No Balaama barkiniri Israa'iila
23
1 Balaama wi'i Balak:— Nyiɓanaa kam kirsirɗe jeɗɗi, wooɗi du, cegilanoɗaa kam ga'i jeɗɗi e jawɗi jeɗɗi.
2 Balak waɗi ko Balaama yamiri ɗuum. Ɓe kawriti ɓe cakki dow hirsirde fuu ngaari e njawdiri.
3 Balaama wi'i Balak:
— Ndaroɗaa ɗakkol kirsamaari maaɗa, mi toowtan seeɗa. Na hasii Joomiraaɗo hawran e am. Konngol ngol o hokki kam fuu wo ngool pay kollammaami.
Ndeen o ƴeenyi tefaare.
4 Laamɗo ɓangani mo de o wi'i ɗum:
— Mi waɗii kirsirɗe jeɗɗi nyiɓaama de cakkumi dow wootere fuu ngaari e njawdiri.
5 Ndeen Joomiraaɗo watti konngol muuɗum e hunnduko makko de wi'i mo:
— Yecca to Balak de mbi'a ɗum nii e nii.
6 Balaama yecci to Balak. Tawi Balak na darii ɗakkol kirsamaari muuɗum kam e mawɓe leydi Mo'ab fuu. 7 Ndeen o haaliri annabaaku, o wi'i:
Balak waɗii mi ƴuwii faa Aram ngarumi ɗo,
Kaananke Mo'ab noddii kam gilla waamnde lettugaare, wi'i:
«Ngaraa kuɗanaa kam Yaakuuba!
Ngaraa ngaɗaa Israa'iila laatoo kuddi!»
8 Noy kuɗirammi mo Laamɗo huɗaay?
Noy mbonkortoomi mo Joomiraaɗo mbonkaaki?
9 Miɗo yi'a dow tefaaje,
Miɗo haccoo dow baamle,
yimɓe wuuruɓe feere muɓɓen,
yimɓe ɓe kawritataa e lenyi goɗɗi.
10 Moy waawi limdude ƴuwdi Yaakuuba
ɗuuɗundi hono njaareendi,
E hiisaade fay seeɗa e yimɓe Israa'iila?
Miin e hoore am mi maaya maayde fonnditiiɓe,
Cakitte am laatoo hono cakitte maɓɓe.
11 Balak ƴami Balaama wi'i:
— Ɗume saabii de aɗa waɗa kam ni? Mi waddii ma faa kuɗanaa am wayɓe de aɗa mbarkina ɓe.
12 Balaama jaabii wi'i:
— Yalla miɗo waawi wi'ude faa'e si wanaa ko Joomiraaɗo watti e hunnduko am naa?
No Balaama barkiniri Israa'iila ɗiɗaɓerde
13 Balak wi'i katin:
— Waru faa njahaden nokkuure wonnde nde mbaawɗaa yiide ɓe faa wooɗa. Ammaa fay toon du wo seeɗa maɓɓe tan nji'ata. A waawaa yi'ude ɓe fuu. Ndeen, kuɗanaa kam ɓe.
14 O yaari Balaama dow waamnde Pisiga to nokku reenooɓe, o nyiɓi kirsirɗe jeɗɗi dow mayre. O waɗi ngaari e njawdiri sadaka buleteeɗo dow hirsirde fuu.
15 Balaama wi'i mo:
— Ndaroɗaa ɗakkol kirsamaari maaɗa. Mi yahan hawroygol e Joomiraaɗo.
16 Joomiraaɗo ɓangi e Balaama de watti konngol e hunnduko muuɗum, wi'i:
— Yecca to Balak de mbi'a mo nii e nii.
17 Balaama yeccii warti tawi imo darii ɗakkol kirsamaari makko, kanko e mawɓe leydi Mo'ab fuu. Balak ƴami mo ko Joomiraaɗo wi'i.
18 Ndeen Balaama haaliri annabaaku katin wi'i:
Balak, umma, nanu daande am,
Ɓii Sippor, hettindanam!
19 Laamɗo wanaa tagaaɗo sakko fena,
wanaa ɓii Aadama sakko mimsita.
Yalla o waɗataa ko o wi'i naa?
Yalla o tabintintaa ko o haali naa?
20 Wo barkinde tan njamiraami,
Mi waawaa liɓude ko o barkini.
21 O yi'aay fuu ko boni e Yaakuuba,
O taykaaki feloore e Israa'iila.
Joomiraaɗo, Laamɗo makko na wondi e makko.
Wo to makko duko kelle laamu nanetee.
22 Laamɗo wurtinii ɓe Misira,
imo laatanii ɓe luwe ngaari ladde.
23 Kuddi waawanaa Yaakuuba,
Dabare ginnaaji waawataa Israa'iila.
Wakkati warowan mo yimɓe mbi'ata dow Yaakuuba e dow Israa'iila:
«Inan ko haayni ko Laamɗo waɗi!»
24 Inan lenyol ummortoongol hono laddeeru,
darotoongol darnde rawaandu ladde.
Ndu fukkataako si ndu nyaamaay
de ndu yari ƴiiƴam ko ndu wari ɗum.
25 Balak wi'i Balaama:
— Fay si a waawaa huɗude ɓe du, taa barkin ɓe kaa.
26 Balaama jaabii mo wi'i:
— Yalla mi hollaayno ma ko Joomiraaɗo holli kam tan, kollanmaami naa?
No Balaama barkiniri Israa'iila tataɓerde
27 Balak wi'i Balaama:
— Ngaraa faa mi yaare nokkuure wonnde katin, na hasii Laamɗo hokkete laawol kuɗanaa kam ɓe. 28 Balak yaari mo dow waamnde Peyor, toon ɓe mbaawi tiimude ladde yoornde ndeen fuu.
29 Balaama wi'i mo:
— Nyiɓanam kirsirɗe jeɗɗi de cegilanoɗaa kam ga'i jeɗɗi e jawɗi jeɗɗi.
30 Balak waɗi ko Balaama wi'i ɗuum. Dow hirsirde fuu, o waɗi ngaari e njawdiri ngootiri sadaka buleteeɗo.