taa njottoo leydi ndi Joomiraaɗo hokki ɗum'en ndiin. 8 Noon pay baabiraaɓe mooɗon du ngaɗunoo nde nelnoomi ɗum'en njaha korowa leydi ndiin nde ngonnoɗen Kades-Barneya ndeen. 9 Ɓe kewtowi faa naɗɗol Eskol, ɓe ƴeewi leydi ndiin de ɓe ngartidi e hulɓinde Israa'iilankooɓe taa njottoo leydi ndi Joomiraaɗo hokki ɗum'en ndiin.
10 Nyannde majjum Joomiraaɗo tikki sanne de hunii wi'i: 11 «Abada worɓe wurtiiɓe leydi Misira hewtuɓe duuɓi 20 e ko ɓuri noon nji'ataa leydi ndi podaninoomi Ibrahiima e Isiyaaka e Yaakuuba ndiin sabo ɓe cikkitirii kam. 12 Si wanaa Kaalibu ɓii Yefunne Kenisinke e Yoosuwa ɓii Nuun ɗowtoraniiɓe kam yardamuye ɓeen.»
13 Noon Joomiraaɗo tikkirani Israa'iilankooɓe ɓeen de waɗi iɓe njiiloo ley ladde yoornde faa waɗi duuɓi 40 faa tikkinnooɓe ɗum ɓeen fuu maayi. 14 De onon, lenyol waɗooɓe hakke, inan oɗon ndewa laawol ngol baabiraaɓe mooɗon ndewunoo faa ɓeydon tikkere Joomiraaɗo dow Israa'iila! 15 Si nii on njeebake jokkude mo fu, o ɓooynan Israa'iilankooɓe ley ladde yoornde ndee, laatoo du, onon caabanii ɓe halkere.
16 Worɓe ɓeen ɓattitii Muusaa de mbi'i ɗum:
— Ɗoo min kowanta dammuuli amin hoggooji, min nyiɓana koreeji amin galluuje 17 de min kooƴa kaɓitirɗe amin min ardoo Israa'iilankooɓe faa njottowo leydi muɓɓen. Koreeji amin keddoto ley galluuje deeniraaɗe kokkuuji saabe yimɓe leydi ndi. 18 Min njeccataako gure amin si wanaa nde Israa'iilanke fuu heɓi ndongu muuɗum. 19 Ammaa min ngalaa ngeɗu hakkunde maɓɓe gorgal Urdun toon, sabo ngeɗu amin wo lettugal Urdun hetti.
20 Muusaa wi'i ɓe:
— Ndelle si nii on ngaɗii ko mbiiɗon ɗuum, on kooƴii kaɓitirɗe mooɗon yeeso Joomiraaɗo faa njahon konu, 21 si konunkooɓe mooɗon fuu peƴƴiti maayo Urdun yeeso Joomiraaɗo faa nde o riiwi wayɓe makko fuu, 22 tawi on njeccaaki faa nde leydi ndiin laatanii Joomiraaɗo fu, hakke walaa dow mooɗon yeeso Joomiraaɗo e yeeso Israa'iilankooɓe fuu. Wooɗi du, leydi ndii laatoto jeyal mooɗon yeeso Joomiraaɗo. 23 Ammaa si on ngaɗaay noon fu, on ngaɗi hakke yeeso Joomiraaɗo, wooɗi du paamon hakke mon oon saaman dow ko'e mooɗon. 24 Ndelle, nyiɓanee yimɓe mooɗon galluuje, kowanon dammuuli mooɗon hoggooji, ammaa taa njeggiton aadi burtiiɗo e kunnduɗe mooɗon oon.
25 Ɓiɓɓe Ruben e ɓe Gad mbi'i Muusaa:
— Joomii amin ko mbiiɗaa fuu maccuɓe ma ngaɗan. 26 Deekiraaɓe amin e sukaaɓe amin e daabaaji amin fuu keddoto ley kuɓeeje Galaad. 27 Minen maccuɓe maaɗa du min kooƴan kaɓitirɗe amin de min peƴƴitida e mooɗon maayo Urdun yeeso Joomiraaɗo, fodde no aan joomii amin mbiiruɗaa noon.
28 Muusaa hokki almaami Eliyajar e Yoosuwa ɓii Nuun e hooreeɓe cuuɗi Israa'iila jamirooje dow maɓɓe. 29 O wi'i ɓe:
— Si nii ɓiɓɓe Ruben e Gad peƴƴitidii e mooɗon maayo Urdun, ɓe fuu iɓe tiigii kaafaaje maɓɓe faa ɓe kona yeeso Joomiraaɗo, wakkati njeytoyɗon leydi ndiin fu, kokkon ɓe leydi Galaad. 30 Ammaa si ɓe peƴƴitidaay e mooɗon iɓe tiigii kaɓitirɗe maɓɓe fu, ngeɗu maɓɓe e leydi Kanaana ndiin ittetee hakkunde mooɗon.
31 Ɓe njaabii katin ɓe mbi'i:
— Ko Joomiraaɗo yamiri min, minen maccuɓe maaɗa fuu min ngaɗan. 32 Min kooƴan kaɓitirɗe amin de min naata leydi Kanaana yeeso Joomiraaɗo ammaa ngeɗu amin leydi wo lettugal Urdun hetti.
33 Muusaa hokki ɓe kamɓe e feccere lenyol Manasa ɓii Yuusufi leydi Sihon kaananke Amorinkooɓe e leydi Oga kaananke Basan, leyɗe ɗeen e kuɓeeje muɓɓen e leyɗe piiliiɗe ɗoon fuu. 34-36 Lenyol Gad nyiɓitii kuɓeeje deeniraaɗe kokuuji ɗum woni Dibon e Atarot e Aro'er. Atrot-Sofan e Yajer e Yogoboha e Bayti-Nimra e Bayti-Haran. Ɓe ngaɗani dammuuli maɓɓe hoggooji. 37 Lenyol Ruben nyiɓitii kuɓeeje Hesbon e Elale e Kiriyatayim 38 e Nebo e Ba'al-Meyon e Sibima de ɓe mbayliti inɗe gure ɗeen.
39 Ɓiɓɓe Makir ɓii Manasa njehi konowi leydi Galaad. Ɓe teeti ndi de ɓe ndiiwi Amorinkooɓe wonnooɓe toon. 40 Ndelle Muusaa hokki ɓe ndi ɓe njooɗii. 41 Ya'iir, ɓii Manasa yehi honowi gure Amorinkooɓe pamare de inndiri ɗe Gure Ya'iir. 42 Caggal ɗuum, Nooba honi leydi Kenat e leyɗe ɓattiiɗe ɗum de inndiri ɗe Nooba, innde muuɗum.