Sadaka ɓiɓɓe gese
15
1 Joomiraaɗo haaldi e Muusaa wi'i:— 2 Mbi'aa Israa'iilankooɓe: nde naatoyɗon leydi ndi kokkammi on njooɗoɗon ndiin fu, 3 ngaɗanon Joomiraaɗo iri sadakaaji hono sadaka buleteeɗo maa sadaka aadi maa sadaka yardamuye maa sadaka saabe iidiiji mooɗon fuu. Itton kirsamaaji ɗiin ley daabaaji mooɗon pamari maa mawɗi, faa uurngol majji laatoo ko weli Joomiraaɗo. 4 Gaɗoowo sadaka fuu wadda dokkal kilooji tati conndi ɓoosidaandi e nebbam liitere e feccere, 5 e sadaka njaram liitere e feccere. Ɗum woni ko yaadata e sadaka njawkoy mbuleteekoy e ngaɗeteekoy sadaka feere fuu.
6 Si tawii wo njawdiri fu, ngaɗon sadaka conndi kilooji jeegom ɓoosidaandi e nebbam liitereeji ɗiɗi, 7 tawti sadaka njaram liitereeji ɗiɗi. Uurngol sadaka oon na weli Joomiraaɗo.
8 Si neɗɗo na waɗana Joomiraaɗo sadaka ngaari hono sadaka buleteeɗo maa sadaka aadi maa sadakaaji jeɗeteeɗi, 9 joomum waddida ndi e kilooji jeenay conndi ɓoosidaandi e nebbam liitereeji nay, 10 tawti sadaka njaram liitereeji nay. Ɗum laatoo ko uurngol muuɗum weli Joomiraaɗo. 11 Noon ngaari e njawdiri e jawgel maa damngel fuu waɗirantee. 12 Noon daaba fuu waɗirantee no daabaaji kirseteeɗi ɗiin poti fuu.
13 Noon Israa'iilanke dimo fuu waɗirta sadaka mo uurngol muuɗum weli Joomiraaɗo. 14 Si nii janano ɓooydi e mooɗon de na haaja waɗude sadaka mo uurngol mum weli Joomiraaɗo fu, joomum waɗira no ngaɗirton noon. 15 Yamiroore ndeen na woodani kawrital Israa'iilankooɓe e jananɓe wonɓe hakkunde muɓɓen fuu. Ɗowtanoɗon nde ley jamaanuuji fuu. 16 Ndelle yamiroore wootere e sariya gooto woodani on onon Israa'iilankooɓe e jananɓe wonɓe hakkunde mooɗon fuu.
17 Joomiraaɗo haaldi e Muusaa wi'i:
— 18 Kaaldaa e Israa'iilankooɓe mbi'aa ɗum'en: nde njottoyiɗon leydi ndi njaarammi on ndiin, 19 de oɗon nyaama buuruuje mayri fu, ittanon kam sadaka. 20 Nde ngaɗoton buuru fu, ittanon Joomiraaɗo buuru artiiɗo ɓenndude hono no cakkiranton mo ko arti ɓenndude ley gese mooɗon noon. 21 Noon ittiranton Joomiraaɗo buuru artiiɗo ɓenndude ley jamaanuuji fuu.
Sadakaaji dow hakke mo hensaaka
22 Si nii on ngaɗaay wootere e jamirooje ɗe Joomiraaɗo hokki Muusaa de tawi on kensaaki, 23 huunde fuu ko Joomiraaɗo yamiri on e hunnduko Muusaa ngaɗon gilla nyannde o yamirnoo ɗum faa e jamaanuuji fuu, 24 si tawii yimɓe fuu mboofii de paamaay, sey jamaare Israa'iilankooɓe fuu waɗa sadaka ngaari mbuleteendi ndi uurngol muuɗum weli Joomiraaɗo, tawti sadaka conndi e sadaka njaram fodde no haaniri e ndamndi sadaka yaafeede. 25 Almaami waɗana kawrital Israa'iila fuu iidi sadakaaji mooytoowo hakke de hakke maɓɓe oon yaafee, sabo wo ɗum hakke mo ɓe kensaaki wooɗi du, ɓe ngaddii sadaka, sadaka yaafeede hakke maɓɓe oon. 26 Israa'iilankooɓe e jananɓe tawaaɓe hakkunde muɓɓen fuu njaafante hakkeeji muɓɓen sabo ɓe fuu ɓe naatiino ley hakke oon.
27 Si nii tawi wo neɗɗo gooto tan waɗi hakke de hensaaki, sey joomum waɗa mbeewa nga ndunngu ngootu sadaka yaafeede hakke oon. 28 Almaami waɗana mo sadaka mooytoowo hakke yeeso Joomiraaɗo de hakke makko yaafee. 29 Yamiroore ndeen na woodani Israa'iilanke dimo e janano gonduɗo e mooɗon, gaɗuɗo hakke de hensaaki fuu.
30 Ammaa kensiiɗo waɗi hakke, Israa'iilanke dimo e janano fu, joomum bonkake Joomiraaɗo. Saabe ɗuum sey wurtinee suudu baaba. 31 Sabo joomum huyfinii konngol Joomiraaɗo, rewaay yamiroore muuɗum, sey wurtinee de hakke oon saama dow muuɗum.
Luttugol yamiroore dow nyannde fowteteende
32 Wakkati Israa'iilankooɓe ngonnoo ley ladde yoornde, gorko gomma tawaa na teena nyannde fowteteende. 33 Tawuɓe imo teena ɓeen nanngi mo njaari yeeso Muusaa e Haaruuna e jamaare ndeen fuu. 34 O halfinaa doomooɓe fadde jukkungo makko e faameede. 35 Ndeen Joomiraaɗo haaldi e Muusaa wi'i:
— Gorko oo, wo bareteeɗo! Yimɓe fuu kawrita paɗɗa mo kaaƴe faa o maaya yaasin hoɗorde ndeen.
36 Yimɓe fuu kawriti njaari mo yaasin hoɗorde de paɗɗi mo kaaƴe faa o maayi hono no Joomiraaɗo yamiri noon.
Ko miccintinta jamirooje Joomiraaɗo
37 Joomiraaɗo wi'i Muusaa:
— 38 Mbi'aa Israa'iilankooɓe: kam'en e taaniraaɓe muɓɓen faa e jamaanuuji fuu kommba saayooji muɓɓen de kaɓɓa bukki gaaraaji bulabulaaji e kommbol leyiwol. 39 Noon waɗata faa nde nji'oyɗon bukki ɗiin fu, miccitoɗon jamirooje Joomiraaɗo de ngaɗon ko wi'i taa ɓerɗe mooɗon maa gite mooɗon ngaddana on luttude yamiroore makko. 40 Noon miccitortoɗon jamirooje am ɗeen fuu, ɗowtonoɗon ɗe de laatoɗon seniiɓe yeeso Laamɗo mooɗon. 41 Miin woni Joomiraaɗo, Laamɗo mooɗon, burtinɗo on leydi Misira faa laatoo Laamɗo mooɗon. Miin woni Joomiraaɗo, Laamɗo mooɗon.