30
1 Muusaa haalani Israa'iilankooɓe ko Joomiraaɗo yamiri fuu.Jamirooje dow aadiiji e kunayeeje
2 Muusaa haaldi e ardiiɓe cuuɗi Israa'iila wi'i ɗum'en:
— Inan ko Joomiraaɗo yamiri: 3 Si gorko waɗdii amaana e Joomiraaɗo maa yowii hunayeere dow hoore muuɗum fu, na tilsi joomum tiigoo amaana oon faa wooɗa de haybana ko wurtini e hunnduko muuɗum ɗuum.
4 Si ɓiɗɗo debbo gonɗo ley ɓaade bammum waɗdii amaana e Joomiraaɗo maa yowii hunayeere dow hoore muuɗum, 5 si baabiiko faamii o waɗi ɗum de wi'aay mo faa'e fu, amaana e hunayeere makko fuu na mbaawi tabitinde. 6 Ammaa si baabiiko jaɓaay nyannde faami ɗum ndeen fu, ɗum laatataako. Joomiraaɗo yaafoto mo ngam wo baabiiko haɗi mo tabintinde anniya makko oon.
7 Si ɓiɗɗo debbo ɓaŋaama tawii waɗiino amaana maa yowiino hunayeere dow hoore muuɗum, de tawi taykaaki de waɗi ɗum, 8 si goriiko wi'aay faa'e nde faami ɗum ndeen, amaana maa hunayeere makko tabitan. 9 Ammaa si nii goriiko oon salake nyannde faami ɗum ndeen fu, ɗum laatataako. Joomiraaɗo yaafoto mo ngam wo goriiko haɗi mo tabintinde anniya oon.
10 Debbo mo gorum wuuraa e debbo ceeraaɗo fuu, si adani ko'e muɓɓen anniya fu, anniya oon tabitan. 11 Si debbo gonduɗo e gorum waɗii amaana maa yowii hunayeere dow hoore muuɗum, 12 de gorum haɗaay ɗum wakkati nani ɗum fu, anniya makko oon laatoto. 13 Ammaa si goriiko oon salake nyannde faami ɗum ndeen fu, ɗum laatataako. Joomiraaɗo yaafoto mo ngam wo goriiko haɗi mo tabintinde ɗum. 14 Aadi maa hunayeere fuu, goriiwo na waawi fiirtude maa tabintinde ɗum. 15 Si tawii goriiko oon wi'aay faa'e wakkati faami ɗum ndeen de accii faa jaangoore majjum fu, ɗum na wari wi'ude o jaɓii hunayeere maa amaana makko oon. Wooɗi du, ɗum tabitan saabe ko o wi'aay faa'e law ɗuum. 16 Ammaa si goriiko oon fiirti ɗum caggal nyannde nannoo ɗum ndeen fu, wo kam ronndotoo hakke debbo oon.
17 Ɗee ngoni jamirooje ɗe Joomiraaɗo hokki Muusaa dow ko laatii hakkunde gorko e deekum maa baabiiwo e ɓiyum debbo mo ɓaŋaaka, gonɗo ley ɓaade muuɗum.