No Muusaa neliri horooɓe
13
1 Joomiraaɗo haaldi e Muusaa wi'i:2 — Nelaa yimɓe njaha korowa leydi Kanaana ndi kokkammi Israa'iilankooɓe ndiin. Cuɓoɗaa ley lenyi Israa'iila 12 ɗiin lenyol fuu neɗɗo gooto, tawee mono e maɓɓe fuu wo ardiiɗo lenyol muuɗum.
3 Muusaa waɗiri hono no Joomiraaɗo wi'iri noon. O neli yimɓe ɓeen ley ladde Paran ɗo ɓe ngoni ɗoon. Ɓe fuu wo ɓe ardiiɓe lenyi Israa'iila. 4 Inan inɗe maɓɓe:
Ley lenyol Ruben, Sammuwa ɓii Jakuura.
5 Ley lenyol Simeyon, Safat ɓii Hori.
6 Ley lenyol Yahuuda, Kaalibu ɓii Yefunne.
7 Ley lenyol Isakar, Igal ɓii Yuusufi.
8 Ley lenyol Efrayim, Hoseya ɓii Nuun.
9 Ley lenyol Benyamin, Palti ɓii Raafu.
10 Ley lenyol Jabulon, Gaddiyel ɓii Sodi.
11 Ley lenyol Manasa ɓii Yuusufi, Gaddi ɓii Suusi.
12 Ley lenyol Dan, Amiyel ɓii Gemalli.
13 Ley lenyol Aser, Setur ɓii Mikayel.
14 Ley lenyol Naftali, Nakabi ɓii Wofsi.
15 Ley lenyol Gad, Gewil ɓii Maaki.
16 Ɓeen Muusaa neli faa korowa leydi Kanaana ndiin. O wayliti innde Hoseya ɓii Nuun, o inndiri ɗum Yoosuwa. 17 Noon Muusaa neliri ɓe, ɓe korowa leydi Kanaana. O wi'i ɓe:
— Ƴuuron horɗoore leydi ndiin de ƴeenyon baamle. 18 Ndaaron leydi ndiin, paamitoɗon no ndi worri, yalla yimɓe mayri na ngoodi semmbe naa ngalaa, yalla iɓe ɗuuɗi naa ɓe ɗuuɗaa. 19 Ndaaron yalla ndi lobbiri naa ndi bondi, ndaaron du yalla kuɓeeje maɓɓe na ngoodi kokuuji deenorɗi naa ngalaa. 20 Ndaaron no leydi gese maɓɓe wa'i, yalla wo mbuurndi naa wo mbaatundi. Ndaaron yalla indi woodi leɗɗe naa ndi walaa. Taa kulon, ngartidon e ɓiɓɓe leɗɗe mayri. Tawi wakkati oon cabiije puɗɗata ɓenndude.
21 Ɓe ndillani horude leydi ndiin. Ɓe kori ndi gilla ladde Sin faa yaade Rehoob ɗakkol ladde Lebo-Hamat. 22 Ɓe ndewi faro horɗoore, ɓe njottii huɓeere Heberon to ɓiɓɓe Anak, ɗum woni: Akiman e Sesay e Talmay. Tawi Heberon mahiraama duuɓi jeɗɗi fadde wuro So'an ngo leydi Misira e nyiɓeede. 23 Nde ɓe njottinoo gooruwol Eskol fu, ɓe itti wukkuru cabiije, de yimɓe ɗiɗo pali sawru hakkunde muɓɓen mbakkii liccal ngal. Ɓe itti du ɓiɓɓe lekki rummaneehi e ƴibbe. 24 Nokkuure ndeen inndiraa naɗɗol Eskol (ɗum woni wukkuru), saabe wukkuru cabiije ndu Israa'iilankooɓe itti nduun.
25 Caggal balɗe 40, ɓe njeccii. 26 Ɓe ngarti, ɓe tawti Muusaa e Haaruuna e yimɓe Israa'iila fuu ley ladde Paran leydi Kaades. Ɓe kaali kabaaru ko ɓe nji'i toon fuu. Ɓe kolli ɓiɓɓe leɗɗe leydi ndiin. 27 Ɓe mbi'i:
— Min njehii leydi ndi nelɗon min korowa ndiin. Si goonga leydi ndiin wo leydi ndi kosam e njuumndi ilata e muuɗum. Inan du ɓiɓɓe leɗɗe mayri. 28 Ammaa jooɗiiɓe ley mayri na ngoodi semmbe, gure muɓɓen du wo mawɗe kowiraaɗe kokuuji deenooji. Min nji'ii fay yimɓe Anakinkooɓe, tagaako mawko koon. 29 Amalekinkooɓe na njooɗii horɗoore, Hitiyankooɓe e Yebusinkooɓe e Amorinkooɓe na njooɗii faro baamle. Kanaaninkooɓe du na njooɗii daande maayo Manngo e daande gooruwol Urdun.
30 Wakkati oon Kaalibu darni duko ŋurŋurtanooɓe Muusaa ɓeen de wi'i:
— En njaha teetowen leydi ndiin, sikke fuu walaa en njaaltoto ɓe de teeten ndi!
31 Ammaa yaadunooɓe e makko ɓeen njaabii mbi'i:
— En mbaawataa haɓdude e yimɓe ɓeen sabo iɓe ɓuri en semmbe.
32 Katin woɓɓe hakkunde horoynooɓe ɓeen kolli Israa'iilankooɓe kabaaru kulɓiniiɗo e leydi ndi ɓe korowi ndiin, ɓe mbi'i: