Sadaka iidi Puufaali Luwe
29
1 Nyannde go'o lewru jeɗɗaɓurdu fuu, ngaɗon kawrital ceniingal saabe teddingol Joomiraaɗo. Taa ngollon golle tampinooje on. Nde laatanoo on iidi Puufaali Luwe. 2 Ngaɗanon Joomiraaɗo sadaka buleteeɗo mo uurngol belngol ɗum. Ɗum woni ngaari e njawdiri e njawkoy njeɗɗoy koy ndunngu ngootu, tawa ɗi fuu ɗi ngalaa malal. 3 Tawta sadaka conndi jaadoowo e majjum, ɗum woni conndi ɓoosidaandi e nebbam. Ngaari ndiin sakkidee e kilooji jeenay conndi ndiin, njawdiri ndiin du, kilooji jeegom, 4 jawgel gootel fuu, kilooji tati. 5 Wooɗi du, ɓeydon ndamndi sadaka yaafeede, faa hakkeeji mooɗon mooytee. 6 Sadakaaji ɗiin fuu tawta sadakaaji darorɗe lewru e ko sakkidetee e sadakaaji buleteeɗi gaɗeteeɗi nyannde fuu ɗiin. Ko yaadata e sadakaaji ɗiin fuu wo sadaka conndi e njaram. Sadakaaji ɗiin fuu ngaɗiree no yamiroore wi'iri, faa uurngol majji wela Joomiraaɗo.Sadaka iidi Mooytugol Hakke
7 Nyannde sappo lewru jeɗɗaɓurdu nduun, ngaɗon kawrital ceniingal. Nyannde ndeen, cuumoɗon, wooɗi du, taa ngollon gollal fay gootal. 8 Ngaɗanon Joomiraaɗo sadaka buleteeɗo mo uurngol belngol ɗum. Ɗuum woni ngaari e njawdiri e njawkoy njeɗɗoy koy ndunngu ngootu, tawa ɗi fuu ɗi ngalaa malal. 9 Tawti sadaka conndi jaadowo e majjum, ɗum woni conndi ɓoosidaandi e nebbam. Ngaari ndiin sakkidee e kilooji jeenay conndi ndiin, njawdiri ndiin du, kilooji jeegom, 10 jawgel gootel fuu, kilooji tati. 11 Katin du, ngaɗon ndamndi sadaka yaafeede. Sadakaaji ɗiin tawta sadaka yaafeede gaɗeteeɗo nyannde iidi Mooytugol Hakke, e sadaka gaɗeteeɗo nyannde fuu oon e ko yaadata e muuɗum, ɗum woni sadaka conndi e sadaka njaram.
Sadaka iidi Hukumuuji
12 Nyannde 15 lewru jeɗɗaɓurdu, ngaɗon kawrital ceniingal. Taa ngollon golle tampinooje on. Ngaɗanon Joomiraaɗo iidi balɗe jeɗɗi.
13 Nyalaande go'aɓerde: Ngaɗanon Joomiraaɗo sadaka buleteeɗo mo uurngol muuɗum weli ɗum: Ga'i 13 e jawɗi ɗiɗi e njawkoy 14 koy ndunngu ngootu tawa ɗi fuu ɗi ngalaa malal. 14 Tawti sadaka conndi jaadoowo e majji, ɗum woni conndi ɓoosidaandi e nebbam. Ngaari ngootiri fuu kilooji jeenay conndi ndiin sakkidetee, njawdiri ngootiri fuu kilooji jeegom, 15 jawgel gootel fuu, kilooji tati. 16 Katin du, ngaɗon ndamndi sadaka yaafeede. Sadakaaji ɗiin tawta sadaka gaɗeteeɗo nyannde fuu oon, e ko yaadata e majji ɗi fuu, ɗum woni sadaka conndi e sadaka njaram.
17 Nyalaande ɗiɗaɓerde: Ga'i 12 e jawɗi ɗiɗi e njawkoy 14 koy ndunngu ngootu tawa ɗi fuu ɗi ngalaa malal. 18 Ɓeydon sadaka conndi e sadaka njaram ko yaadata e kirsamaaji ɗiin fodde no yamiraa. 19 Katin du, ngaɗon ndamndi sadaka yaafeede. Sadakaaji ɗiin tawta sadaka gaɗeteeɗo nyannde fuu oon, e ko yaadata e majji, ɗum woni sadaka conndi e sadaka njaram.
