No Israa'iilankooɓe cujidirani tooru Ba'al
25
1 Israa'iila jooɗii nokkuure wi'eteende Sittim. Ɗoon ɓe puɗɗi fijidinde e surbaaɓe Mo'ab. 2 Surbaaɓe ɓeen na mbaantoo ɓe sadakaaji ɗi ngaɗanta allaaji muɓɓen. Iɓe nyaamda e muɓɓen wooɗi du, iɓe cujidana allaaji ɗiin. 3 Noon, seeɗa seeɗa faa Israa'iilankooɓe puɗɗi rewude tooru Ba'al ndu Peyor. Ndeen Joomiraaɗo tikkani Israa'iilankooɓe sanne.4 Joomiraaɗo wi'i Muusaa:
— Njorfitoɗaa hooreeɓe cuuɗi Israa'iila fuu ɓoggi yeeso am na kucciti e naange faa mettorgal am ngaal tottitoo Israa'iila.
5 Muusaa haaldi e sarotooɓe Israa'iila wi'i ɗum'en:
— Mono e mooɗon fuu, wara hooreeɓe cuudi Israa'iila ɓe halfinaa hokkuɓe ko'e muɓɓen tooru Ba'al ndu Peyor!
6 Wakkati Israa'iilankooɓe mbullitotonoo dammbugal hukum Ceniiɗo oon, Israa'iilanke yottodii e surbaajo Madiyanke, holli sakiraaɓe muuɗum yeeso Muusaa e gite jamaare Israa'iila fuu. 7 Almaami Pinehas ɓii Eliyajar taan Haaruuna ummodii e labbo hakkunde jamaare ndeen, 8 riiwi Israa'iilanke oon faa hewti hukum toon de yuwi ɓe ɗiɗo fuu. Debbo oon kaa o yuwi ɗum reedu. Ndeen masiiba caamannooɗo dow Israa'iilankooɓe oon darii. 9 Tawi ɗum warii yimɓe 24 000.
10 Joomiraaɗo haaldi e Muusaa wi'i:
— 11 Almaami Pinehas ɓii Eliyajar taan Haaruuna tottinii jukkungo am ngoon dow Israa'iilankooɓe ko hirani kam hakkunde maɓɓe ɗum. Wo ɗuum haɗi kam halkude ɓe ɓe fuu wakkati tikkere am ndeen. 12 Saabe majjum mbi'aa mo mi hokkii mo amaana am mo jam. 13 Amaana oon na woodani mo kanko e taaniraaɓe makko fuu, amaana tabintinoowo almaamaaku maɓɓe. Saabe o hiranii Laamɗo makko de o mooytani Israa'iila hakke mo ronndinoo oon.
14 Israa'iilanke baridaaɗo e surbaajo oon wo Simri ɓii Saalu, hooreejo lenyol Simeyon. 15 Surbaajo Madiyanke oon du wo Kosbi ɓii Suur, gooto e hooreeɓe cuuɗi Madiyana.
16 Joomiraaɗo haaldi e Muusaa wi'i:
— 17 Kippee Madiyankooɓe, mbaron ɗum'en. 18 Ngaɗee noon sabo ɓe toonyorake on jambuuji maɓɓe ɗi ɓe ngaɗi ley Peyor, tawti kabaaru Kosbi ɓii hooreejo Madiyana sakiike maɓɓe baraaɗo nyannde jukkungo Israa'iila ley Peyor.
Limgal ɗiɗaɓal
19 Caggal masiiba oon,