Jamirooje dow sadakaaji tabintinaaɗi
Sadaka gaɗeteeɗo nyalaande fuu
28
1 Joomiraaɗo haaldi e Muusaa wi'i:— 2 Inan no mbi'ata Israa'iilankooɓe: Ɓe tinnoo ɓe ngaddana kam dokke wakkati mo njeyi waddeede, sadakaaji ɗi uurngol muɓɓen weli kam.
3 Mbi'aa ɓe: Inan sadaka buleteeɗo mo ngaddoton yeeso Joomiraaɗo nyannde fuu: ɗum woni njawkoy ɗiɗoy koy ndunngu ngootu koy ngalaa malal. 4 Jawgel gootel fajiri, gootel futuro, 5 tawti kiilooji tati conndi ɓoosidaandi e nebbam liitere e feccere. 6 Ɗum woni sadaka buleteeɗo tabintinaaɗo to waamnde Sinayi oon. Sadaka mo uurngol muuɗum weli Joomiraaɗo. 7 Sadaka njaram liitere e feccere yaadata e jawgel arandeyel ngeel. Ndufon ɗum yeeso Joomiraaɗo ley nokkuure seniinde toon. 8 Jawgel cakitiingel ngeel du, wo futuro waddidetee e ko arandeyel ngeel sakkidanoo ɗuum fuu. Ɗum laatoo sadaka buleteeɗo mo uurngol muuɗum weli Joomiraaɗo.
Sadaka nyannde fowteteende
9 Nyannde fowteteende fuu, cakkon njawkoy ɗiɗoy koy ndunngu ngootu koy ngalaa malal e kilooji jeegom conndi ɓoosidaandi e nebbam tawti sadaka njaram no yaadirta. 10 Nyannde fowteteende fuu, sadaka buleteeɗo oon na ɓeydee e sadaka gaɗeteeɗo nyannde fuu oon e sadaka njaram jaadowo e muuɗum.
Sadaka darorɗe lewru
11 Darorɗe lewru fuu, sey ngaddon yeeso Joomiraaɗo sadakaaji buleteeɗi ɗum woni ga'i ɗiɗi e njawdiri ngootiri e njawkoy njeɗɗoy koy ndunngu ngootu tawa ɗi fuu ɗi ngalaa malal. 12 Ngaari ngootiri fuu, kilooji jeenay conndi ɓoosidaandi e nebbam sakkidetee. Njawdiri du, kilooji jeegom conndi ndiin. 13 Jawgel fuu, kilooji mayri tati. Kanjum woni sadaka buleteeɗo mo uurngol muuɗum weli Joomiraaɗo. 14 Sadaka njaram oon du, liitereeji tati yaadata e ngaari ngootiri fuu; njawdiri du fuu liitereeji ɗiɗi; jawgel pamarel du liitere e feccere. Ɗum woni sadaka buleteeɗo gaɗeteeɗo darorɗe lewru ley hitaande fuu. 15 Wooɗi du, ɓeydee ndamndi sadaka yaafeede, tawta sadaka buleteeɗo gaɗeteeɗo nyannde fuu oon e sadaka njaram jaadoowo e muuɗum.
Sadaka iidi Faltagol
16 Nyannde 14 lewru go'aɓurdu fuu, ngaɗanon Joomiraaɗo iidi Faltagol. 17 Nyalaande 15 lewru nduun, hiiro iidi ngoon fuɗɗata. Ngo waɗiree balɗe jeɗɗi. Buuru mo wattaaka rabilla tan nyaametee haddi balɗe jeɗɗi ɗeen fuu. 18 Nyalaande go'aɓerde, ngaɗon kawrital ceniingal. Taa ngollon golle tampinooje on. 19 Ngaddon sadakaaji buleteeɗi yeeso Joomiraaɗo, ɗuum woni ga'i ɗiɗi e njawdiri ngootiri e njawkoy njeɗɗoy koy ndunngu ngootu tawa ɗi fuu ɗi ngalaa malal. 20 Tawti sadaka conndi jaadoowo e majjum, ɗum woni conndi ɓoosidaandi e nebbam. Ngaari ngootiri fuu kilooji jeenay conndi ndiin sakkidetee, njawdiri du, kilooji jeegom, 21 jawgel gootel fuu, kilooji tati.
22 Wooɗi du, ɓeyde ndamndi sadaka yaafeede, faa hakkeeji mooɗon mooytee. 23 Ɗum fuu ɗum ɓeydee e sadaka buleteeɗo gaɗeteeɗo fajiri fuu oon. 24 Noon ngaɗirton sadaka nyaamdu ndu uurngol muuɗum weli Joomiraaɗo faa waɗa balɗe jeɗɗi. Ɗuum tawta sadaka buleteeɗo gaɗeteeɗo nyannde fuu e sadaka njaram jaadoowo e muuɗum. 25 Nyalaande jeɗɗaɓerde, ngaɗon kawrital ceniingal. Taa ngollon golle tampinooje on.
Sadaka iidi Tayri
26 Nyannde iidi, nde ngaddoton yeeso Joomiraaɗo sadaka conndi gawri artiindi ɓenndude ndiin fu, sey ngaɗon kawrital ceniingal faa njetton Joomiraaɗo tafon. Taa ngollon golle tampinooje on. 27 Ngaɗanon Joomiraaɗo sadaka buleteeɗo ga'i ɗiɗi e njawdiri ngootiri e njawkoy njeɗɗoy koy ndunngu ngootu, 28 tawta sadaka conndi jaadowo e majjum, ɗum woni conndi ɓoosidaandi e nebbam. Ngaari ngootiri fuu kilooji jeenay conndi ndiin sakkidetee, njawdiri du, kilooji jeegom, 29 jawgel gootel fuu, kilooji tati. 30 Ɓeydee e ndamndi sadaka mooytoowo hakke mooɗon. 31 Ngaɗon ɗum fuu tawta sadaka njaram jaadowo e majjum, e sadaka buleteeɗo gaɗeteeɗo nyannde fuu e sadaka conndi ko yaadata e muuɗum. Taa malal fuu tawee e daabaaji sadaka ɗiin.