20 Nyalaande tataɓerde: Ga'i 11 e jawɗi ɗiɗi e njawkoy 14 koy ndunngu ngootu tawa ɗi fuu ɗi ngalaa malal. 21 Ɓeydon sadaka conndi e sadaka njaram ko yaadata e kirsamaaji ɗiin fodde no yamiraa. 22 Katin du, ngaɗon ndamndi sadaka yaafeede. Sadakaaji ɗiin tawta sadaka gaɗeteeɗo nyannde fuu oon, e ko yaadata e majji, ɗum woni sadaka conndi e sadaka njaram.
23 Nyalaande nayaɓerde: Ga'i sappo e jawɗi ɗiɗi e njawkoy 14 koy ndunngu ngootu tawa ɗi fuu ɗi ngalaa malal. 24 Ɓeydon sadaka conndi e sadaka njaram ko yaadata e kirsamaaji ɗiin fodde no yamiraa. 25 Katin du, ngaɗon ndamndi sadaka yaafeede. Sadakaaji ɗiin tawta sadaka gaɗeteeɗo nyannde fuu oon, e ko yaadata e majji, ɗum woni sadaka conndi e sadaka njaram.
26 Nyalaande joyaɓerde: Ga'i jeenay e jawɗi ɗiɗi e njawkoy 14 koy ndunngu ngootu tawa ɗi fuu ɗi ngalaa malal. 27 Ɓeydon sadaka conndi e sadaka njaram ko yaadata e kirsamaaji ɗiin fodde no yamiraa. 28 Katin du, ngaɗon ndamndi sadaka yaafeede. Sadakaaji ɗiin tawta sadaka gaɗeteeɗo nyannde fuu oon, e ko yaadata e majji, ɗum woni sadaka conndi e sadaka njaram.
29 Nyalaande jeegoɓerde: Ga'i jeetati e jawɗi ɗiɗi e njawkoy 14 koy ndunngu ngootu tawa ɗi fuu ɗi ngalaa malal. 30 Ɓeydon sadaka conndi e sadaka njaram ko yaadata e kirsamaaji ɗiin fodde no yamiraa. 31 Katin du, ngaɗon ndamndi sadaka yaafeede. Sadakaaji ɗiin tawta sadaka gaɗeteeɗo nyannde fuu oon, e ko yaadata e majji, ɗum woni sadaka conndi e sadaka njaram.
32 Nyalaande jeɗɗaɓerde: Ga'i jeɗɗi e jawɗi ɗiɗi e njawkoy 14 koy ndunngu ngootu tawa ɗi fuu ɗi ngalaa malal. 33 Ɓeydon sadaka conndi e sadaka njaram ko yaadata e kirsamaaji ɗiin fodde no yamiraa. 34 Katin du, ngaɗon ndamndi sadaka yaafeede. Sadakaaji ɗiin tawta sadaka gaɗeteeɗo nyannde fuu oon, e ko yaadata e majji, ɗum woni sadaka conndi e sadaka njaram.
35 Nyalaande jeetataɓerde ngaɗon kawrital ceniingal. Taa ngollon golle tampinooje on. 36 Ngaɗanon Joomiraaɗo sadaka buleteeɗo mo uurngol belngol ɗum: Ngaari ngootiri e njawdiri ngootiri e njawkoy njeɗɗoy koy ndunngu ngootu tawa ɗi fuu ɗi ngalaa malal. 37 Ɓeydon sadaka conndi e sadaka njaram ko yaadata e kirsamaaji ɗiin fodde no yamiraa. 38 Katin du, ngaɗon ndamndi sadaka yaafeede. Sadakaaji ɗiin tawta sadaka gaɗeteeɗo nyannde fuu oon, e ko yaadata e majji, ɗum woni sadaka conndi e sadaka njaram.
39 Wo ɗuum woni ko cakkanton Joomiraaɗo ley balɗe ɗeen tawta sadakaaji buleteeɗi ɗi iidiiji feere feere e sadakaaji saabe aadiiji mooɗon e sadakaaji yardamuye e sadakaaji njaram e sadakaaji gawri e sadakaaji dufeteeɗi e sadakaaji jeɗeteeɗi.