Luwe cardi puufeteeɗe
10
1 Joomiraaɗo haaldi e Muusaa wi'i:— 2 Ngaɗaa luwe ɗiɗi puufeteeɗe. Ngaɗiraa ɗe cardi ndimri. Kanje noddirtee kawrital Israa'iilankooɓe, wooɗi nde eggol mooɗon hewti fuu, wo kanje ngooynirton eggol ngool. 3 Nde luwe ɗiɗi ɗeen puufaa fuu, Israa'iilankooɓe fuu kawrita to maaɗa dammbugal hukum Ceniiɗo. 4 Si wo fuufaango wooto tan waɗaa, paamon wo mawɓe e ardiiɓe cuuɗi Israa'iila tan noddaa kawrita yeeso maaɗa. 5 Si puufaali ɗiin njokkondiri fu, hoɗorde heedunde lettugal hukum ndeen artoo egga. 6 Fuufaango ɗiɗaɓo, hoɗorde heedunde horɗoore rewta. Eggi maɓɓe fuu na kolliree sii puufaali feere feere. 7 Ammaa si wo faa jamaare Israa'iila hawrita fu, sey fuufaango juutungo ngo jillaay e duko wokko.
8 Ɓiɓɓe Haaruuna, almaami'en ɓeen tan njeyi fuufude ɗe. Ngollitiron ɗe ley jamaanuuji fuu.
9 Nde njooɗoyiɗon ley leydi mooɗon de oɗon njaha konu faa kabdon e wayɓe mooɗon torrooɓe on fu, puufon luwe ɗeen puufaali konu. Noon miccintinirton Joomiraaɗo Laamɗo mooɗon de ndeenoɗon e juuɗe wayɓe on. 10 Nde ngaɗoton iidiiji hitaande, maa darorɗe lewru maa iidiiji goɗɗi fu, puufon luwe ɗeen wakkati ngaɗoton sadaka buleteeɗo e sadaka dewral. Ɗi miccintinan on Laamɗo mooɗon. Miin woni Joomiraaɗo, Laamɗo mooɗon.
Jahaangal Israa'iilankooɓe gilla Sinayi faa Kaades
No ɓe njaari
11 Nyannde 20 lewru ɗiɗaɓurdu hitaande ɗiɗaɓerde, ruulde ndeen ɓantii dow hukum keesuwal Amaana. 12 Israa'iilankooɓe eggi ladde Sinayi, ruulde ndeen darowii faa dow ladde Paran. 13 Ndeen ɓe puɗɗi eggude dow yamiroore nde Joomiraaɗo hokki Muusaa.
14 Hoɗorde Yahuuda artii dillidi e darappo muuɗum. Ɓe ndilliri fedde fedde.
Naasun ɓii Aminadaabu woni hooreejo maɓɓe.
15 Netanel ɓii Suwar woni hooreejo lenyol Isakar.
16 Eliyaba ɓii Helon woni hooreejo lenyol Jabulon.
17 Hukum Ceniiɗo oon huuncaa de Gersoninkooɓe e Merarinkooɓe ndonndii ɗum njokkii ɓe.
18 Caggal ɗuum hoɗorde Ruben rewtidi e darappo muuɗum. Ɓe ndilliri fedde fedde.
Elisur ɓii Cedehur woni hooreejo maɓɓe.
19 Celumiyel ɓii Surisaday woni hooreejo lenyol Simeyon.
20 Eliyasaf ɓii De'uwel woni hooreejo lenyol Gad.
21 Ndeen Kehatinkooɓe ndewtidi e kujje ceniiɗe ɗeen, ardiiɓe ɓeen du na ndarna hukum oon fadde maɓɓe e yottaade.
22 Hoɗorde Efrayim rewtidi e darappo muuɗum. Ɓe ndilliri fedde fedde.
Elisama ɓii Amihud woni hooreejo maɓɓe.
23 Gamaliyel ɓii Pedasur woni hooreejo lenyol Manasa.
24 Abidaan ɓii Gedeyoni woni hooreejo lenyol Benyamin.
25 Hoɗorde Dan sakitii rewtidi e darappo muuɗum. Ɓe ndilliri fedde fedde.
Ahiyeser ɓii Amisaday woni hooreejo maɓɓe.
26 Pagiyel ɓii Okoran woni hooreejo lenyol Aser.
27 Ahira ɓii Enan woni hooreejo lenyol Naftali.
28 Nii woni no Israa'iilankooɓe eggiri, ɓe dilliri fedde fedde.
Ardotooɗo Israa'iilankooɓe
29 Muusaa wi'i Hobab ɓii Rewel Madiyanke esum gorko:
— Inan miɗen njaha leydi ndi Joomiraaɗo wi'i hokkan min ndiin. Ngara njahaden, min ngaɗante moƴƴere ngam Joomiraaɗo wi'i waɗanan Israa'iilankooɓe ko wooɗi.
30 Hobab jaabii mo wi'i:
— Mi yaadataa e maaɗa. Mi yeccoto leydi am to suudu baaba am.
31 Muusaa ɓeydi wi'i:
— Miɗo ŋaare, taa yoppu min, sabo aan anndi nokkuuje ɗo min mbaawi hoɗude ley ladde ndee, wooɗi du, aɗa waawi laatanaade min ɗowoowo. 32 Si a ɗowtii min fu, a hawtan e amin barke mo Joomiraaɗo fodanii min oon.
33 Israa'iilankooɓe ndilli waamnde Joomiraaɗo ɗoon de njeyi yaadu balɗe tati. Keesuwal Amaana ngaal na ardii ɓe balɗe tati ɗeen faa holla toy ɓe mbaawi hoɗude 34 Ley eggol maɓɓe nyalooma fuu ruulde Joomiraaɗo ndeen na ɗoogi ɓe yaade. 35 Nde keesuwal Amaana ngaal dillata fuu, Muusaa na wi'a:
— Joomiraaɗo umma, wayɓe maaɗa cankitoo, habdiiɓe ma du ndogga yeeso maaɗa.
36 Nde keesuwal Amaana ngaal njoƴƴinaa fuu, o wi'a:
— Wartu Joomiraaɗo, njooɗoɗaa hakkunde Israa'iilankooɓe ɓe mbaawataake limideede.