Golle almaami'en
18
1 Joomiraaɗo wi'i Haaruuna:— Wo aan e ɓiɓɓe ma e sakiraaɓe maaɗa lenyol Lewi ndondotoo feloore si woodii ko oonyi ley nokkuure seniinde maa si on luttii e ley gollal mooɗon almaamaaku. 2 Ngaddaa sakiraaɓe maaɗa lenyol Lewi, laatoo wallitooɓe ma, ammaa wo aan e ɓiɓɓe maaɗa tan ndarotoo yeeso hukum keesuwal Amaana oon. 3 Ɓe ngollane wooɗi du ɓe ngaɗa golle jeyɗe golleede ley hukum oon fuu. Ammaa taa ɓe ɓattoo kujje nokkuure seniinde maa sakkirde ndeen sabo nde ɓe ɓattii ɗum fu, aan e maɓɓe fuu on maayan. 4 Ɓe laatoo wallitooɓe ma, ɓe ndaranoo hukum Ceniiɗo oon, ɓe ngaɗaa huunde fuu ko haani waɗeede ley makko. Taa kawriton e mo jeyaaka e mooɗon. 5 Wo onon kaybanta nokkuure seniinde e sakkirde ndeen fuu. Noon watta de Israa'iilankooɓe kisa jukkungo am naawngo ngoon. 6 Inan, miin e hoore am mi suɓake sakiraaɓe mooɗon Lewinkooɓe hakkunde Israa'iilankooɓe, mi hokkii on ɓe faa ɓe laatoo gollooɓe gollal hukum oon. 7 Ammaa Haaruuna, aan e ɓiɓɓe maaɗa tan njeyi gollude gollal almaamaaku to sakkirde e ko woni gaɗa wudere faliinde e nokkuure seniinde ndeen. Ndaranoɗon gollal ngaal. Mi hokkii on almaamaaku, ɗum laatoo gollal mooɗon. Si mo jeyaaka e mooɗon ɓattake ɗum fu, wo bareteeɗo.
Njobdi almaami'en
8 Joomiraaɗo wi'i Haaruuna:
— Mi halfinte dokke ɗe kokketeemi, ko Israa'iilankooɓe ngaddata yeeso am fuu. Mi hokkii ma ɗum aan e ɓiɓɓe maaɗa. Mi hokkirii ma ɗum yamiroore nde ɗowtantoɗon ley jamaanuuji fuu. 9 Inan ko njeyɗaa ley dokke ɓurɗe senaade ɗe mbulataake, ɗum woni sadaka conndi e sadakaaji yaafeede e ɗi njobdi hakke ko Israa'iilankooɓe ngaddata to am. Dokke ceniiɗe ɗeen fuu wo aan e ɓiɓɓe maaɗa njeyi. 10 Nyaamiron ɗe wo ɗe nyaamdu seniindu sanne. Worɓe tan njeyi nyaamude ɗum sabo wo ɗum nyaamdu seniindu. Ndaardaa ɗe wo ɗe ceniiɗe. 11 Wooɗi ko ittetee ley dokke ɗe Israa'iilankooɓe ngaddata e ko ɓantetee yeeso Joomiraaɗo, ɗuum du fuu wo aan jeyi. Mi hokkii ma ɗum, aan e ɓiɓɓe maaɗa fodde yamiroore nde ɗowtantoɗon ley jamaanuuji fuu. Laaɓuɗo tawaaɗo ley suudu maaɗa fuu na waawi nyaamude ɗum.
12 Mi hokkii ma ko ɓuri wooɗude e nebbam e cabijam kesam e alkama, e ko artii ɓenndude e gese ko Israa'iilankooɓe ngaddanta kam fuu. 13 Ko arti ɓenndude e gese maɓɓe e kujje feere feere ɗe leydi maɓɓe rimata ko ɓe ngaddanta Joomiraaɗo fuu wo aan jeyi. Laaɓuɗo tawaaɗo ley suudu maaɗa fuu na waawi nyaamude ɗum.
