Waɗugol ndiyam ceninoojam
19
1 Joomiraaɗo haaldi e Muusaa e Haaruuna wi'i:— 2 Inan jamirooje ɗe kokkammi on: Mbi'on Israa'iilankooɓe ngaddana on nagge rewe woɗeewe sellunge nge walaa malal wooɗi du, tawa nge remnaaka abada. 3 Kokkon nge almaami Eliyajar de yaara nge yaasin hoɗorde, nge hirsee yeeso muuɗum. 4 Almaami Eliyajar suuwa honndu muuɗum e ƴiiƴam magge de wicca ɗam yeeso hukum Ceniiɗo kile jeɗɗi. 5 Nge wulee yeeso makko. Nguru e teewu e ƴiiƴam e coowoori magge fuu wulee. 6 Ndeen almaami hooƴa leggal seddere e liccal hisopi e gaarawol boɗewol de faɗɗa ɗum fuu dow yiite ɗo nagge ngeen wuletee ɗoon. 7 Caggal ɗuum almaami lonna kaddule muuɗum, lootowo de sakitoo warta ley hoɗorde ɗoon, ammaa o heddoto o tuunɗo faa hewta futuro. 8 Buluɗo nge oon du, lonna kaddule muuɗum de lootowo ammaa heddoto wo tuunɗo faa hewta futuro.
9 Goɗɗo laaɓuɗo ɓoɓta ndoondi magge de resa ndi ley nokkuure seniinde yaasin hoɗorde ndeen. Israa'iilankooɓe ndesa ndoondi ndiin faa gollitoree ndiyam ceninoojam. Wo ɗum sadaka yaafeede. 10 Ɓoɓtuɗo ndoondi oon du, lonna kaddule muuɗum ammaa heddoto wo tuunɗo faa hewta futuro. Ɗum laatoo yamiroore nde Israa'iilanke dimo e janano gonɗo hakkunde muɓɓen fuu ɗowtanto faa abada.
Yamiroore dow laaɓinde hoore muuɗum
11 Meemuɗo maayɗo, ko maayɗo oon laatanii ɗum fuu, wo tuunɗo faa waɗa balɗe jeɗɗi. 12 Joomum laaɓinira hoore muuɗum ndiyam ɗaam nyalaande tataɓerde de nyalaande jeɗɗaɓerde yecco wo laaɓuɗo. Ammaa si joomum laaɓinaay hoore muuɗum nyalaande tataɓerde ndeen fu, nyalaande jeɗɗaɓerde tawataa na laaɓi. 13 Meemuɗo maayɗo de laaɓinaay hoore muuɗum fu, tuuninan hukum Joomiraaɗo. Sey joomum wurtinee suudu Israa'iila. Saabe wiccaaka ndiyam ceninoojam ɗaam, heddoto wo tuunɗo.
14 Inan ko yamiraa si goɗɗo maayi ley hukum: tawaaɗo ley hukum oon e naatuɗo toon fu wo tuunɓe faa waɗa balɗe jeɗɗi. 15 Wooɗi kaakol fuu ngol ommbaaka de haɓɓa wo tuunkol. 16 Si goɗɗo na yaha ley gese de ukkii bardaaɗo kaafaahi maa maayɗo tan maa ƴi'e tagaaɗo maa saabeere de meemi ɗum fuu joomum wo tuunɗo faa waɗa balɗe jeɗɗi.
17 Faa joomum laaɓinee, sey ndoondi sadaka yaafeede ndiin ittee wattee ley le'al de ndiyam ceninoojam ɗaam wattee dow mayri. 18 Neɗɗo laaɓuɗo hooƴa loosol hisopi suuwa ley ndiyam ɗaam de wicca dow hukum oon e kujje gonɗe ley muuɗum e yimɓe tawaaɓe toon fuu. O wicca dow gorko meemunooɗo baraaɗo maa maayɗo maa ƴi'e tagaaɗo maa saabeere oon du. 19 Neɗɗo laaɓuɗo oon wicca mo laaɓaa oon nyalaande tataɓerde e jeɗɗaɓerde. Nyalaande jeɗɗaɓerde ndeen tawa joomum laaɓinaama de kam du lonna kaddule muuɗum, wooɗi lootowo de futuro majjum laatoo laaɓuɗo. 20 Ammaa si mo goɗɗum tuunini oon salake laaɓinde hoore muuɗum fu, sey wurtinee suudu Israa'iila sabo tuuninan nokkuure Joomiraaɗo seniinde. Si o wiccaaka ndiyam ceninoojam ɗaam fu, wo o tuunɗo.