Muurtugol Koora
16
1 Lewinke ɓii Yitsehar, lenyol Kehat bi'eteeɗo Koora, kam e worɓe lenyol Ruben tato ɗum woni Datan e Abiram ɓiɓɓe Eliyaba e Oono ɓii Pelet, mawninkinii 2-3 de kam'en e Israa'iilankooɓe hooreeɓe e tedduɓe ardiiɓe 250 innde anndeeɓe kawriti umminani Muusaa e Haaruuna muurtere, na mbi'a:— Min kutake on! Neɗɗo Israa'iila fuu wo ceniiɗo. Wooɗi du, Joomiraaɗo na wondi e muuɗum. Saabe ɗume de oɗon ɓurni ko'e mooɗon yimɓe kawrital Joomiraaɗo heddiiɓe ɓeen fuu?
— Jaango subaka Joomiraaɗo hollan on mo jeyi, ceninaaɗo faa ɓattoo ɗum. Ndeen mo o suɓii fu, kam woni ɓattotooɗo mo. 6 Ndelle Koora e banndiraaɓe muuɗum tiigo ɓoɓtirɗe muɓɓen ndoondi, 7 jaango ɓe kebbina ɗe ƴulɓe kuɓɓooje de ɓe caaka ure dow majje yeeso Joomiraaɗo. Ndeen mo Joomiraaɗo suɓii fu, wo oon woni ceniiɗo. Woowoy! Mi hutake on, onon lenyol Lewi!
8 Muusaa wi'i Koora katin:
— Kettinee, onon ɓiɓɓe Lewi! 9 Ndelle ko Joomiraaɗo Laamɗo Israa'iila senndi on e Israa'iilankooɓe heddiiɓe de waɗi on waawuɓe ɓattaade ɗum, ngolla ley hukum Ceniiɗo de ardoo Israa'iilankooɓe yeeso muuɗum ɗuum fuu heƴaay on naa? 10 O jaɓii ɓadoɗaa mo aan e sakiraaɓe maaɗa Lewinkooɓe e banndiraaɓe maaɗa fuu, de oɗon keddii oɗon piloo almaamaaku. 11 Faa inan oɗon umminana Joomiraaɗo muurtere. De Haaruuna le, wo moy de oɗon ŋurŋurtirana ɗum hono nii?
Muurtere Datan e Abiram
12 Muusaa nelani Datan e Abiram ɓiɓɓe Eliyaba mbi'ee ngara to muuɗum de ɓe njaabii mo ɓe mbi'i:
— Min ngarataa! 13 Yalla ko ndillinɗaa min leydi lobbiri ndi kosam e njuumndi ilata e muuɗum de ngadduɗaa min faa min maaya ley ladde yoornde ɗum fuu heƴaay ma naa? Sey ndawranaa min du katin? 14 A nannaay min leydi ndi kosam e njuumndi ilata e muuɗum, a hokkaay min gese e leɗɗe dimooje faa laatoo ndonngu amin. Ndelle a ndaardataanaa yimɓe ɓee fuu hono wumɓe naa? Min ngarataa!
15 Jaabu maɓɓe oon metti Muusaa sanne de wi'i Joomiraaɗo:
— Taa jaɓu sadaka maɓɓe. Huunde fuu mi jaɓanaay ɓe, fay araawa ngoota. Wooɗi du, mi felaay ɓe fay nde wootere.
16 Muusaa wi'i Koora:
— Jaango ngardaa e banndiraaɓe maaɗa yeeso Joomiraaɗo, Haaruuna du wara. 17 Mono e mooɗon fuu warda e ure muuɗum ley ɓoɓtirgal ndonndi gondungal e ƴulɓe kuɓɓooje de ɓanta ngal yeeso Joomiraaɗo. Ɓoɓtirɗe 250 ɗeen tawta ɓoɓtirgal maaɗa e ngal Haaruuna.
18 Mono fuu hooƴi ɓoɓtirgal muuɗum ndoondi, ɓe ngatti ƴulɓe kuɓɓooje, ɓe ndufi uurdi dow majje de ɓe ngari ɓe ndarii dammbugal hukum Ceniiɗo kamɓe e Muusaa e Haaruuna. 19 Koora hawrondini banndiraaɓe muuɗum ɓeen fuu dammbugal hukum yeeso Muusaa e Haaruuna. Wakkati oon teddeengal Joomiraaɗo ɓangi yeeso jamaare ndeen fuu.
No muurtuɓe ɓeen njukkoraa
20 Joomiraaɗo haaldi e Muusaa e Haaruuna wi'i:
22 Ammaa ɓe ɗiɗo fuu ɓe caami e leydi, ɓe kippii iɓe ndu'oo, iɓe mbi'a:
— Yaa Laamɗo! Aan tiigoriiɗo yonkiiji tageefo fuu e junngo maaɗa, ndelle hakke neɗɗo gooto saabante halkude yimɓe ɓee fuu naa?
23 Joomiraaɗo jaabii Muusaa wi'i:
— 24 Kaaldaa e yimɓe heddiiɓe ɓeen de mboɗɗinaaɓe hukumuuji Koora e Datan e Abiram. 25 Muusaa ummii fonndii to Datan e Abiram, mawɓe Israa'iila na njokkii mo.
26 O wi'i jamaare ndeen:
— Mboɗɗoɗon hukumuuji worɓe bonɓe ɓee, wooɗi du taa meemon ko ɓe njeyi fuu de kalkon saabe hakkeeji maɓɓe!
27 Yimɓe fuu toowti hukumuuji Koora e Datan e Abiram. Tawi Datan e Abiram mburtakeno na ndarii dammbuɗe hukumuuji muɓɓen kam'en e deekiraaɓe muɓɓen e sukaaɓe muɓɓen mawɓe e famarɓe fuu. 28 Muusaa wi'i:
— On paaman wo Joomiraaɗo neli kam mi waɗa ko ngaɗammi ɗum fuu. Wooɗi du, wanaa e muuyɗe am ngaɗirammi ɗum. 29 Si nii worɓe ɓee maayri no yimɓe maayrata fu, ndelle wanaa Joomiraaɗo neli kam. 30 Ammaa si Joomiraaɗo waɗii ko haaynii, si leydi feccake moɗii ɓe kamɓe e ko ɓe njeyi fuu ɓe naati laakara, on paaman wo ɓe huyfinooɓe Joomiraaɗo.
31 Fadde makko e timminde haala kaan, tawi leydi feccake ley koyɗe maɓɓe. 32 Ndi omtii, ndi moɗi ɓe kamɓe e yimɓe Koora e jawdi maɓɓe fuu. 33 Noon yimɓe ɓeen njipporii ley laahara kam'en e ko ngoodunoo fuu, leydi ommbi ɓe. Noon ɓe lalliri hakkunde kawrital Israa'iilankooɓe. 34 Nde Israa'iilankooɓe wonnooɓe ɗakkol ɗoon nannoo kalɓaali maɓɓe fu, ndoggi na mbi'a:
— En ndogga taa leydi ndi moɗa en!
35 Joomiraaɗo jippini yiite nyaami worɓe 250 tiiginooɓe ure yeeso muuɗum ɓeen fuu.