No Balak nelirani Balaama
22
1 Israa'iilankooɓe njeccii koɗowi njaayri Mo'ab lettugal Urdun yeeso Yeriko. 2 Balak ɓii Sippor yi'ii ko Israa'iilankooɓe ngaɗi Amorinkooɓe. 3 Nde Mo'ab yi'unoo no ɓe poti heewude fu, wemmbii, huli sanne. 4 O wi'i mawɓe Madiyankooɓe:— Jamaare nde heddataa fay gootum ley piilol meeɗen. Ɓe ngaɗan en hono no na'i laamnirta huɗo ley gese ni.
Balak woni laamiiɗo leydi Mo'ab wakkati oon. 5 O nelani Balaama ɓii Beyor jeyaaɗo Petor daande maayo Efrat, wi'e:
— Yimɓe ƴuurii Misira ngari koɗi ɗakkol am na kuuri leydi ndi fuu. 6 Ndelle miɗo ŋaare ngaraa kuɗanaa kam ɓe sabo iɓe ɓuri kam semmbe. Ndeen na hasii mi jaaloto ɓe de mi riiwa ɓe e leydi ndi, ngam miɗo anndi mo mbarkinɗaa fuu wo barkinaaɗo. Mo kuɗuɗaa du, wo kuɗaaɗo.
7 Mawɓe Mo'ab e mawɓe Madiyankooɓe njaadi e njeenaari to Balaama faa tiimana ɗum'en. Nde ɓe njottinoo fu, ɓe pillanii mo ko Balak neli ɓe. 8 Balaama jaabii ɓe wi'i:
— Mbaalee faa weeta, ndeen mi hollan on ko Joomiraaɗo wi'i kam dow majjum fuu.
— Ɓey ngoni worɓe waruɓe to maaɗa ɓee?
10 Balaama jaabii Laamɗo wi'i:
— Balak ɓii Sippor kaananke Mo'ab neli ɓe mbi'a kam 11 yimɓe ƴuurii Misira ngarii na kuuri leydi ndi fuu. Ndelle imo ŋaaro kam mi wara mi huɗana mo yimɓe ɓeen. Na hasii ndeen o heɓan baawɗe o jaaloo ɓe de o riiwa ɓe.
12 Laamɗo wi'i Balaama:
— Taa njaada e maɓɓe, wooɗi du, taa kuɗaa yimɓe ɓeen, sabo wo ɓe barkinaaɓe.
13 Jaangoore majjum subaka, Balaama ummii wi'i mawɓe ɓe Balak neli ɓeen njeccoo sabo Joomiraaɗo hokkaay ɗum laawol yaadude e muɓɓen.
14 Mawɓe Mo'ab ɓeen njeccii to Balak, mbi'i ɗum:
— Balaama jaɓaay warude.
15 Balak yeccii neli mawɓe ɗuuɗɓe tedduɓe faa ɓuri arandeeɓe ɓeen. 16 Nde ɓeen njottinoo to Balaama fu, mbi'i ɗum:
— Balak ɓii Sippor wi'i na ŋaare taa caloɗaa warude to muuɗum. 17 O teddinte teddeengal manngal, wooɗi du, o hokkete huunde fuu ko kaajaɗaa. Ndelle ngaraa kuɗanaa mo yimɓe ɓeen.
18 Balaama jaabii nelaaɓe ɓeen wi'i:
— Fay si Balak hokki kam kaŋŋe e cardi ko woni ley laamordu muuɗum fuu, mi waawataa waɗude ko luttinta kam yamiroore Joomiraaɗo, Laamɗo am. 19 Ndelle onon du, sey mbaalon faa mi faama ko Joomiraaɗo wi'ata kam katin.
20 Ley jemma oon Laamɗo ɓangi e Balaama wi'i ɗum:
— Si nelaaɓe Balak ɓeen ngari faa njaadon fu njaada e maɓɓe, ammaa ko njamirmi ngaɗaa tan njeyɗaa waɗude.
