No ndiyam wurtorii e hayre Meriba
20
1 Yimɓe Israa'iila fuu njottii ladde Sin ley lewru go'aɓurdu. Ɓe koɗi Kaades. Ɗoon Mariyama maayi de uwaa.2 Wakkati oon ɓe kunngii ndiyam de yimɓe fuu kawriti muurtani Muusaa e Haaruuna. 3 Ndeen ɓe pilii haɓdude e Muusaa iɓe mbi'aa:
— Woowoy! Tawee min maayduno e sakiraaɓe amin yeeso Joomiraaɗo! 4 Ko saabii de ngadduɗon yimɓe Joomiraaɗo, ley ladde ndee naa faa kanton min, minen e dammuuli amin? 5 Ko saabii de ndillinɗon min Misira, ngadduɗon min nokkuure bonnde ndee? Ndee wanaa nokkuure jaɓoore aaweede gawri maa ƴibbe maa cabiije maa rummaneeje, nde walaa fay ndiyam ko yaree.
6 Muusaa e Haaruuna njoppi yimɓe ɓeen de njehi kofowii dammbugal hukum Ceniiɗo. Ndeen teddeengal Joomiraaɗo ɓangani ɓe. 7 Joomiraaɗo haaldi e Muusaa wi'i:
— 8 Hooƴu sawru maaɗa de aan e sakiike maaɗa Haaruuna kawrondinon jamaare Israa'iila. Kaaldon e hayre yeeso maɓɓe de nde hokka on ndiyam. Njaltinaa ndiyam iloojam e mayre faa ɓe njaraa, kamɓe e dammuuli maɓɓe fuu.
9 Muusaa hooƴi sawru nduun yeeso Joomiraaɗo fodde no wiiraa. 10 Kanko e Haaruuna ɓe kawrondini Israa'iilankooɓe fuu ɗakkol hayre ndeen de o wi'i ɓe:
— Kettinee onon muurtooɓe! Yalla min mburtinana on ndiyam e hayre ndee naa?
11 Muusaa ɓanti junngo muuɗum de fiiri hayre ndeen sawru ndu tiigii nduun kile ɗiɗi. Ndiyam yaltirii semmbe. Israa'iilankooɓe njari kam'en e dammuuli muɓɓen fuu.
12 Ammaa Joomiraaɗo wi'i Muusaa e Haaruuna:
— Saabe on koolaaki kam, on ndaardaay kam mi ceniiɗo yeeso Israa'iilankooɓe, wanaa onon nannata yimɓe ɓee leydi ndi kokkumi ɗum'en.
13 Diyeele ɗeen inndirtee Meriba (ɗum na fiirta muurtere). Wo ɗoon Israa'iilankooɓe muurtani Joomiraaɗo de kam du holli ɓe innde muuɗum seniinde.
No Edominkooɓe caloranii Israa'iilankooɓe faltaade
14 Nde ɓe ngonnoo Kaades ndeen, Muusaa waɗi nelaaɓe njaha to kaananke Edom mbi'a ɗum:
— Inan ko sakiike maaɗa Israa'iila wi'i: Aɗa anndi tampiri ndi min kawri fuu. 15 Maamiraaɓe amin njehiinoo leydi Misira ko ɓooyi. Min mbuuri toon duuɓi keewɗi ammaa Misirankooɓe torrii min sanne, minen e maamiraaɓe amin fuu. 16 Ndeen min mbullitii Joomiraaɗo de nani bojji amin. O neli maleyka wurtini min leydi Misira. Inan miɗen ngoni Kaades, galluure wonnde keerol leydi maaɗa. 17 Ndelle miɗo ŋaare accaa min pecca leydi maaɗa min paltoo. Min ndewataa ley gese demeteeɗe e gese cabiije fuu. Min njarataa fay ndiyam ɓulli mooɗon. Min ndewan laawol manngol tan, min celirtaa nano maa nyaamo faa min paltoo leydi maaɗa.
18 Kaananke Edom jaabii ɓe wi'i:
— On peccataa leydi am. Si on ciini du, min kawridan e mooɗon kaafaaje.
19 Israa'iilankooɓe mbi'i mo:
— Laawol manngol tan min ndewata min paltoo. Si minen maa fay dammuuli amin njarii ndiyam mooɗon fu, min njoɓan on. Ko min ŋaarotoo on woni accon min paltoo e koyɗe amin.
20 Ammaa kaananke Edom jaabii ɓe wi'i:
— On peccataa leydi am!
Ndeen Edominkooɓe kawridi e maɓɓe semmbe mawɗo e konunkooɓe ɗuuɗɓe. 21 Noon kaananke Edom saloranii Israa'iilankooɓe feƴƴitinde leydi muuɗum, Israa'iilankooɓe du mboɗɗii mo.
Maayde Haaruuna
22-23 Jamaare Israa'iila ndeen dilli Kaades, yehi waamnde Hor keerol leydi Edom. Joomiraaɗo wi'i Muusaa e Haaruuna:
— 24 Haaruuna hawritowan e maamiraaɓe muuɗum. O heɓataa naatude leydi ndi podaniimi on ndiin ngam on ɗowtanaaki haala am to diyeele Meriba. 25 Ndelle ƴeenyidaa e Haaruuna e ɓiyum Eliyajar waamnde Hor. 26 Ittaa kaddule makko de ɓornaa ɗe ɓiyiiko ngam wo toon o heddoto.
27 Muusaa waɗi ko Joomiraaɗo yamiri ɗuum. Yeeso jamaare Israa'iilankooɓe fuu, o dillidi e Haaruuna e ɓiyum o yaari ɗum'en dow waamnde Hor. 28 Muusaa ɓorti kaddule Haaruuna de ɓorni ɗe Eliyajar. Haaruuna maayi dow waamnde toon. Muusaa e Eliyajar njippii. 29 Israa'iilankooɓe fuu paami Haaruuna maayii de mboyiri ɗum balɗe 30.