No Mariyama e Haaruuna peliri Muusaa
— Yalla Muusaa tan Joomiraaɗo haaldi naa? Ndelle, o haaldaay e meeɗen enen kaa naa?
Joomiraaɗo nani ko ɓe mbi'i ɗuum. 3 Tawi, Muusaa wo neɗɗo leeƴinkiniiɗo sanne mo hono muuɗum e leeƴinkinaare walaa ley duuniyaaru. 4 Wakkati oon pay Joomiraaɗo haaldi e Muusaa e Haaruuna e Mariyama, wi'i ɗum'en:
— On tato fuu ngaron hukum Ceniiɗo toon.
Ɓe ngari ɓe tato fuu. 5 Joomiraaɗo ɓangi ley ruulde, darii dammbugal hukum ɗoon, noddi Haaruuna e Mariyama ɓattoo. 6 O wi'i ɓe:
— Kettindee ko kaalanammi on joonin ɗum: Si annabaajo na woodi hakkunde mooɗon fu, wo e ley holleede kollirammi ɗum hoore am, maa du e ley koyɗol kaaldirammi e muuɗum. 7 Ammaa Muusaa maccuɗo am, ɓurɗo hoolnaade ley suudu am fuu oon kaa, wanaa noon min ngondiri. 8 Miɗo haalda e muuɗum hunnduko e hunnduko, wanaa e holleede maa e ley sirri. Imo yi'a alhaali am. Ndelle, ko saabii de cuusuɗon felude maccuɗo am Muusaa?
9 Joomiraaɗo tikki sanne, dilli yoppi ɓe. 10 Nde ruulde ndeen dillunoo dow hukum oon fu, nyawu nguru nanngi Mariyama. Nguru makko rawni far hono haabu. Haaruuna yeeƴi ndaari mo, tawi o nyawraama nguru. 11 Ndeen Haaruuna ŋaarii Muusaa, wi'i:
— Joomam, miɗo ŋaare, taa accu hakke mo min ngaɗiri puuyndam oon saama dow ko'e amin. 12 Taa ɓanndu Mariyama laatoo hono ɓanndu ɓinngel ngel rimdaaka e yonki, puɗɗungel nyolude.
13 Muusaa ƴepti daande muuɗum, wullitii Joomiraaɗo, wi'i:
— Yaa, Laamɗo am, miɗo ŋaare, ndannaa mo!
14 Ndeen Joomiraaɗo wi'i Muusaa:
— Si baabiiko tuttiinoo dow yeeso makko wanaa o heddodoto e semteende faa waɗa balɗe jeɗɗi naa? Ndelle mburtinee mo, njaaron mo yaasin hoɗorde, o jooɗoo toon balɗe jeɗɗi, de ngartiron mo.