Jamirooje dow iidi Faltagol
9
1 Lewru go'aɓurdu hitaande ɗiɗaɓerde wurtagol Israa'iilankooɓe leydi Misira, Joomiraaɗo haaldi e Muusaa ley ladde Sinayi wi'i ɗum:— 2 Israa'iilankooɓe ngaɗa iidi Faltagol si wakkati muuɗum warii. 3 Ɗum woni nyannde 14 lewru nduun gaɗa caamal naange.
4 Ndeen Muusaa yamiri Israa'iilankooɓe ngaɗa iidi Faltagol. 5 Ɓe ngaɗi iidi oon gaɗa caamal naange nyannde 14 lewru go'aɓurdu ley ladde Sinayi fodde no Joomiraaɗo yamiri Muusaa. 6 Ammaa na woodi yimɓe ɓe laaɓanaa waɗude iidi oon sabo ɓe meemii maayɗo. Ɗuum saabii de ɓe njehi ɓe kaaldowi e Muusaa e Haaruuna ɓe mbi'i:
— 7 Min laaɓaa sabo min meemii maayɗo. Ɗume saabii de miɗen kaɗee waddude sadaka amin yeeso Joomiraaɗo nyannde majjum hono no Israa'iilankooɓe heddiiɓe ɓeen ni?
8 Muusaa jaabii ɓe wi'i:
— Munyee faa mi faama ko Joomiraaɗo wi'ata dow mooɗon.
9 Joomiraaɗo wi'i Muusaa:
— 10 Haaldu e Israa'iilankooɓe mbi'aa ɗum'en: Si gooto hakkunde mooɗon faa yaade taaniraaɓe mooɗon tuunnirii hoore muuɗum meemude maayɗo maa si joomum yehi jahaangal boɗɗungal fu, na waawi waɗude iidi oon saabe teddinde innde Joomiraaɗo. 11 Ammaa wo 14 lewru ɗiɗaɓurdu gaɗa caamal naange ɓe njeyi waɗude ɗum. Ɓe nyaama ɓinngel baalel ngeel kam e buuruuje ɗe ngaɗtaaka rabilla e haakooji kaaɗuɗi. 12 Taa ɓe kedda fay gootum waala, wooɗi du, taa ɓe kela ƴi'al fay gootal. Ɓe ngaɗira iidi oon no Joomiraaɗo yamiri noon.
13 Ammaa si tawii joomum na laaɓani waɗude iidi oon wooɗi du yahaay jahaangal boɗɗungal de waɗaay ɗum nyannde ɗum jeyi waɗeede fu, ittee e suudu bammum de hakke muuɗum dekoo dow hoorem.
14 Si janano tawaaɗo hakkunde mooɗon muuyii waɗude iidi oon saabe teddinde kam fu, na tilsi joomum waɗira ɗum fodde jamirooje ɗee. No ngaɗirton iidi oon fuu noon janano oon du jeyi waɗirde ɗum.
No ruulde njipporii dow Hukum Ceniiɗo
15 Nyannde hukum keesuwal Amaana oon darnanoo ruulde suddi ɗum. Noon ruulde ndeen heddorii dow hukum oon na yayna hono yiite faa weeti. 16 Ruulde ndeen heddorii noon na suddi hukum oon. Jemma fu inde nanndi e yiite. 17 Nde ruulde ndeen ɓantii dow hukum oon fu, Israa'iilankooɓe egga nokku oon de njaha koɗowa to ruulde ndeen jippowi fu. 18 Noon Joomiraaɗo ɗowtirannoo ɓe nde ɓe eggata e nde ɓe koɗata fuu. No ruulde ndeen neeɓiri dow hukum oon fu, noon kamɓe du, ɓe neeɓirta ley koɗorɗe maɓɓe. 19 Si ruulde ndeen ɓooyi dow hukum oon fu, Israa'iilankooɓe ndillataa. Ɗoon ɓe keddoto na ɓe ngollana Joomiraaɗo.
20 Na woodi wakkatiiji ɗi ruulde ndeen ɓooyataa dow hukum oon. Ndelle eggol maɓɓe e koɗol maɓɓe fuu wo e muuyɗe Joomiraaɗo. 21 Wooɗi si ruulde ndeen ɓuraay dow hukum oon jemma gooto e nyalooma gooto, maa futuro yaade fajiri, de ɓantii fu, Israa'iilankooɓe du ummodo e eggol. 22 Nyalaaɗe ɗe ruulde ndeen waɗi dow hukum oon fu, nde wo balɗe ɗiɗi, nde wo lewru maa ko ɓuri noon, ɗeen Israa'iilankooɓe du ngaɗata ley koɗorɗe muɓɓen. Ɓe ndillataa si wanaa nde ruulde ndeen ɓantii. 23 Eggol maɓɓe e koɗol maɓɓe fuu wo e dow yamiroore Joomiraaɗo. Iɓe ngollana Joomiraaɗo fodde no yamirta e hunnduko Muusaa fu.