Yamiroore dow ndongu rewɓe
27
1 Manasinke bi'eteeɗo Selofehad rimi ɓiɓɓe rewɓe tan. Selofehad oon wo ɓii Hefer, Hefer ɓii Galaad, Galaad ɓii Makir, Makir ɓii Manasa, Manasa ɓii Yuusufi. Ɓiɓɓe makko rewɓe ɓeen wo Mahala e No'a e Hogila e Milka e Tirsa. Ɓe ngari ɓe kolliti ko'e maɓɓe to Muusaa. 2 Ɓe ngari yeeso Muusaa e almaami Eliyajar e mawɓe e jamaare Israa'iila fuu, dammbugal hukum Ceniiɗo. 3 Ɓe mbi'i:— Baabii amin maayi ley ladde yoornde. O tawdaakano e jamaare Koora muurtannoonde Joomiraaɗo ndeen. O maayi saabe hakke makko tan, ammaa o yoppaay ɓiɗɗo gorko. 4 Ndelle innde baabii amin oon ittete ley suudu baaba saabe yoppaay ɓiɗɗo gorko naa? Hokku min ngeɗu amin hono no kokkirɗaa sakiraaɓe baaba amin noon.
— 7 Ɓiɓɓe Selofehad ɓeen na ngoodi goonga. Ndelle kokkaa ɓe ngeɗu hono no sakiraaɓe baabii ɓe noon. Wooɗi du, kokkaa ɓe ndongu baabiiɓe.
8 Mbi'aa Israa'iilankooɓe: si gorko maayii yoppaay ɓiɗɗo gorko fu, jawdi muuɗum hokkee ɓiyum debbo. 9 Si tawii joomum yoppaay ɓiɗɗo debbo du, ndongu muuɗum nguun hokkee sakiraaɓe mum worɓe. 10 Si walaa sakiraaɓe worɓe fu, ndongu muuɗum hokkee sakiraaɓe bammum worɓe. 11 Si tawii baaba joomum walaa sakiraaɓe worɓe fu, kokkon ndongu nguun ɓurɗo ɓattaade mo. Wo oon njeytata ndongu makko. Ɗum laatanoo Israa'iilankooɓe yamiroore nde Joomiraaɗo hokki Muusaa.
No Yoosuwa loomtiri Muusaa
12 Joomiraaɗo haaldi e Muusaa wi'i:
— Ƴeenyaa waamnde Abarim de ƴeewaa leydi ndi kokkammi ɓiɓɓe Israa'iila. 13 Nji'aa ndi de sakitoo kawritowaa e yimɓe maa hono no sakiike maaɗa Haaruuna nii. 14 Noon ɗum laatorto saabe on kollaay no innde am foti senoraade nde ngonnoɗon ley ladde Sin, wakkati Israa'iilankooɓe umminannoo kam muurtere saabe ndiyam ndeen.
Ɗum woni ndiyam Meriba wuro Kaades ladde Sin toon.
15 Ndeen Muusaa wi'i Joomiraaɗo:
— 16 Ndelle Joomiraaɗo, Laamɗo tiigiiɗo foofaango ko tagi fuu, suɓoo ardotooɗo jamaare ndee. 17 Oon laatoo darantooɗo ɓe wakkati jahol e gartol fuu, ardotooɗo ɓe wakkati dawol e jaaƴagol, taa yimɓe Joomiraaɗo ɓeen laatoo hono baali ɗi ngalaa duroowo.
18 Joomiraaɗo jaabii Muusaa wi'i:
— Kooƴaa Yoosuwa ɓii Nuun de njowaa junngo maaɗa dow muuɗum. Wo o neɗɗo mo Ruuhu am woni e muuɗum. 19 Njaaraa mo yeeso almaami Eliyajar e yeeso yimɓe Israa'iila fuu de ngaɗaa o ardotooɗo, ɓe fuu ɓe laatoo seedeeɓe. 20 Kokkaa o baawɗe maaɗa faa Israa'iilankooɓe ngaɗa ko o wi'i fuu. 21 O yaha to almaami Eliyajar de ƴamirana mo muuyɗe Joomiraaɗo e «Urim»*. Noon Yoosuwa e jamaare Israa'iila fuu ɗowtoranto jamirooje Joomiraaɗo nde ndillata e nde ngartata fuu.