No Israa'iilankooɓe njaaltorii Kanaaninkooɓe Arad
21
1 Laamiiɗo Arad Kanaaninke, jooɗinooɗo horɗoore leydi Kanaana, nani Israa'iilankooɓe na njokkii laawol ƴuurowol Atarim, na ngara de jakkitorii ɓe konu. O nanngi woɓɓe maɓɓe o watti ley kasu. 2 Nyannde majjum Israa'iilankooɓe ngaddi e Joomiraaɗo amaana, mbi'i:— Si a wattii yimɓe ɓe e juuɗe amin fu, min kalkan ɓe, kamɓe e gure maɓɓe fuu.
3 Joomiraaɗo nani daaɗe Israa'iilankooɓe, de watti Kanaaninkooɓe ɓeen fuu e juuɗe maɓɓe. Ndeen ɓe kalki ɗum'en, kam'en e gure muɓɓen. Nyannde majjum Israa'iilankooɓe inndiri nokkuure ndeen Horma (ɗum na fiirta halkere).
Haala mboddi njamndi mboɗeeri
4 Israa'iilankooɓe ndilli waamnde Hor. Ɓe kooƴi laawol maayo Maaliya faa ɓe piiloo leydi Edom. Ammaa ley jahaangal maɓɓe tampiriwal ngaal ɓe kunngii munyal. 5 Ndeen ɓe muurtani Laamɗo e Muusaa katin, iɓe mbi'a:
— Ɗume saabii de mburtinɗon min leydi Misira? Wo faa min maaya ley ladde yoornde nde naa? Buuru walaa! Ndiyam walaa! Wooɗi min kutake nyaamduwa ngaa! (Ɗum woni manna).
6 Saabe majjum Joomiraaɗo neldi ɓe bolle ɗe tooke bonɗe ŋati ɓe. Heewɓe hakkunde maɓɓe maayi. 7 Ɓe ngari to Muusaa ɓe mbi'i ɗum:
— Min ngaɗii hakke saabe ko min muurtani ma aan e Joomiraaɗo ɗuum. Ŋaarana min Joomiraaɗo woɗɗina min bolle ɗee.
— Ngaɗiraa mboddi e njamndi mboɗeeri de ɓilaa ndi dow sawru. Ŋataaɗo de tiggitii ndi fu, maayataa.
9 Muusaa waɗi mboddi ndiin de ɓili ndi dow sawru. Ndeen mo mboddi ŋati de ndaarii ɓiliindi ndiin fu, daɗii.
Jahaangal leydi Mo'ab
10 Caggal ɗuum Israa'iilankooɓe eggiri Obot.
11 Ɓe eggi Obot, ɓe koɗowi Iyye-Abarim ley ladde yoornde heedunde lettugal leydi Mo'ab.
12 Ɓe eggi toon, ɓe koɗowi daande gooruwol Jered.
13 Ɓe eggi toon, ɓe koɗowi gere ooto gooruwol Arnon, ɗum woni ladde yoornde wonnde keerol leydi Amorinkooɓe. Arnon na woni hakkunde leydi Mo'ab e leydi Amorinkooɓe. 14 Ɗuum saabii de na winndaa ley dewtere Konuuji Joomiraaɗo:
Waheb mo Sufa e gooruuji muuɗum
jipportooɗi leydi Ar na ɓaarii keerol leydi Mo'ab.
16 Gaɗa ɗuum, ɓe njottii Be'er, nokkuure wi'eteende Ɓunndu. Wo ɗoon Joomiraaɗo wi'i Muusaa:
— Kawrondinaa jamaare Israa'iila, faa mi hokka ɗum'en ndiyam.
17 Ndeen Israa'iilankooɓe njimi jimol mbi'i:
Ilu ndiyam, hey ɓunndu!
Njimanee ndu!
18 Ndu ardiiɓe mbasi,
Ndu tedduɓe mbasiri
cabbi laamu e cabbi muɓɓen.
Ndeen ɓe eggiri ladde Mattana.
19 Ɓe eggi Mattana, ɓe njehi Nahaliyel.
Ɓe eggi Nahaliyel ɓe njehi Bamot.
20 Ɓe eggi Bamot ɓe njehi naɗɗol leydi Mo'ab faro waamnde Pisiga timmoode ladde yoornde ndeen.
No Israa'iila jaalorii kaanankooɓe wi'eteeɓe Sihon e Oga
21 Israa'iilankooɓe ngaɗi nelaaɓe njaha to Sihon kaananke Amorinkooɓe de mbi'a ɗum:
— 22 Accaa min pecca leydi maaɗa min paltoo. Min ndewataa ley gese demeteeɗe e gese cabiije fuu, fay ndiyam ɓulli mooɗon min njarataa. Laawol manngol tan min ndewata min paltoo.
23 Ammaa Sihon jaɓaay ɓe pecca leydi muuɗum. O hawrondini yimɓe makko, ɓe mburtii faa ɓe kawra e Israa'iilankooɓe ley ladde Yahas. Toon ɓe kabdi e muɓɓen. 24 Israa'iilankooɓe piiri ɓe kaafaaje, njaaltii ɓe de ndawrani leydi maɓɓe, ƴuuwde Arnon yaade Yabok faa yottii keerol leydi Amon cemmbinɗinaangol. 25 Israa'iila teeti kuɓeeje ɗeen fuu. Ɓe njooɗii ley kuɓeeje Amorinkooɓe e galluure Hesbon e gure piiliiɗe ɗoon fuu. 26 Galluure Hesbon woni ɗo kaananke Amorinkooɓe jooɗinoo. O haɓdiinoo e kaananke leydi Mo'ab artinooɗo mo jooɗaade ley galluure ndeen de o teeti leydi muuɗum faa hewti gooruwol Arnon. 27 Saabe ɗuum de yimooɓe na mbi'a:
Ngaree Hesbon, nde nyiɓitee,
Galluure Sihon fonnditee!
28 E Hesbon yiite wurtii,
E Sihon leewngol yalti,
Nge nyaami Ar mo Mo'ab
Nge wuli ardiiɓe baamle Arnon.
29 Bone woodanii ma, aan Mo'ab!
On lallii, onon jokkuɓe Kemos.
Ɓiɓɓe mooɗon worɓe ndoggii.
Rewɓe du, kaananke Sihon
mo Amorinkooɓe nanngii ɗum'en.
30 Min njuwirii ɓe kure,
Gilla Hesbon faa hewti Dibon,
faa ɓe kalkii.
Ko tawaa Nofa faa hewti Medeba,
fuu bonnaama.
31 Israa'iilankooɓe koɗi leydi Amorinkooɓe ɗoon. 32 Muusaa neli galluure Yajer horowee. Caggal ɗuum, ɓe njehi, ɓe teetowi Yajer e gure piliiɗe ɗum de ɓe ndiiwi Amorinkooɓe wonnooɓe toon.
33 Ɓe mbattiti laawol ɓe ndilliri Basan. Oga, kaananke leydi ndiin e konunkooɓe muuɗum fuu mburtii kawridi ɓe e konu ley wuro Edirey.
34 Joomiraaɗo wi'i Muusaa:
— Taa hulu sabo mi wattan mo kanko e yimɓe makko e leydi maɓɓe fuu e juuɗe maaɗa. Ngaɗaa o hono no ngaɗɗaa Sihon kaananke Amorinkooɓe laaminooɗo Hesbon noon.
35 Israa'iilankooɓe piyi mo kanko e ɓiɓɓe makko e yimɓe makko fuu, poofoo fay gooto heddaaki de ɓe njeyti leydi makko.