14 Ko Israa'iilankooɓe ittanta kam ley ko ngoodi fuu wo aan jeyi. 15 Ko laatii awru ko Israa'iilankooɓe kokkata kam gilla hammadiiɓe muɓɓen faa hewti dikkorɗi daabaaji muɓɓen fuu, wo aan jeyi. Ammaa sey ndimɗinaa hammadiiɓe maɓɓe e dikkorɗi daabaaji ɗi laaɓanaa waɗeede sadaka fuu. 16 Ngaɗaa ɗum gilla joomum maa daaba oon ɓuraay leyru wooturu fodde njobdi ndi taƴuɗaa yalla buuɗi cardi joy fodde ponndirɗe nokkuure seniinde naa garamuuji sappo. 17 Ammaa taa ndimɗinaa dikkuru nagge maa mbaalu maa mbeewa sabo ɗiin kaa wo ceniiɗi. Mbiccaa ƴiiƴam majji dow sakkirde de mbulaa ɓelle majji, sabo wo ɗum sadaka mo uurngol muuɗum weli Joomiraaɗo. 18 Ɓernde e busal nyaamal ko ɓantetee yeeso Joomiraaɗo e teewu majji keddiingu fuu wo aan jeyi. 19 Mi hokkii on du, ko senii ko Israa'iilankooɓe ittanta kam fuu aan e ɓiɓɓe maaɗa worɓe e rewɓe, fodde yamiroore nde ɗowtantoɗon ley jamaanuuji fuu. Ɗum woni amaana mo kaɓɓidimmi e maaɗa aan e taaniraaɓe maaɗa, amaana tabitoowo* yeeso am faa abada.
20 Joomiraaɗo wi'i Haaruuna:
— A walaa ndongu e leydi maɓɓe wooɗi du a walaa ngeɗu hakkunde maɓɓe. Wo miin woni ngeɗu e ndongu maaɗa hakkunde ɓiɓɓe Israa'iila.
Ngeɗu Lewinkooɓe
21 — Inan ngeɗu ɓiɓɓe Lewi: mi hokkii ɓe jakka mo Israa'iilankooɓe ngaddata fuu saabe golle ɗe ɓe ngollata ley hukum Ceniiɗo. 22 Ndelle taa Israa'iilankooɓe ɓattoo hukum oon sakko ndekee hakke baroowo. 23 Lewinkooɓe njeyi ndaarande golle ley hukum oon. Si woodii ko gasaay e majjum fu, wo kamɓe njeyi feloore. Ɗum laatanoo on yamiroore nde ɗowtantoɗon ley jamaanuuji fuu faa abada. Ɓe ngalaa ndongu hakkunde yimɓe Israa'iila. 24 Ammaa mi hokkan ɓe jakka mo Israa'iilankooɓe ngaddanta kam. Ɗuum saabii de mbiimi ɓe ngalaa ndonngu hakkunde ɓiɓɓe Israa'iila.
25 Joomiraaɗo haaldi e Muusaa wi'i:
— 26 Mbi'a Lewinkooɓe: Nde njaɓoton jakka mo Israa'iilankooɓe ittanta kam oon fuu, itton katin ley jakka oon jakka saabe Joomiraaɗo. 27 Joomiraaɗo ndaardan ɗum hono jakka gawri ɓoɓtaandi ley ƴarorɗe e cabijam kesam iloojam e ɓoosirde. 28 Noon onon du ittiranton Joomiraaɗo ngeɗu ley jakka mo Israa'iilankooɓe ngaddi fuu de kokkon almaami Haaruuna ngeɗu Joomiraaɗo nguun. 29 Ko kokkaɗon fuu, na tilsi ittanon Joomiraaɗo ngeɗu. Ko ɓuri wooɗude ley majjum ɗuum tilsi ngaɗon sadaka ceniiɗo.
30 Mbi'aa ɓe katin:
— Nde kokkuɗon ko ɓuri wooɗude e majjum fu, Joomiraaɗo ndaardan ɗum hono jakka gawri ɓoɓtaandi ley ƴarorɗe e cabijam kesam iloojam e ɓoosirde. 31 Nyaamon ɗum onon e yimɓe mooɗon to kaajaɗon fuu ngam wo ɗuum woni njobdi golle mooɗon ley hukum Ceniiɗo. 32 Si on ittanii kam ko ɓuri wooɗude e ley jakkaaji Israa'iilankooɓe fu, feloore walaa dow mooɗon. Taa mbonkoɗon dokke Israa'iilankooɓe ceniiɗe ɗeen. Noon waɗata de ɗum warataa on.