21 Jaangoore majjum fajiri Balaama hirkini araawa muuɗum de dillidi e maɓɓe.
Araawa Balaama e Maleyka Joomiraaɗo
22 Nde Laamɗo yi'unoo imo dilla fu, tikki sanne de maleyka Joomiraaɗo falii mo dow laawol faa faddoo mo, tawi imo waɗɗii araawa makko, maccuɓe makko ɗiɗo na njokkii. 23 Araawa ngaan yi'i maleyka Joomiraaɗo na darii dow laawol na tiigii kaafaahi. Ndeen nga wosii, nga doggiri ley ngesa. Balaama na fiya nga faa nga yeccoo dow laawol. 24 Maleyka oon darowii katin dow laawol dewoowol ley gese cabiije, ɓilliingol hakkunde kokuuji ɗiɗi. 25 Araawa ngaan yi'i maleyka oon de takkii kokuwol. Balaama na fiya nga sabo nga ɓilli koyngal muuɗum e kokuwol ngool. 26 Maleyka Joomiraaɗo oon faltii yehi yeeso darowii dow laawol nokkuure ɓilliinde ɗo ɓe mbaawaa wosoraade nano e nyaamo fuu. 27 Nde araawa ngaan yi'unoo maleyka oon fu, waalii ley koyɗe Balaama. Ndeen Balaama ɓerni sanne de na tappa nga cabbi. 28 Joomiraaɗo omti hunnduko araawa ngaan de nga haaldi e Balaama nga wi'i ɗum:
— Nii woni nokkuuje tati aɗa fiya kam, ko saabii?
29 Balaama jaabii nga wi'i:
— Saabe aɗa jalnoroo kam. Si mi tawranooma kaafaahi fu, mi hirsete jaati.
30 Araawa ngaan wi'i Balaama katin:
— Wanaa miin woni araawa nga mboownoɗaa waɗɗaade weeti fuu ngaan naa? Wo nii mboowmi waɗude ma naa?
Balaama jaabii araawa ngaan, wi'i:
— A'aa, a woowaa.
31 Ndeen Joomiraaɗo feerti gite Balaama de yi'i maleyka oon na darii dow laawol na tiigii kaafaahi e junngo muuɗum. O leeƴinii, o hippii e leydi o sujidani maleyka oon. 32 Maleyka oon wi'i mo:
— Ko saabii de piiɗaa araawa ma ngaa kile tati joonin? Wo miin falii laawol maaɗa sabo jahaangal maaɗa ngaal fotanaay kam. 33 Wo miin araawa ngaan yi'ata de na wosoo kile tati ɗeen fuu. Si nga wosaakino yeeso am fu, mi wareteno aan kaa; de kannga kaa nga hisan.
34 Balaama wi'i maleyka Joomiraaɗo oon:
— Mi waɗii hakke sabo mi faamayno wo aan darii yeeso am. Joonin, si tawii jahaangal am ngaal fotanaay ma fu, mi yeccoto.
35 Ammaa maleyka Joomiraaɗo oon wi'i mo:
— Njaadaa e worɓe ɓee, ammaa taa kaalaa faa'e si wanaa ko kaalanmaami.
Ndeen Balaama wittodii e nelaaɓe Balak ɓeen.
No Balak hawriri e Balaama
36 Nde Balak faamunoo Balaama na warda e nelaaɓe muuɗum ɓeen fu, yehi hawrowi e maɓɓe galluure Mo'ab wonnde daande Arnon keerol leydi muuɗum. 37 Balak wi'i mo:
— Wanaa mi nelii yimɓe heewɓe ngara nodde naa? Saabe ɗume de caliɗaa warude? Yalla aɗa miila mi waawaa jaɓɓoraade ma teddeengal naa?
38 Balaama jaabii Balak wi'i:
— Inani kam, mi warii to maaɗa. Yalla na woodi fuu ko mbaawumi hollude ma naa? Wo ko Laamɗo watti e hunnduko am tan kollanmaami.