No kokkuɗo hoore muuɗum Joomiraaɗo jeyi waɗude
6
1 Joomiraaɗo haaldi e Muusaa wi'i:— 2 Kaaldaa e Israa'iilankooɓe, mbi'aa ɗum'en: Si gorko maa debbo suɓake seninande hoore muuɗum Joomiraaɗo de waɗii hunayeere to muuɗum fu, 3 joomum jeya yarude cabijam lamminaaɗam maa sii bagiiji feere, maa ndiyam lammuɗam maa njaram lamminaaɗam. Joomum haanaa yarude cabijam e nyaamude cabiije bagge e joorɗe fuu. 4 Si nii joomum hokkii hoore muuɗum Joomiraaɗo fu, jeyaa nyaamude ko waɗiraa cabiije. Wanaa geeƴi cabiije ɗeen, wanaa guri muɓɓen.
5 Taa pemmborki du meema hoore joomum faa wakkati oon wittoo. Joomum laatoo ceniiɗo gollanoowo Joomiraaɗo de acca ngaasa muuɗum e leeɓi waare muuɗum njuuta. 6 Ley wakkati oon fu, joomum jeyaa ɓadaade maayɗo. 7 Fay si tawi maayɗo oon wo baabiiko maa inniiko maa sakiike makko gorko maa debbo, o jeyaa meemude ɗum saabe seninande hoore makko Laamɗo. 8 Ley wakkati oon fuu joomum wo ceniiɗo yeeso Joomiraaɗo.
9 Si goɗɗo maayirii wakkati gooto ɗakkol makko fu, senagol makko yeeso Joomiraaɗo ngool taƴan. Ammaa haddi balɗe jeɗɗi sey o femmba ngaasa makko de o yecco o laatoo ceniiɗo. 10 Nyalaande jeetataɓerde ndeen, o waddana almaami buugaali maa nyaabe ɗiɗi naarude hukum Ceniiɗo. 11 Almaami waɗa wuugaandu wooturu sadaka yaafeede, wooturu du, sadaka buleteeɗo. O waɗana joomum sadaka mooytoowo hakke kewtuɗo ɗum oon. Nyannde majjum pay o laaɓina hoore makko kesum. 12 O yecco e hokkude hoore makko Joomiraaɗo. O wadda jawgel ngel ndunngu ngootu saabe sadaka njobdi hakke. Nyalaaɗe bittiiɗe ɗeen limataake ley senagol makko sabo o tuuniino.
13 Inan yamiroore dow seninande hoore muuɗum Joomiraaɗo: nyannde seningol ngool timmata fu, joomum waddee dammbugal hukum. 14 O warda e sadaka makko to Joomiraaɗo. Ɗum woni jawgel ngel ndunngu ngootu gaɗeteengel sadaka buleteeɗo, e bortol kol ndunngu ngootu gaɗeteekol sadaka yaafeede, e njawdiri ngaɗeteendi sadaka dewral. Tawa ɗi fuu ɗi ngalaa malal. 15 Wooɗi du, joomum wadda hanndeere buuruuje ɗe ngaɗtaaka rabilla e maasa gaɗiraaɗo nebbam mo jillaaka rabilla, e sadaka conndi e sadaka njaram. 16 Almaami wadda sadakaaji ɗiin yeeso Joomiraaɗo de waɗa sadaka yaafeede e sadaka buleteeɗo. 17 Katin o waɗana Joomiraaɗo sadaka dewral ɗum woni njawdiri ndiin e hanndeere buuruuje ɗeen, tawta sadaka conndi e sadaka njaram ko ɗowtata ɗum.
18 Wakkati oon, ceninanɗo hoore muuɗum Joomiraaɗo oon femmboo naarude hukum Ceniiɗo ɗoon de ada ngaasa kaan faɗɗa dow yiite sakkirde sadaka dewral. 19 Almaami ada wecco njawdiri ndiin tawa jonngaama de itta ley hanndeere toon maasaare e buuruuje ɗe ngaɗtaaka rabilla, watta ɗe e juuɗe makko tawa o femmbii hoore makko saabe senagol yeeso Joomiraaɗo. 20 Almaami oon ɓanta ɗum yeeso Joomiraaɗo. Neema ceniiɗo oon laatoo ngeɗu almaami tawta ɓernde njawdiri ndiin e busal mayri. Caggal ɗuum neɗɗo oon na waawi yarude cabijam katin.
21 Ndee woni yamiroore nde anniyiiɗo seninande hoore muuɗum Joomiraaɗo jeyi ɗowtanaade. Oo woni sadaka mo joomum jeyi waɗande Joomiraaɗo saabe senininde hoore muuɗum, tawta ko joomum waawi hokkirde e muuyɗe ɓernde muuɗum fuu. Na tilsi joomum waɗa huunde fuu ko fodii waɗude fodde hunayeere muuɗum.
No barkinirtee
22 Joomiraaɗo wi'i Muusaa:
24 Joomiraaɗo barkina on de reena on.
25 Joomiraaɗo yaynana on de waɗana on moƴƴere.
26 Joomiraaɗo hiilnoo on de hokka on jam.
27 Wo noon ɓe caakirta innde am hakkunde yimɓe Israa'iila de mi barkina ɓe.